ǀGamaixasib ǃoagu hâ ǃkhâikhoms
(Mateub 10:26-27)1 ǀOadisidi khoen ǂnubis ge ge ǀhao, dāǃgâgun geres kōse. Ob ge Jesuba aibe ǁkhāǁkhāsabegu* âb ǃoa ge mî: “ǂAnbasen Farisegu* khūkhū-i khami īgu xa, ǁnāb ge ǀgamaixasiba. 2 ǂGanǃgâsase hâ xū-i hîa ǂhaiǂhaihe tide-i kom hâ tamao tsî nawasase hâ xū-i hîa ǂanhe tide-i kom hâ tamao. 3 ǁNā-amaga ǃkhaenab ǃnâ go ga mîn hoan ge ǃnâb ǃnâ nî ǁnâuhe tsî ǂganamsa omdi ǃnâ goro tupuhen ge omǂamǃnâga xu nî aoǁnâhe.
Tari-i nî ǃaohe ǃkhais
(Mateub 10:28-31)4 “Mîba du ta ge ra ti khoedo: Tā sorosa ǃgam ǁkhā xawe ǃaruǀî xū-e a dī ǁoana ǃao. 5 Tita xa du ge nî mîbahe tari-e du nî ǃaosa: ǃKhūba ǃao, ǁîb hîa ǁōts kas khaoǃgâ ǀamoǀaeb ǃnâ aoǂgā tsis ǁkhāsiba ūhâba. ǂGom te, ǁîba du ge nî ǃao!
6 “Koro ǀhomanirode kha ǀgam marirora ai ǁamaxūhe tama hâ? Tsî ǁîn di ǀgui-i tsîn ge Elob xa ǀuruhe tama hâ. 7 Sago danas ai mâ ǀûn tsîn ge a ǃgôatoasa. ǁNā-amaga tā ǃao; sago ge ǂgui ǀhomaniron xa ǃnāsase a ama-ai.
Xristuba* ǁguiǁnâ tsî ǂharas
(Mateub 10:32-33Mateub 12:32Mateub 10:19-20)8 “Mîba du ta ra: Tita ga ǂhaisase khoen aiǃâ ǂan-i hoa-eb ge Khoen Ôaba ǁkhāti ǂhaisase Elob ǀhomǃgāgu aiǃâ nî ǂan. 9 Xawe khoen aiǃâ ga tita ǀūxū-i ge Elob ǀhomǃgāgu aiǃâ nî ǀūxūhe-e.
10 “Mâ-i hoa-i Khoen ôab ǃoagu ga tsū xū-e mî-i ge a ǀûbahe ǁkhā, xawe ǃAnu Gagaba ga ǃkhāǃkhā-i ge ǀûbahe tide.
11 “Sinagogegu* tamas ka io danaǂgaeǂgui-aogu tamas ka io ǁkhāsigu tsîn aiǃâ gu ga sī-ū duo, tā ǂâiǂhansen mâti tsî mâ xū-e du nî ǃeream tamas ka io mî ǃkhaisa. 12 ǃAnu Gagab ge ǁnā ǁaeb ǁkhāb ai nî ǁkhāǁkhā du, tare-e du nî mîsa.”
ǃKhū hâ gâreb di ǂkhōs*
13 O-i ge khoe-e ǂnubisa xu Jesuba ǃoa ge mî: “ǁKhāǁkhā-aotse, ti ǃgâsaba mîba, îb ǀumisa tita ǀkha ǀgoragu re.”
14 Ob ge Jesuba ge ǃeream bi: “Tari-e tita ǀgoraǃgâ-aose tsî ǀgora-aose sakho ǂama ge mâi?” 15 Tsîb ge hoan ǃoa ge mî: “ǂAn, î du xūǃgunuxasiba xu ǃûisen, khoe-i di ûib ǃnāǂamsasib ū-i hâ xūn diba xu hâ tama xuige.”
