Josuab ge ǁaes ǀkha Sexems tawa ra ǃhoa
1 Josuab ge hoaraga ǃhaodi Israels dide Sexems tawa ge ǀhaoǀhao. ǁÎb ge kaigu, ǂgaeǂgui-aogu, ǂhanuǂhanu-aogu tsî ǂamkhoegu Israels diga ge ǂgai, tsî gu ge Elob aiǃâ hā ge mâ. 2 Ob ge Josuaba hoaraga ǁaesa ǃoa ge mî: “Nētib ge ǃKhūb, Israeli di Eloba ra mî: ‘Sadu aboxagu ge ǂguro Eufratǃāb nauǃani ge ǁan hâ i tsî ǀkhara eloga gere ǃoaba. ǁÎgu di ǀguib ge Terab, Abrahammi tsî Nahori tsîkha di î ge iba. 3 O ta ge tita sadu aboxab Abrahamma Eufratǃāb nauǃani ǁgoe ǃhūba xu ū tsî Kanaanǃhūb hoaragab ǃnâ-u ge ǂgaeǂgui. Tsî ta ge kaise ǂgui ôananôaguba ge mā bi. ǁÎba ta ge Isaka ge mā, 4 tsî Isaka ta ge Jakob tsî Esaub tsîkha ge mā. Esauba ta ge ǃnâuxa ǃhūb Edommi diba ǁîb dise ge mā, xawe sadu aboxab Jakob tsî ǁîb di ôan tsîn ge Egipteb ǁga ge doeǁgôa. 5 Ega ta ge Moseb tsî Aronni tsîkha ge sî tsî ta ge tsûtsû-aina Egipteb ǂama ge hā-ū. ǁNās khaoǃgâ ta ge ge ǂgaeǂguiǂui du. 6 Sadu aboxana ta ge Egipteba xu ge ūǂui, tsîn ge Egipteǁîna ǁîna torokunidi tsî hāǃgapi-aogu ǀkha ge ǃgôaǃgon. On ge sadu aboxana ǀApahurib tawan ge sīo, 7 tita ǃoa huib ǃaroma ge ǂgai, o ta ge ǃkhaenaba ǁîn tsî Egipteǁîn tsîn ǁaegu ge dī. Tita ge huriba Egipteǁîn ǂama dâu kai tsî ǁîna ge āǁō kai. Tarena ta ge Egipteb ǀkha a dīsa du ge a ǂan.
“ ‘ǂOmxa ǁaeba du ge ǃgaroǃhūb ǃnâ ge ǁan. 8 ǁNās khaoǃgâ ta ge Amorǁîn, Jordanni aiǂoas ǃnâ ge ǁan hâ in di ǃhūb ǃnâ ge hā-ū du. ǁÎn ge sadu ǃoagu a ǃkham, xawe ta ge ǁîn ǂama dansa ge mā du. Sadu ge ǁîn di ǃhūba ge ū tsî tita ge ǁîna sadu aiǃâ ge hîkākā. 9 Moabǁîn di gao-aob Balaki, Sipori ôab ge sadu ǃoagu ge ǃkham. ǁÎb ge Beori ôab Bileamma ge haisiba, îb sado ǀâxare. 10 Xawe ta ge tita Bileamma ǃgâ ǂgao tama ge i, xui-aob ge sado ge ǀkhae tsî ta ge ǁnās ǀkha sado Balaka xu ge huiǂui. 11 Jordanna ǃgâu tsî du ge Jerixos ǃnâ ge hā. Jerixos di aogu ge sadu ǃoagu ge ǃkham; ǁnās ǁkhās xasen ge Amorǁîn, Perisǁîn, Kanaanǁîn, Hetǁîn, Girgasǁîn, Hivǁîn tsî Jebusǁîn tsîna ge dī, xawe ta ge ǁîn hoan ǂama dansa ge mā du. 12 Sadu ra ǀgū hîa ta ge kai ǃaoba ǁîn ǂama ge hā kai, Amorǁîn di gao-aokha ta nî ǁgariǂuise; sadu gôagu tsî khādi tsîn ǀkhas ose. 13 Sîsen tama du ge hâ i ǃhūb tsî ǂnubi tama du ge hâ i ǃādi tsîna ta ge ge mā du. Nēsi du ge ǁnāpa ǁan tsî ǃhana tama du ge hâ i draibehaidi tsî ǀkherahaidi di ǂûna ra ǂû.’ ”
14 ǃAruǀîb ge Josuaba ge mî: “Nēsi ǁnâi ǃKhūba ǃaoǃgâ, î du ǁîba ǂhauǃnâsib tsî ǂgomǂgomsasib ǀkha ǃoaba. ǁNā elogu sadu aboxan Mesopotamiab tsî Egipteb tsîkha ǃnâ gere ǃoabaga aoxū, î du ǃKhūb ǀguiba ǃoaba. 15 ǃKhūba du ga ǃoaba ǂgao tama i, o nētsē mîǁgui tari-e du ra ǃoaba ǂgaosa, sadu aboxan Mesopotamiab ǃnâ gere ǀgoreǀî elogu tamas ka io Amorǁîn, ǁîn di ǃhūb ǃnâ du ǁan hân di elogu kas hoasa. Xawe tita tsî ti omaris xasa, sida ge ǃKhūba nî ǃoaba.”
