Romeǁîn 3 - Khoekhoegowab New Translation 2020 (KKG20)

1 Mâ aiǂhanu-e i ǁnâi Jodeǁî-e ūhâ? Tare-es ǃgaohesa* ra harebe? 2 ǂGui ǀgaugu ǃnâ ra harebe. ǂGurosan ge Jodeǁîna Elob di mîs ǀkha ge ǂgomǃgâhe hâ i. 3 ǀNî Jodeǁîn ga ǂgomoǃnâo, Elob ǂgoms tsîna nēs ǃnâ ǁauǁauhe tide? 4 Tātsē! Mâ khoe-i hoa-i ga ǂhumi, xaweb ge Eloba amab ǀguiba ūhâ. Xoas ra mî khami:

“Sats ga sa mîdi ǃnâ ǂhanu-ai,

ots ge ǀgoraǃgâhets ka, o nî danao kai.”

5 Xawe sada di tsūdīgu ga Elob di ǂhanu-aisiba ǃnāsase a ǃgāsa kaio, tare-e da kha nî mî? Elob a ǂhanuoǃnâ ti da kha nî mî ǁîb di ǁaibab ga sada ai ǀkhī-ūo? (Khoesi ǀgaub ǃnâ ta ra ǃhoa.) 6 ǁNāsas tā ī! Elob ga ama tama io, mâtib ǁîba ǃhūbaiba ǀgoraǃgâ ǁkhā?

7 Xawe ti ǂhumib ga Elob di amaba ǃnāsase a ǃgāsa kai tsî kai ǂkhaisiba mâ bio, tare-i ǃaroma ta noxopa ǁore-aose ra ǀgoraǃgâhe? 8 Tare-i ǃaroma da ǁnâi “A da ǂkhababa dī, îb ǃgâiba ǁîba xu ǀkhī” ti mî tama hâ? Nēsan ge ǀnî khoena ǃkhāǃkhā rase ra mî kai da, xawen ge ǁîna ǂhanu-aise ǀgoraǃgâsa ge ǃkhōǃoa.

Khoe-i xare-i ge ǂhanu-ai tama hâ

9 Sada Jodeǁîda, Jodeǁî taman* xa a ǂam khoe? Tātsē, ǀnai da ge ge ǃgāsa kai Jodeǁîn tsî Jodeǁî taman tsîn hoan ǁoreb ǀgaib ǃnâ hâsa. 10 Xoamâihe hâ khami:

“ǀGui ǂhanu-ai-i tsîn ge a ǀkhai,

ǀgui-i xawe-i hâ tama;

11 ǀgui ǁnâuǃāxa-i tsîn ge a ǀkhai;

Eloba ra ôa-i xare-i ge hâ tama hâ.

12 Hoan ge Eloba xu ge dabasen,

hoan ge ge harebeoǃnâ;

ǃgâidī ra-i xare-i ge a ǀkhai,

ǀgui-i xawe-i ge hâ tama hâ.

13 ǁÎn di dommi ge a ǁkhowa-amsa ǀhoba,

ǁîn di namdi ǀkhan ra gāxaǃnâsiba ǃhoa,

ǀaob ǃgā-i ge ǁîn di amǁgaugu ǃnaka hâ;

14 ǁÎn di ams ge ǀâxareb tsî au-ausens tsîra xa ǀoa hâ.

15 ǁÎn di ǂaidi ge a ǃhae ǀaoǂnâxūs ǃaroma,

16 hîkākās tsî tsūǀkhāb tsîra ge ǁîn di daogu ǃnâ hâ,

17 tsîn ge ǂkhîb di daoba a ǀū,

18 eloǃaoǃgâxasi-i xare-i ge ǁîn mûǁae a ǀkhai.”

19 ǂAn da a ǃkhais ge ǁnān ǂHanub ǃnaka hân, ǁîb di ǁgaragu ǃnaka ra hâsa. Khoe-i xare-i ge xū-e mîsa mā-amhe tide tsîb ge hoaraga ǃhūbaiba Elob aiǃâ ǁkharahesa anu hâ. 20 ǁNā-amaga i ge mâ khoe-i ǂHanuba ra ǁnâuǀnam-i hoa-e Elob mûǁae a ǂhanu-ai kaihe ǁoa, ǂHanuba xus ǁoreba ǂansa ra hā xui-ao.

ǂGomsa xu ǂhanu-ai kaihes

21 Xawe nēsisa Elob ǁîb ǀkha khoena ra ǂhanu-ai kai ǀgaub ge ge ǂhaiǂhaihe tsî ǁnās ge ǂHanub ǀkha dīxū-e ūhâ tama hâ. Moseb ǂhanub* tsî kēbo-aogu ge ǁnās xa ra ǃkhō-am. 22 Elob ge ǁîb ǂûb ǀkha ǂgoms ǃnâ-u, Jesub Xristub ǃnâ hoa ǂgomsabena ra ǂhanu-ai kai, ǀgora-e ūhâ tamase. 23 Hoan ge ǁore tsîn Elob di ǂkhaisiba tôasi hâ xui-aon 24 ge ǁause ǀkhomma xu ra ǂhanu-ai kaihe, Xristub Jesub ǃnâ hâ oresa xu. 25 Elob ge ǁîba ǁguibase ǁōb âb ǃnâ-u ǂkhîbagus ǁguibasa, ǁnān ǂgomsa ūhâna nî danbase ge ǁguiba. ǁÎb di taniǀnamxasib ǀkhab ge aibekam surib di ǁorena ǀariǂui, xui-aos ge ǁnāti ī ǁguibasa ge ǂhâbasa i, ǁîb di ǂhanu-aisiba ǁgauǂuis ǃaroma. 26 Tsî i ge ǁkhāti nē ǁaeb ǃaroma ge ǂhâbasa i ǁîb di ǂhanu-aisib tsî ǁîb a ǂhanu-ai ǃkhaisa ǁgauǂui tsî ǁîb a ǁnā, mâ-i hoa-i hîa Jesub ǃnâ ra ǂgom-e ra ǂhanu-ai kaiba ǃkhaisa ra ǁgau.

27 ǁNā-amaga koasensa mâpa hâ? ǁAraǂuihe hâ. Mâ ǂhanub xa? Sîsengu diba? Hî-î, xawe ǂgoms di ǂhanub ǃnâ-u. 28 O da ge ra ǂgom khoe-i ǂgomsa xu ra ǂhanu-ai kaihe ǃkhaisa, xawes ge nēsa ǂHanuba ǃkhōǀgaipes ǀkha dīxū-e ūhâ tama hâ. 29 Eloba kha Jodeǁîn dis ǀguisa i? Jodeǁî taman dis tsînab hî tama? Ā, ǁîb ge Jodeǁî taman dis tsîna i, 30 ǀgui Elob ǀguib hâ, ǃgaohe hâna ǂgoms ǃnâ tsî ǃgaohe tamana ǂgoms ǃnâ-u ra ǂhanu-ai kaiba xui-ao. 31 Nē ǂgoms ǀkha da kha ǁnâi ǂHanuba ra ǁauxūdī? Tātsē, xawe da ge ǂHanuba ra ǂnubikhâi.