Karetsanas
Davidi karetsanas
1 Satsa ta ge nî kaikai ti Elo tsî Gao-aotse!
Sa ǀonsa ta ge ǀamos kōse nî koa.
2 Mâ tsēs hoasa ta ge satsa nî koa
tsî sa ǀonsa nî kare ǀamosiba xu ǀamosib kōse.
3 ǃKhūb ge a kai, tsî koahesa anu
ǁîb kaisib ge ôaǃnâheǁoasase ī.
4 Nē ǃhaosa xu nau ǃhaos kōsen ge sa sîsenga ra koa
sa ǀgaisa dīgan ge ra ǂhôa.
5 Kaisib sa ǂkhaisib di anusib dib
tsî sa buruxa sîsengu xa ta ge nî ǂâiǂâisen.
6 Sa mîǂuiheǁoasa dīgu di ǀgaib xan ge khoena nî ǃhoa;
sa kaisiba ta ge tita nî ǂhôa.
7 Sa kaisib xa hâ ǂâiǂâisendi xan ge nî ǃhoa
sa ǂhanu-aisib xan ge dâb ǀkha nîra ǃhoa.
8 ǃKhūb ge ǀkhomxaǂgao tsî a ǀkhomxa
ǃnūǃnâxa tsîb ge kai hâhâ ra ǀnammi xa ǀoa hâ.
9 ǃKhūb ge hoana a ǃgâiba;
ǀkhomxaǂgaosigu âb ge ǁîb sîsengu hoagu ǂama hâ.
10 ǃKhūtse sa sîsengu hoagu ge ra koa tsi
sa ǂgomǂgomsa saoǃgonaon ge ra kare tsi.
11 Sa gaosib di ǀgaib xan ge ǁîna ra ǃhoa
tsîn ge sa ǁkhāsib xa ra ǃhoa.
12 Khoesib nî sa ǀgaisa sîsenga ǂan ǁkhāse
sa ǂkhaisa gaosib di ǀgaib xa.
13 Sa gaosis ge hoa ǀamosib kōse hâ
sa gaosis ge ǃhaosa xu ǃhaos kōse ra hâ.
14 ǃKhūb ge ǁnā ran hoana ǂkhâǃnâ
tsî ǁnān ǃgamǃgâ hâna ra ūkhâi.
15 Hoa mûdi ge ǃâubasens ǀkha sa ai ra kō;
tsîts ge ǁîna ǁaeb ai ra ǂûmā.
16 Sa ǃommats ga ǁkhowa-am,
ots ge ûitsaman hoana ǂhâban hân ǀkha ra ǁâǁâ.
17 ǃKhūb ge a ǂhanu-ai, ǁîb daogu hoagu ǃnâ,
tsîb ge a ǂgomǂgomsa sîsengu hoagu âb ǃnâ.
18 ǃKhūb ge ǁîba ra ǂgaiǀîn hoana ǀgūse hâba;
hoan ǁîba amab ǃnâ ra ǂgaiǀîna.
19 ǁNān ǁîba ra ǃaoǃgân ǁkhoregab ge ra dīǀoaǀoa;
ǁîn ǀkhomabasensa ǁnâu tsîb ge ǁîna ra ore.
20 ǃKhūb ge ǁîba ǀnam hân hoana ra sâu,
xaweb ge ǂkhaba khoen hoana ra hîkākā.
21 Ti ams ge ǃKhūb di karesa nî ǂhôa;
Khoesib hoab ge ǁîb ǀonsa nî koa, hoa ǀamosib kōse.
© Khoekhoegowab Elobmîs © Bible Society in Namibia, 2020.
