Sirax 34 - Khoekhoegowab New Translation 2020 (KKG20)

ǁHapodi ge harebeoǃnâ

1 Gâ khoen ge hūgas tsîna ī tide xūna ra ǃâubasen tsî ǁnā ǀgaub ai aitsama ra gāsen. 2 ǁHapodi ǃnâ i ra mû xūn a ama ti ra ǂâi khoe-i ge somma ǃkhōsa ra dītsâ tamas ka io ǂoaba ra saru khoe-i khami ī. 3 ǁHapo-i ǃnâts ra mû xū-i ge sa ais hîats mûsenǃnâxūs ǃnâ ra mûs ǃgâ-ai ama tama hâ. 4 ǃAnu xū-i ge ǀurisa xū-e xu a hā ǁoa, tsî ama a xū-i ge ama tama-e xu a hā ǁoa. 5 Hōǃâdi, aimûǀgarudi tsî ǁhapodi tsîn ge a harebeoǃnâ. ǁÎdi ǃnâts ge mû ǂgaots hâ xū-i ǀgui-e ra mû. 6 Hoan xa ǀGapib xats ga ǁhaposa sîbahe tama i, o tā ǂâisa ǂnûi-ai. 7 ǁHapodi ge ǂgui khoena ge ǂgaeǂhapu; ǁîn ge ǁhapodi ǃnân ge ǂgom xui-ao ge hîkākāhe. 8 ǁHapodi ai ǂgomǃgâs xab ge Elob di ǂhanuba huib ǃaroma a ǁnâuǀnamhe ǁkhā. Gā-aisib, ǂhanu-ai khoen xa ra ǃhoaheb ge a ǀoasa.

ǃNarimadi ge gā-ai kai tsi ǁkhā

9 Kaise ǂgui ǃkhaidi ai ǃnarima hâ khoe-i ge ǂgui xūna a ǂan tsî ǁî-i di hōǃâsa xu ǁnâuǃāxase a ǃhoa ǁkhā. 10 ǀOro hōǃâsats ga ūhâ, ots ge ǂgui xūna ǂan tama hâ, xawe ǃnarimas ge gā-ai kai tsi ǁkhā. 11 Ti ǃnarimadi ǂûdi ǃnâ ta ge ǂgui xūna mû tsî mîdi ǃnâ ta mî ǁoas kōse ge ǁkhāǁkhāsen 12 ǂGui ǃnāde ta ge ǁōb di ǃaorosasib ǃnâ ge hâ i, xawe ta ge mâ ǃnās hoasa, ǃgû-ī ge hōǃâdi ai mûmâinǃgâ hâse gere ûiǂoa.

ǃKhūba ǃaoǃgâ

13 ǃKhūba ra ǃaoǃgân ge ǁîb hîa ǁîna nî oreb ǃnân ǂgom hâ amaga nî ûi. 14 ǃKhūbats ga ǃgôasiba mā, ots ge ǃKhūb ǃnâts ǂgom hâ tsî xū-i xare-e ǃao tama xui-ao, ǂgomǃgâs ǃnâ sa ûiba ûi ǁkhā. 15 ǃKhūba ǃgôasiba ra mā khoen ge a ǃgâiǃgâ; ǁîn ge ǃKhūb ǃoa huib ǃaroma a kō ǁkhā. 16 ǃKhūb ge sadu hîa ǁîba ǀnamdo ǃûi hâ; ǁîb ge sado sâu tsî ǁîb di ǀgaib ǀkha ra ǂkhâǃnâ. ǁÎb ge ǀgamsa ǂoaba xu nî sâu du tsî somma sores ga kaise ǀgamsa, o nî mā du. ǁÎb ge ǁkhāti ǃnôa tamas ka io ǁnā du nîsa xu nî ǃûi du. 17 ǁÎn di mûdi ge ǁîb ra mā ǃgâiaǂgaob xa nî ǂkhai. ǁÎb ge ǁîna ûib tsî ǂurusib ǀkha ra ǀkhae.

ǁGuibade mās

18 ǂHanuoǃnâsets hō hâ ûitsama xū-ets ga ǁguiba-i ase mā, o i ge ǀurisa tsî a ǃkhōǃoaheǁoasa. 19 ǃKhūb, Hoan xa ǀGapib ge ǁîba ǀgoreǀî tamas ka io ǁîb ǂhanuba ǃkhōǀgaipe tama khoen xab ra māhe ǁguiban ǀkha ǂkhî tama hâ. Mâtikō ǁguibaden nē khoena ra mā ǃkhais ge ǃgôa tama hâ, ǃKhūb ge ǁîna ǁoren âna ǀûba tide. 20 Ûitsama xū-e ǀgâsa khoe-e xu ǃnari tsî ǁguiba-i ase mā i ge ǁgûb ra mûse ǀgôaba ra ǃgam khoe-i khami ī. 21 ǂÛ-i ge ûib ase ǀgâsa khoena ība tsîts ga ǁî-e ǁîna xu ūbē, os ge ǁnāsa ǁîna ǃgams ǁkhās khami ī. 22 Khoe-i xūts ga ûi i nîga i ǂhâba hâ xū-e ūbē tamas ka iots ga satsa ra sîsenba khoe-e matare ǂgao tama i, os ge ǁnāsa ǁî-e ǃgams khami ī.

23 ǀGui-i ra omkhâi hîa i ga nau-e khôaǁnâ, o ǀgaisa sîsenni ǀkha tare-e go sīǃnâhe? 24 ǀGui khoe-i ga ǀkhae tsî nau-i ga ǀâxare, o mâ-eb ǃKhūba nî ǃgâ. 25 ǁŌ hâ sorosa tsâǀkhās xats ga ǃanuoǃnâ tsî ǁnās ǃaroma sī ǁāsen, xawets ga ǁkhawa sī tsâǀkhāo, o ǁāsensa tare-es ra hui? 26 ǂÂis ǀguisa hî re, ǂûtama* hâs ǀkhats ga ǃoatsâsiba sa ǁoren ǃaroma ǁgau tsî ǁkhawa ǁkhā ǁorena dīo, ǂûtama* hâs ǀkha tarets ge hōbasen? ǃKhūba sa ǀgorede ǁnâu-ammi nî?