16 On ge khoena ge ǃeream: “Sida ge ǃKhūba ǁnāxū tsî ǀkhara elo-e ǃoaba tide. 17 ǃKhūb, sida Elob ge sida aboxan tsî sida tsîna Egipteb di khobosisa xu ge ǂgaeǂguiǂui, tsî da ge ǁîb ge dī buruxa dīga ge mû. ǁÎb ge doe da ge daob hoab ai, ǁîdi ǃnâ-u da ge ǃkharu ǃhaodi hoadi ǃnâ ge sâu da. 18 Nē ǃhūb ǃnâ da ge ǂgâxa, ob ge ǃKhūba nēpa ge ǁan hâ i Amorǁîn hoana ge ǁgariǂui. Sida on ge ǃKhūba nî ǃoaba; ǁîb ge a sida Elo.”
19 Josuab ge ǁaesa ge ǃeream: “ǃKhūba ǃoabas ge supu tama hâ. ǁÎb ge a ǃanu Elo tsîb ge sadu ǁorena ǀûba du tide. ǁÎb ge mâǃoa-aona tani tide 20 tsî ǁîba ǁnāxū tsî du ga ǃhao eloga a ǃoaba, ob ge mâǃoa tsî nî ǁkhara du. ǁÎb ge ǂgurob ge sadu ǃoagu ǃgâi i xawe nî hîkākā du.” 21 On ge khoena Josuab ǃoa ge mî: “Tātse, sida ge ǃKhūba nî ǃoaba.”
22 Ob ge Josuaba ǁîn ǃoa ge mî: “Sadu ge sadu ǂûdu ǃoagu a ǃkhō-amao, ǃKhūba du ge ǁîba nî ǃoabase ǁhûiǂui ǃkhaisa.”
“Ā, sida ge a ǃkhō-amao” tin ge ǁîna ge ǃeream.
23 Ob ge Josuaba ge mî: “O ǁnâi ǃhao elogu hîa du ūhâga aoxū, î ǃKhūb, Israeli di Eloba ǂgomǂgomsase hâba.”
24 On ge khoena Josuab ǃoa ge mî: “Sida ge ǃKhūb, sida Eloba nî ǃoaba. ǁÎb mîmāde da ge nî ǁnâuǀnam.” 25 Josuab ge ǁnātsē ǁaesa ǃgaeǀhaosa dība tsî ǁîna ǁnāpa Sexems tawa ǂhanugu tsî ǂnûiǂgādi hîan nî saona ge mā. 26 Josuab ge ǁnā mîmāde Elob ǂhanub di ǂkhanis ǃnâ ge xoamâi. Tsîb ge kai ǀuisa ū tsî ǁîsa aikehais ǃKhūb ommi tawa mâs ǃgao ǂgōse ge mâi. 27 ǁÎb ge hoaraga khoena ǃoa ge mî: “Nē ǀuis ge nî sada di ǃkhō-am. ǁÎs ge ǃKhūb ge sada ǃoa a mî xūn hoana ge ǁnâu. ǁÎs ge sadu ǃoagu nî ǃkhō-am î du tā Eloba mâǃoa.” 28 ǁNās khaoǃgâb ge Josuaba ǁaesa ge ǃgû kai tsî i ge mâ-i hoa-e ǁî-i ǃhūǀkharib ǁga ge oa.
Josuab tsî Eleasari tsîkha di ǁōb
29 ǁNās khaoǃgâb ǃKhūb di ǃgāb Josuab, Nunni ôaba ǀguikaidisi tsî disi kurixab a hîa ge ǁō. 30 On ge ǁîba ǁîb di ǃhūb ǂûb ǃnâ Timnat-Seras, Efraimmi di ǃnâuxa ǃhūb ǃnâ Gaasǃhommi di ǀapasǀkhāb ai ǂnôas tawa ge ǁkhō.
31 Josuab ûiǁaeb hoaban ge Israelǁîna ǃKhūba gere ǃoaba, tsîn ge ǁîb ge ǁōs khaoǃgâs tsîna ǁnā ǂgaeǂgui-aogu, ǃKhūb ge Israela a dība xūn hoana ge aitsama mû khoegu a ûitsamas kōse ǁnās ǀkha gere aiǃgû.
32 Josefi di soros, Israelǁîn ge Egipteba xu a ǀkhī-ūs ge Sexems ǃnâ, Jakob ge Sexemmi di îb Hamori ôaga xu ǀguikaidisi ǀhaiǀuri maridi ama ǁama hâ i ǃhūǃâs ǃnâ ge ǁkhōhe. ǁNā ǃhūǃâsan ge Josefi ôana ge ǀumi hâ i.
33 Aronni ôab Eleasari ge ǁō tsî Gibeas, Efraimmi ǃnâuxa ǃhūb ǃnâ ǂnôas, ǁîb ôab Pinehasi ge māhe hâ is tawa ge ǁkhōhe.
© Khoekhoegowab Elobmîs © Bible Society in Namibia, 2020.
