Sirax 19 - Khoekhoegowab New Translation 2020 (KKG20)

1 ǁNāsats ga dī, ots ge ǂkhari xūn aits ga ǂâisa ǂnûi tama io tātsēs tsîna ǃkhū tide tsîts ge aitsama nî hîkākāsen. 2 ǂAuxûi-i tsî tarekhoedi tsîn ge gā-ai khoeba ra ǂgaeǂhapu. ǀAi-aodi ǁga ra ǃgû khoeb ge aiǃâb ǃoa ǀgui ra ǁgauoǃnâ 3 tsî ǁîb di ǁaetama-isib ge ǁîb di ûiba nî ǂoaǃnâ kai bi. ǂUnigu ge ǁîb di ǁgao hâ sorosa nî ǂû.

4 ǃHaese khoena ǂgomǃgâs ge gâresib ase ī. ǁOrets ka, ots ge aitsama ra tsûtsûsen. 5 ǂKhabasib ga ǃgâiaǂgao kai tsi xawets ge nî ǀgoraǃgâhe.

Xorexūsa ǃhoa-ain

6 ǀHoeǃhoa-aina ǂgōxū, ots ge ǂgui ǃgomsiga xu nî ǂoa. 7 Tā ǀhoeǂhôana aiǃâ ǃgû-ū, ots ge ǃhausen tide. 8 Tā sa ǀhōsan tamas ka io sa khākhoena tsū xūna ǃhoaba. ǁNā xū-e ūhâbasens ga sa ǃaroma ǁorese īo, o tā ǁî-e ūhâbasen. 9 Khoen hîa satsa ra ǁnâun ge ǁnāsa nî ǃgaoǃgâ tsî ega nî ǁkhan tsi. 10 ǀHaeǂhôa-ets ga ǁnâu, o tā ǁî-e khoraǂui. Nē ǀhaeǂhôa-i ǂari kai tsi tide, xuige ǃgâiaǂgao. 11 Gâ khoe-i hîa ǂganǃgâsiba sâusa ra dītsâ-i ge ǁoratsûb ǃnâ hâ taras khami ra tsâ. 12 ǂGanǃgâsi-eb ga ǁnâu, o i ge ǁnā-e ǁîb ǀnūb ǃnâ ra ǃkhā ǂā-i ase ī.

13 ǀHōsa-i ga tsū xū-e dī, o ǁî-e ǁnā xū-i xa dî. ǀNîsis tsîna ama tama. Tsî i ga ama, o i ge ǁkhawa dī tide. 14 ǀGūkhoe-i go mî ǁoa i a xū-e mî ǃkhaisats ga ǁnâu, o ǁî-e ǁnā ǃkhais xa dî. ǀNîsi i ge mî tama hâ. Tsî i ga mî hâ, o i ge ǁkhawa mî tide. 15 ǂKhaba xū-ets ga sa ǀhōsab xa ǁnâu, o ǁnās xa ǁîba dî. ǀNîsi ǂhumis ǀguisa ī. Tā ǁnâuts ra xū-i hoa-e ǂgom. 16 Khoe-i ge ǁaetamase xū-e ra mî, xawe amabes ǃnâ tsūse ǂâibasen tama hâ. Mâ khoe-i hoa-i ge nē ǀgaub ai nēsi tamas ka i, xawe ǀnî ǁaeb ǃnâ ge ǁore. 17 Sa ǀgūkhoeb ǀkha ra ǁaixa kai tsi xū-ets ga ǁnâu, o ǁîbats nî ǁgoaǂuis aiǃâ dî bi. Hoan xa ǀGapib di ǂhanub di ǃomǁae ǁnāsa ǁnāxū.

Ama Gā-aisiba mûǂans

20 ǃKhūba ǃao, î ǂhanuba ǃkhōǀgaipe; ǁnāb ge a gā-aisi. 22 Sats ge mâ xū-i ǂkhabasib xa ra ǃgû-i hoa-e a ǂan ǁkhā, xawes ge ǁnāsa gā-ai kai tsi tama hâ. ǁNâuǃāxa tama i ge hâ, ǁore-aon di ǀapemāsa saosa. 23 ǂKhaba ǂâibasendi ǃaroma gā-aisiba sîsenūs īǁkhāsib ge hâ, xawe ǀnîn ge gâ khoen khami ra tanisen, ǁnâuǃāxa taman hâ amaga. 24 Eloǃaoǃgâxa khoe-i ge kaise iga gā-ai tama i, xawe ǁore-aon di gā-ai-i ǃgâ-ai a ǃgâi. 25 Īǁkhā i ge a ǂoaǂamsase gā-ai tsîts ganupe ǁnâuǀnamoǃnâ ǁkhā ǃkhaisa tamas ka iots ǃgâisiba khoena ǀhôagaoǃnâ tsîts sats ǂhâba hâ-e nî hōga sîsenū ǁkhā.

26 ǀNî ǂkhaba khoen ge ǃoa ra khami ra dīsen, xawen ge sats ǀguitsa ra ǀhôagaoǃnâ ǂgao. 27 ǁÎn ge aidi âna daba tsî ǁnâu tama khami nî dīsen, xawen ge ǃâubasen tamats hâ ǁaeb ai satsa nî ǂnûǃnâ. 28 Nē khoe-i ge nēsi a ǁore ǁoa, xawe i ge ǁaeb go nēsi ǂhanu ti i ga ǂâi, o nî ǁore. 29 Khoebats ge ǁîb di īsib ai ǂan ǁkhā. ǂGuro ǃnās ǁîb ǁgats ra kōs aits ge ǃgâi ǂūxa a ti mî ǁkhā. 30 ǁÎb di ǂūb ge sara-anab, âiǀgaub tsî ǃgûǀgaub ǃnâ ra ǁgausen.