16 Tsîb ge Jesuba ǁîna ǂkhō-e ge ǁgamba: “ǃKhū hâ khoeb di ǃhanab ge ǃgâise ge ǂûtani. 17 Ob ge ǁîb ǃnâ ge ǂâitsoatsoa ‘Tare-e ta nî dī? Ti ǂûna ta nî ǀhaoǀhaoǃnâ ǃkhai-e ta kom ūhâ tamao. 18 Nēti ta ge nî dī, tib ge ǁîb ǃnâ ge mîǀgui: Tita ge ti ǃhorosâuǃnâ-omga khôaǁnâ tsî ǁîgu ǃgâ-ai kai omga nî kuru. ǁÎgu ǃnâ ta ge ǃhorob tsî nau xūn hoana nî sâu. 19 O ta ge aitsama a mîbasen ǁkhā: ǃGâiǃgâxa khoetse, ǂgui ǃgâi xūnats ge sâubasen hâ, ǂgui kurigu ǃaroma. Tā ǁnātikōse ǂâiǂhansen, î ǂû, ā tsî ǃgâiaǂgao.’ 20 Xaweb ge Eloba ǁîb ǃoa ge mî: ‘Sa gâretse. Nē tsuxub ǂûb ǃnâts ge ǀoms âtsa nî ǂgaoǀkhāhe tsî nēts ǀhaoǀhao hân hoana nî tari-i di?’ ”
21 Tsîb ge Jesuba nēti ge ǀamǀam: “ǁNāti i ge ǃkhūsiba ra ǁî-i ǃaroma ǀhaoǀhaobasen, xawe Elob ǃnâ ǃkhū tama-i ǀkha nî ī.”
Eloba ǂgomǃgâs
(Mateub 6:25-34)22 Ob ge Jesuba ǁkhāǁkhāsabegu âb ǃoa ge mî: “ǁNā-amaga ta ra mîba go: Tā sago ûib xa, tamas ka io tare-e go nî ǂû tamas ka io ās tsî tare-e go nî anas tsîn xa ǂâiǂhansen. 23 Ûib kom ǂû-i xa a ǂhâǂhâsao tsî sorosa saran xa. 24 Goragu ǁga kō re; ǁîgu ge ǃkhomna tsoro, ǃgao tamas ka io ǀhaoǀhao tama hâ; xawe gu ge Elob xa ra ǂûmāhe ǃhorosâuǃnâ-om-i xare-e gu ūhâ tama hîa. Sado kha ǀhomaniron xa ǃnāsase ǂhâǂhâsa tama hâ? 25 Sa ǂhansendi hoade sa ûiǁaeba ǀaroǃnâ ǁkhā di a? 26 ǁNāti ī ǂkhari xūro-i tsîna du ga dī ǁoa, o tare-i ǃaroma du naun xa ra ǂhansen? 27 ǃAub di ǃkhārona kō re, mâtin ra ǀomkhâisa. ǁÎn ge sîsen tsî ǁkhāti sarana ǂombasen tama. Xawe ta ra mîba du, Salomob tsîn ge ǁîb di ǂkhaisib hoab ǃnâ ǀgui-i nē ǃkhāron di-i îsase anahe hâ khami ana tama hâ isa. 28 Tsî Elob ga ǃaub di ǀgâna ǁnāti îsase a anao, nētsē hâ tsî ǁari ǀkhai tsî ǀaes ǃnâ ra aoǂgāhena, mâtikō ǃnāsaseb ǁîba sado a dība ǁkhā. Tare xū-i ǃaroma du ǁnātikōse a ǂkhariǂgomxa?
29 “Tā hoaǁae tare-e du nî ǂû tsî ās xa ǂâiǂhansen. 30 ǀŪben nē ǃhūbaib din ǀguin ge hoaǁae ǁnā xūn xa ra ǂâiǂhansen, xawe sadu Îb ge nēn hoana du ǂhâba hâsa a ǂan. 31 Xawe nēn hoan ǃgâ-ai Elob Gaosib ǂama ǂhansen, ob ge nēn hoana nî mā du.
