Elob ge Jerusalemsa nî ǁkhauba
1 ǁNān Egipteb ǁga huib ǃaroma ra ǃgûn ge ǀâxarexūsa! ǁÎn ge torohāgu, ǂgui torokunidi tsî ǀgaisa torohāǃgapi-aogu tsîn ai ge ǂgomǃgâ, xawen ge Israeli di ǃAnub ǃoa ǂnan tamas ka io ǃKhūb tawa ǀape-ôa tama ge hâ i. 2 Xawe ǁîb ge ǁnāb gā-aisiba ūhâ tsî tsūǀkhāba nî ǀkhī-ūba; ǁîb ge mîdi âba ǂgae-oa tide tsîb ge ǂkhabadī-aon ǃoagu tsî ǁnān ǁore-aona ra huin ǃoagus tsîna nî khâimâ. 3 Egipteǁîn ge elo tamana, tsî khoes ǀguisa i. ǁÎn hāgu ge gaga tama tsî ǁgans ǀguisa i. ǃKhūb ga ǁîb ǃomma ǀhōǂui, on ge hui-aona nî ǃnôa tsîn ge huihe gerena nî ǁnā. ǁÎn ge ǀguipa nî ǁō.
4 Amase, nēs ge ǃKhūb ge tita ǃoa mîsa: “Tita ge ǂkham xammi ǁîb amǀnē-e ra ǁgâǁkhaeba khami ǁîna nî ǁkhaeba. Kai ǂguis ǃûi-aogu ga ǁîba ǁnāǂam, xaweb ge ǁnā xamma ǁîgu ǃhaob tsî ǂkhupib tsîn xa ǃaoǃaohe tama hâ. ǁNāti ta ge tita ǃKhūta Hoaǀgaixata Sionǃhommi tsî ǁîb ǃnâugu ai nî ǃkhamse nî ǁgôaxa. 5 Aniron ra ǁîn omros ǂnamipe ǁkhana, khamib ge ǃKhūb Hoaǀgaixaba Jerusalemsa nî hâǂnami; ǁîb ge ǁîsa ǁkhauba tsî nî ore, ǁîb ge ǁîsa sâu tsî nî huiǂui.
6 “Israelǁîdo! ǁNāb hîa du ge ǁgaisise ǂharab ǃoa du ǃhoba-oa re! 7 ǁNā tsēs ai i ge mâ-i hoa-e ǁî-i ǃomkha ǀkha i ge ǁoreb ǃnâ kuru ǀhaiǀuri tsî ǃhuniǀuriǁgôa-eloga nî aoxū. 8 Asiriaǁîn ge khoe-i xa kuruhe tama gôab xa nî ǃgamhe; khoe taman ge, xawe gôab ge ǁîna nî hapu. ǁÎn ge nē gôaba xu nî ǃkhoeni tsî ǁîn ǂkham khoegu ge ǃgom sîsenna dīsa nî ǁgarihe. 9 ǁÎn ǁkhaubaǃkhaigan ge ǃao tsî nî ǃkhoexū; ǁîn ǂamkhoegu ge ǁnātikōse ǃaob xa ǃkhōhe tsî ǃkhammi ǃkhauga nî ǁnāxūǁgui.” Nēs ge ǃKhūb Sions ǀaes dib tsî Jerusalems ǀaesūs dib ra mî ǀgausa.
© Khoekhoegowab Elobmîs © Bible Society in Namibia, 2020.
