ǂHaiǂhais 3 - Khoekhoegowab New Translation 2020 (KKG20)

Sardis kerkheb ǃoa hâ sîǂkhanis

1 “Sardis ǃnâ hâ kerkheb di ǀhomǃgāb ǃnâ-u nēti xoa re:

“Nēs ge ǁnāb hîa Elob di hû gagagu tsî hû ǀgamirode ūhâba xu hâ ǂhôasa. Sadu sîsenga ta ge a ǂan; ûitsama ti du ra ǂgaihe xawe du ǁō hâ ǃkhaisa! 2 ǂKhai, î ūts hâ-e ǀgaiǀgai, hoaragase i nî ǁōs aiǃâ. Ti Elob aiǃâ ta sa sîsenga dīǀoaǀoasase hō tama xui-ao. 3 ǂÂihō re ǁnâi, ǃkhōǃoats gen tsî ǁnâuts gena ǁîna sâubasen, î ǃhobasen. ǂKhai tamats ka io, o ta ge ǃnari-aob khami nî hā tsîts ge iri hāǂam tsi ta nîba ǂan tide. 4 Xawe di ge noxopa ǀoro ǀonde Sardis ǃnâ hâ, saran âna ǀuriǀuri tama khoena. ǁÎn ge tita ǀkha ǃuri sarana ǂgaeǂgā hâse nî ǃgû, ǁîn ǁnāsa a anu amaga. 5 Dan ra-i ge ǁnāti ī ǃuri sarana nî ǂgaeǂgāhe tsî ta ge tātsēs tsîna ǁî-i di ǀonsa ûib di ǂkhanisa xu ǀariǂui tide. Tsî ta ge ti Îb tsî ǁîb di ǀhomǃgān aiǃâ ǁîn a ti ǃkhaisa nî ǂanǃgâ. 6 ǂGaera ūhâ-e, a-i ǁnâu Gagab ra kerkhegu ǃoa mîna!

Filadelfias di kerkheb ǃoa hâ sîǂkhanis

7 “Filadelfias ǃnâ hâ kerkheb di ǀhomǃgāb ǃoa nēti xoa re:

“Nēs ge ǂhôas, ǁNāb ǃanu tsî a amaba xu hâsa. ǁÎb ge Davidi ǁkhowa-amma ūhâ, ǁîb ga dao-am-e ǁkhowa-am, o i khoe-i xare-i ǁî-e nî ǂganam-e ǀkhai, tsîb ga ǂganam, o i khoe-i xare-e a ǁkhowa-am ǁoa. 8 Sa sîsenga ta ge ǂan. Mû tita ge sa aiǃâ dao-am-e ǁkhowa-am hâ, khoe-i xare-i xa ǂganamhe ǁoa-e; ǂAn ta ge a ǂkhari ǀgairobats ūhâ ǃkhaisa, xawets ge ti mîsa ǃkhōǀgara tsî ti ǀonsa ǀūxū tama ge i. 9 Mû, tita ge ǁnān Satanni* din, Jodeǁî taman* hâ hîa ǁîn a ti ra ǂhumina, hā tsîn nî sa ǂai-am ǃhonse nî dī. ǁÎn ge nî mûǂan tita ǀnam tsi ǃkhaisa. 10 Ti mîs, ǃnūǃnâxase mâǃkharus disats go ǃkhōǀgara xui-ao ta ge ǁnā iri ǃâitsâb dib hîa hoaraga ǃhūbaib ai nî hāba xu satsa nî sâu, ǃhūbaib ai ǁan hân nî ǃâitsâhese. 11 Tita ge ǃhaese nî hā, ūts hâ-e ǃkhōǀgara, î-i khoe-i xare-e tā sa kronsa ūǀhana tsi. 12 Dan ra-e ta ge ti Elob di Tempeli ǃnâ ǂkhâǃnâhaise nî dī; tsî-i ge ǁî-e tātsēs tsîna ǁnāpa xu ǂoa tide. ǁÎ-i ai ta ge tita ti Elob di ǀons tsî ti Elob di ǃās di ǀons tsîra nî xoa, ǀasa Jerusalems ti Eloba xu tsî ǀhomma xu ra hās tsî ǁkhāti ti ǂhunuma ǀasa ǀons tsîna. 13 ǂGaera ūhâ-e, a-i ǁnâu Gagab ra kerkhegu ǃoa mîna!

Laodiseas di kerkheba ǃoa hâ sîǂkhanis

14 “Laodiseas ǃnâ hâ kerkheb di ǀhomǃgāb ǃnâ-u nēti xoa re:

“Nēs ge ǂhôas, tita Amenta, ǂgomǂgomsa tsî ama ǃkhō-amaota, ǃhūbaib di tsoatsoata, Elob ge ǂnubi xūn dita xu hâsa. 15 Sa sîsenga ta ge a ǂan, ǃkhai tamas ka iots ǀgamsa tama ǃkhaisa. Îts ga ǃkhai tamas ka io ǀgamsa hâ! 16 Xawets ge ǂoposa tsî ǃkhai tamas ka io ǀgamsa tama hâ tsî ta ge ti amǃnâsa xu nî ǀkhabuǂui tsi. 17 Sats ge ‘ǃKhū ta hâ tsî ta ǂhâba ta hâ xū-i hoa-e ūhâ’ ti ra mî. Xawets ge mâtikōsets tsūǀkhāxa, ǀkhomǀkhomsa, ǀgâsa, ǀōǀkhā tsî a ǂgī ǃkhaisa ǀū. 18 ǁNā-amaga ta ge ra ǀapemā tsi, tita tawats ǃhuniǀurib hîa ǀaes ǀkha ǃanuǃanuhe hâba nî ǁama ǃkhaisa, ǃkhūts nîga. ǁKhātits nî ǃuri sarana ǁama tsî sa taotaosa ǀōǀkhāsiba ana-ai ǃkhaisa. ǁKhāti ǁama re, mûdi âtsats nî ǂkhau-ū ǁnui-e, mû ǁkhāts nîse. 19 ǀNam ta ana ta ge ǂgōǀau tsî ra ǁkhara, ǁnā-amaga ôasa, î ǃhobasen re. 20 Mû tita ge dao-ams tawa mâ tsî ra ǃgubu-am; khoe-i ga ti domma ǁnâu tsî dao-amsa ǁkhowa-am, o ta ge ǁî-i tawa ǂgâ tsî ǁî-i ǀkha nî ǂû tsî ǁî-e tita ǀkha. 21 Dan ra-e ta ge tita ǀkha ti trons ai ǂnûs di ǂhanuba nî mā, tita ǂûta tsîn ge dan tsî ti Îb ǀkha ǁîb trons ai ǂnûs ǁkhās khami. 22 ǂGaera ūhâ-e, a-i ǁnâu Gagab ra kerkhegu ǃoa mîna!”