ǀHommi ǃnâ hâ ǁuib
(Mateub 6:19-26)32 “Tā ǃao, ǀoro gūrodo, sadu Îb di ǂâis ge sado Gaosiba māsa. 33 Ū du hân hoana ǁamaxū, î ǀgâsana ǁnā mari-e mā. ǀOro ǁoa mariǁgarude ôabasen, î tātsēs tsîna toa tsî ǀoro tide ǁuiba ǀhommi ǃnâ ǀhaoǀhaobasen, ǃnari-ao-i tsîn xa sīǃnâhe tsî ǁgurib xas tsîna hîkākāhe tideba. 34 Sadu ǁuib hâpa, ǁnāpab kom sadu ǂgaob tsîna hâo.
ǂKhaikari hâ ǃgāgu di ǂkhōs
35 “ǂHomisen hâse hā nîse ī xū-i hoa-i ǃaroma hâ, î sadu ǃamǀaede khau rase ūhâ. 36 ǀHonkhoeba ǃgameǁâusa xub nî hās kōse ǃâu hâ ǃgān ase du ī, î du hā tsîb ga ǃgubu-am ǁaeb ǁkhāb ai ǁkhowa-amba bi. 37 ǀKhaehen ge hâ ǁnā ǃgān hîa ǀhonkhoeb xa hāb ka o ǂkhaikari hâse nî hōhena. Amase ta ra mîba du, ǁîb ge sarab âba ǃgaekhâi, ǁîna tāb tawa ǂnû kai tsî ǁîna nî ǃoaba. 38 ǀKhaehen ge hâ ǁnā ǃgān, ǂkhaikari hâseb nî hōna, tsuxuǃgâb ǃnâs kas, ǁgoaǃaromas kas hoasab ga hāo. 39 Tsî nēsa du ge nî ǂan, ommi ǀhonkhoeb ga ǂan hâ, mâ iri aib ǃnari-aoba nî hāsa, ob ge ommi âb nî khôaǂgâhesa ga mā-am tama hâ. 40 Sadu tsîn ge ǂhomisen hâse nî hâ, mâǁaeb Khoen Ôaba nî hāsa du a ǀū xui-ao.”
ǂGomǂgomsa ǃgāb tsî ǂgomǂgomsa tama ǃgāb
(Mateub 24:45-51)41 Ob ge Petruba ge dî: “ǃKhūtse, nē ǂkhōsa sige ǀguige ais ǂâibasensa ūhâ, tamas ka io khoen hoan aisa?”
42 Tsîb ge ǃKhūba ge ǃeream: “Tariba ǁnâi ǁnā ǂgomǂgomsa tsî ǁnâuǃāxa mûǂamaob, ǀhonkhoeb xa ǂgomǃgâhe hâba, îb ǁîb ǃgān tsî ǀaokhoen tsîna ǂhanu ǁaeb ai ǁîn ǂûna mā. 43 ǀKhaeheb ge hâ ǁnā ǃgāb, ǃgâi sîsennab dī hâ hîab ǀhonkhoeb âba ra oahāba. 44 Amase ta ra mîba du, ǀhonkhoeb ge hoa xūn ǂama nî mâi bi. 45 Xawe ǃgāb ga ǁîb ǂgaob ǃnâ ‘Ti ǀhonkhoeb ge ganupe a ǀhabe’ ti mî tsî nau ǃgāna ǂnautsoatsoa, ǁîb ǂû tsî ā tsî ra ǀhoro hîa, 46 ob ge ǀhonkhoeb, ǁnā ǃgāb diba ǁîb ǃâubasen tama tsēs tsî ǀūb a iri ai nî hā. Tsîb ge ǀhonkhoeba ǃâdi ǃnâ ǃgaoǃā bi tsî ǀgui ǃâb âba ǂgomoǃnân ǀkha nî tsâ kai.
