Jesub ǃnâ-u ǀguits ge ǁGûb tawa a sī ǁkhā
1 Ob ge Jesuba ǁîb ǁkhāǁkhāsabegu* ǃoa ge mî: “Tā ǂhansen! Elob ǃnâ ǂgom, î ǁkhāti tita ǃnâ ǂgom. 2 Ti Îb di ommi ǃnâ di ge ǂgui ǃnā-omde hâ tsî ta ge ra ǃgû, sago ta hâǃkhai-e nî ǂhomibase. ǁNāti i ga ī tama hâ io, o ta ge ǃgāsase ga mîba go hâ. 3 Tsî hâǃkhai-e ta ga ǂhomitoa, o ta ge ǁkhawa oahā tsî tita tawa nî ūsī go, î go tita hâpa sago tsîna hâ. 4 Mâǀî ta ra ǃgû ǃkhaisa go a ǂans ǁkhās khami go ge daob tsîna a ǂan.”
5 Ob ge Tomaba ge mî: “ǃKhūtse ǀū ge ge a, mâǀîts ra ǃgû ǃkhaisa; mâti ge daoba a ǂan ǁkhā?”
6 Ob ge Jesuba ǁîb ǃoa ge mî: “Tita ge daota, amata tsî ûita. Khoe-i xare-i ge ǁGûb tawa a sī ǁoa, tita ǃnâ-u-i ga sī tama io. 7 Tita a tari ǃkhaisa go ga ǂan hâ io, o go ge ti Îb tsîna ǁkhāti ga ǂan hâ. Xawe nēsisa xu go ge ǁîba a ǂan tsî go ge ǁîba ra mû.”
8 Ob ge Filipuba ge mî: “ǃKhūtse, sa Îba ǁgau ge re, o-i ge ǂâu hâ.”
9 Ob ge Jesuba ge ǃeream bi: “Filiputse, nētikō ǂomxa ǁaeba ta sago ǀkha hâ xawets a ǀū te? Tita ra mû-i kom ti Îba ra mûo. Mâtits ǁnâi ‘Sa Îba ǁgau ge re’ ti ra mî? 10 ǂGom tamats hâ, tita ti Îb ǃnâ hâ tsîb ti Îba tita ǃnâ hâ ǃkhaisa? Mîdi tita ra ǃhoade ta kom tita xu ǃhoa tamao, xawe ti Îb tita ǃnâ ǁan hâb ge tita ǃnâ-u ǁîb sîsenga ra dī. 11 ǂGom te re, tita ti Îb ǃnâ hâ tsîb ti Îba tita ǃnâ hâ ǃkhaisa tsî ǁnā tamas ka io ti sîsengu ǃaroma ǂgom te re. 12 Amase ta ra mîba go: Tita ǃnâ ga ǂgom-i, ǁnā-i ge ǁkhāti tita ra dī sîsenga nî dī tsî-i ge ǁkhāti ǁîgu ǃgâ-ai kaiga nî dī, tita ti Îb ǃoa ra ǃgû xui-ao. 13 Ti ǀons ǃnâ go ga ǂgan xū-i hoa-e ta ge nî dī, ǁGûb nî ǀGôab ǃnâ ǂkhaiǂkhaihese. 14 Xū-e go ga ti ǀons ǃnâ ǂgan, o ta ge tita ǁî-e nî dī.
ǃAnu Gagab di mîmâis
15 “Tita go ga ǀnam, o go ge ti mîmāde nî ǃkhōǀgaipe. 16 O ta ge ti Îba nî ǂgan tsîb ge ǀnî ǁKhaeǂgao-aoba nî mā go, ǀamos kōse sago ǀkha nî hâhâba. 17 ǁNāb ge Gagab amab dib, ǃhūbaib ǁîbab mû tsî ǂan tama amaga ǃkhōǃoa ǁoaba. Xawe go ge sago a ǂan bi, sago tawab hâ tsîb nî sago ǃnâ hâhâ xui-ao.
18 “Tita ge ǃguniǀgôase ǃgoro go tide tsî ta ge ǁkhawa sago ǃoa nî hā. 19 ǂKhari ǁaero-i ǀgui-i, ob ge ǃhūbaiba ǃaruǀî mû te tide, xawe go ge sago nî mû te, tita ûi hâ tsî go sago tsîna nî ûi xui-ao. 20 ǁNā tsēs ai go ge nî mûǂan, tita ti Îb ǃnâ tsî sago tita ǃnâ tsî tita sago ǃnâ hâ ǃkhaisa.
21 “Ti mîmāde ūhâ tsî ga ǁîde ǃkhōǀgaipe-i ge tita a ǀnam-e tsî tita ga ǀnam-i ge ti Îb xa nî ǀnamhe-e tsî tita ge ǁî-e ǀnam tsî nî ǂhaiǂhaisenba.”
22 Ob ge Judab (Iskariotǁî tamab) ǁkhāǁkhāsabegu di ǀguiba ǁîb ǃoa ge mî: “ǃKhūtse, tare-i ǃaromats sige nî ǂhaiǂhaisenba tsî hoaraga ǃhūbaiba ǂhaiǂhaisenba tide?”
23 Ob ge Jesuba ge ǃeream: “Khoe-i ga tita ǀnamo, o-i ge ti ǁkhāǁkhāsa nî ǃkhōǀgaipe. Tsî ti Îb ge ǁî-e nî ǀnam tsî khom ge sikhoma ǁî-i ǃoa sī tsî ǁî-i tawa ǁanǃkhai-e nî dībasen. 24 Xawe tita ǀnam tama-i, ǁnā-i ge ti ǁkhāǁkhāsa ǃkhōǀgaipe tama hâ. Tsî mîs ǁnâu go ras ge ti tama tsîs ge ǁGûb tita ge sîb di.
25 “Tita ge nēna sago ge mîba ganupe ta sago tawa hâ hîa. 26 Xawe ǁKhaeǂgao-aob, ǃAnu Gagab, ti Îb nî ti ǀons ǃnâ sîb ge hoa xūna ǁkhāǁkhā go tsî tita ge sago mîban hoan xa nî ǂâiǂâiǃnâ go.
27 “ǂKhîba ta ra ǃgoroba go, ti ǂkhîba ta ra mā go. ǃHūbaib ra mā khami ta tita sago mā tama. Xuige ab ǂgaob âgo tā ǃhuri, îb tā ǃao. 28 Sago ge go ǁnâu tita goro mîba gona: ‘Tita ge ǃgû tsî ǁkhawa sago ǃoa nî oahā.’ Tita go ga ǀnam, o go ge ti Îb ǁga ta ra ǃgû ǃkhais xa ga ǃgâiaǂgao hâ, ǁîb tita xa a kai xui-ao. 29 Tita ge nēsa sago ǃgû ta nîs aiǃâ ra mîba, î go ǃkhais ga īo, tita ǃnâ ǂgom. 30 ǃAruǀî ta ǂguina sago ǀkha ǃhoa tide, nē ǃhūbaib di danaǂgaeǂgui-aob ǃgoaxa xui-ao. ǁÎb ge ǀguis khami ī ǀgai-i tsîna tita ai ūhâ tama hâ, 31 xaweb ge ǃhūbaiba nî ǂan tita ti Îba a ǀnam ǃkhaisa, ǁnās ge ǃaromas ǁîb ra mîmā khami ta ra dībasa.
“Khâi, î ge nēpa xu ǃgû.
© Khoekhoegowab Elobmîs © Bible Society in Namibia, 2020.
