Jeremiab
1 Jeremiab, Hilkiab ôab, Anatots, Benjaminni ǃhūb ǃnâ ǂnôas di pristergu ǀguib ge kēbo mîdi, 2 ǁîb ǃoas ge mîs ǃKhūb disa Josiab, Judab gao-aob, Amonni ôab ǃoa disiǃnonaǀaǁî kurib, ǁîb ǂgaeǂguis dib ǃnâ hās didi. 3 Jojakimmi, Judab gao-aob, Josiab ôab di gaosis ǁaeb ǃnâ, tsî Jerusalems khoen ge ǃkhōsis ǃnâ, disiǀguiǀaǁî kurib di koroǁî ǁkhâb, Josiab ôab, Sedekiab gaosis ǁaeb dib ǃnâ ūhes kōse.
Jeremiab ǂgaihes
4 Os ge ǃKhūb di mîsa tita ge hāba: 5 “Sa îs ǃnāb ǃnâ ta nî ǂnubi tsis aiǃâ ta ge ǀnai ge ǂan tsi i; ǃnaets nîs aiǃâ ta ge ge ǀnau tsi; tsî ta ge ǃhaodi di kēbo-aose ge ǁgaumâi tsi.”
6 O ta ge “ǃKhū Elotse tita ge a ǃhoa ǁoa, kaise ta ge a ǂkham” ti ge mî.
7 Ob ge ǃKhūba tita ǃoa ge mî: “Tā ‘ǂKham ta a’ ti mî, xawe ǁînǀî ta ra sî tsi khoen ǁga ǃgû, î mîmā tsi ta ran hoana ǁîna sī mîba. 8 Tā ǁîna ǃao, tita nî hâǀkhā tsi tsî ta nî ore tsi xuige”
tib ge ǃKhūba ra mî.9 Ob ge ǃKhūba ǃommi âba ǀhōǂui, ti amǁgaukha tsâǀkhā tsî ge mî: “Mû, ti mîdi ǁîdets nî ǃhoade ta ge sa ams ǃnâ go ǁgui. 10 Nētsē ta ge ǃhaodi ǂama tsî gaosidi ǂama ra mâi tsi, ǃhomǂui tsîts nî ǂgaeǁnâse, hîkākā tsîts nî ǂnauǁguise, ǂnubikhâi tsîts nî ǃhanase.”
ǀGam kēbora
11 ǃKhūb di mîs ge ge hāba te: “Tare-ets ra mû, Jeremiatse?”
O ta ge ge ǃeream: “Amandelǁnâu-e ta ge ra mû.”
12 Ob ge ǃKhūba “ǂHanusets ge go mû. Tita ge ti mîsa ǂkhaikari hâba tsî ǁîsa nî dī” ti ge mî.
13 ǁKhawab ge ǃKhūba ge dî te: “Tare-i tsînats ra mû?”
O ta ge “ǀGû ra sū-e ta ge ǀapasǀkhāb ai ra mû, nē ǀkhāb ǁgas ais â-e hâ-e” ti ge ǃeream.
14 Ob ge ǃKhūba “ǀApasa xub ge ǂkhababa nî hā, ǃhūb di ǁanǂgāsaben ai, 15 hoa gaosidi di ǁaedi ǀapas dide ta ra ǂgaikhâi xui-ao. ǁÎn di gao-aogu ge ǁîgu tronde Jerusalems di ǂgâ-amdi tawa, tsî ǁkhāti ǂnubiǂgoagu ǃās digu ǂnamipe tsî hoaraga ǃādi Judab didi tawa nî ǂnubikhâi. 16 Tsî ta ge ti ǀgoraǃgâde ǁîn ǃoagu nî gowaǂui, ǁîn di ǂkhabasib hoab ǃaroma; tita ǁnāxū tsîn ǀkhara eloga ge ǀanǀanba, tsî ǁîn ǂhunuma ǃomgu di sîsengu aiǃâ ǃhonǁgoa amaga. 17 ǃGae sa kamanaba, î ǂhomisen îts tita nî mîmā tsi hoaraga xūna ǁîna mîba. Tā ǁîna ǃao, î ta tā satsa ǁîn aiǃâ ǃaoǃao. 18-19 Mû, tita ge satsa nētsē omǂnamisa ǃāse ra dī, ǀuriǂkhâǃnâse tsî bronsǂnubiǂgoase, hoaraga ǃhūb ai. Hoaraga gao-aogu Judab digu, ǂgaeǂgui-aogu, pristergu tsî hoaraga ǁaes ǃhūb dis ǃoagu. ǁÎn ge sa ǃoagu nî ǃkham xawen ge dan tsi tide. Tita ge hâǀkhā tsi tsî ta ge nî huiǂui tsi”
tib ge ǃKhūba ra mî.© Khoekhoegowab Elobmîs © Bible Society in Namibia, 2020.