47 “ǁNā ǃgāb hîa ǀhonkhoeb âb di ǂgaoǀkhāde ǂan, tsî xawe ǂhomisen tamab tsî ǀhonkhoeb ra ǂgao khami dī tamab ge ǃgom ǁkharaba nî hō. 48 Xawe ǃgāb hîa ǀhonkhoeb tare-e ǂhâba hâ ǃkhaisa ǀūb tsî ǁkharabahe ǁkhāb a xū-e ra dīb ge supu ǁkharaba nî hō. ǃNāsase māhe hâ-i hoa-e xu-i ge ǃnāsase nî ǂgaoǀkhāhe tsî ǂguina ǂgomǃgâbahe hâ-i hoa-e xu i ge ǂguina nî ǂganhe.
Jesub ge ǀgorasa khoen ǁaegu ra hā-ū
(Mateub 10:34-36)49 “ǀAesa ta nî ǃhūbaib ai khause ta ge ge hā tsî mâtikōse ta ǀnais ga nani ǃkhaisa ra ǁkhore. 50 Xawe ta ge aibe ǁāǁnâ-e nî ǃkhōǃoa tsî mâtikōse ta ǃgomse nî tsâ nēs nî ǃkharus kōse. 51 ǂKhîba ta nî ǃhūbaib ai hā-ūse ta ge hā ti du ra ǂâi? Tātsē, ǂkhîb ose, xawe ǀgorasa. 52 Nēsisa xus ge omaris koro khoen disa nî ǀgorahe, ǃnonana ǀgamn ǃoagu tsî ǀgamna ǃnonan ǃoagu. 53 ǁGûga ǀgôagu ǃoagu tsî ǀgôaga ǁgûgu ǃoagu, ǁgûde ǀgôadi ǃoagu tsî ǀgôade ǁgûdi ǃoagu, ǀuiǁgûde ǁîdi ǀuiǀgôadi ǃoagu tsî ǀuiǀgôade ǁîdi ǀuiǁgûdi ǃoagu.”
ǁAeba ǁnâuǃās
(Mateub 16:2-3)54 Jesub ge ǁkhāti ǂnubis ǃoa ge mî: “ǃÂusa du ga huriǂoasa xus ra ǂoaxase mûo, o du ge ǁnātimîsi ra mî ‘ǀApi nî’ ti tsî i ge ǁkhāti ra ǀapi. 55 Tsî du ga ǃkhawagas ǂoasa hōǃâ, o du ge ra mî ‘ǀGamsa nî’ ti tsî i ge ra ǀgam. 56 Sa ǀgamaixado! ǃHūbaib tsî ǀhommi tsîn ǁga kō, î mâsiga ǀgora; mâti-i ī, o du nē ǁaeb di ǂâibasende a ǀgora ǁoa?
Sa mâǃoa-ao-i ǀkha ǂhanuǂhanu
(Mateub 5:25-26)57 “Tare-i ǃaroma du ǁî-aitsama mûǂan tama, tare-i a ǂhanusa? 58 Sa mâǃoa-ao-i ǀkhats ǁnâuǃgâǃkhaib ǃoa garu hîats ge nî dī, îts ǁnā xū-e ǁî-i ǀkha ǂhanuǂhanu, î-i ǁî-e tā ǀgoraǃgâ-aob aiǃâ sī-ū tsi tsîb ǁîba tā ǀapaǃnamga māǁnâ tsi, î gu ǁîga tā ǃkhō-oms ǃnâ aoǂgā tsi. 59 Amase ta ra mîba tsi, ǁnāpa xuts tātsē ǂoa tidesa, ǀuni marisats mataretoa tamas kōse.”
© Khoekhoegowab Elobmîs © Bible Society in Namibia, 2020.
