Gā-ai khoe-i ra dī xūn
1 Sa pere-e ǁgam-i ai aoǂui,
ots ge ǂgui tsēdi khaoǃgâ ǁî-e nî hō.
2 Hû tamas ka io ǁkhaisan tawa sa ǃâsa mā re,
mâ ǂkhaban ǃhūbaib ai nî hā ǃkhaisats a ǀū xuige.
3 ǁGam-i xa di ga ǀoa,
o di ge ǃâude ǃhūb ai ra ǀkhaiǀkhaiǃnâsen,
ǃkhais ǁkhās khamis ge haisa ǁnās kao nēsis ga ǃkhawagasǀkhāb ǁga ǁnās,
ǀapasǀkhāb ǁgas ga ǁnās hoasa, ǁnās gopa ra ǁgoetoa.
4 ǁNā-i hîa ǂoab mâsiba ra ǃâu-i ge xū-i xare-e ǃhana tide
tsî ǁnā-i ǀnanuba ra kō-i ge tātsēs tsîna ǃgao tide.
5 Mâtib gagaba ǀgamǀkhā hâs di ǂkhōgu ǃnâ ra ǂgâ
ǃkhaisats a ǀūs ǁkhās khamits ge
Elob hoaraga xūna ge kurub
di sîsenna a ǀū.
6 ǁGoaga sa ǃkhomma tsoro î ǃommi âtsa tā ūdawa, mâ-i nî ǂûtani ǃkhaisats a ǀū xuige: Nēn as tamas ka io naun as, tamas ka ion hoana ǀguitikōse nî ǂûtanisa.
7 Kaise i ge a ǃgâi tsēs di ǃnâba mûǃnâsa. 8 Xawe ganganxa re ûits hâ ǁaeb xa, î ǁîb ǃnâ ǃgâiǃgâisen re. Xawe ǂâis ǃnâ ūhâ re ǁōb di tsēdi ǁnās ǃgâ-ai a ǂgui ǃkhaisa. Nēn hoan ge a harebeoǃnâ.
ǂKham khoen ǃoa hâ ǀapemās
9 ǃGâiaǂgao re ǂkham khoedo, ǂkhamsis âdu ǃnâ. Sadu di ǂgaob ra ǂgaoǀî tsî mûdi âdu ra kōǀî ǃgû re. Xawe ǂan re nēn hoan ǃaromab Eloba nî ǀgoraǃgâ du ǃkhaisa.
10 Tā i xū-i xare-e ǂâiǂhansen tamas ka io tsû kai du. Gaxuse du ǂkhamse hâ tide xuige.
© Khoekhoegowab Elobmîs © Bible Society in Namibia, 2020.
