Paulub di sîsenni Jodeǁî taman* ǃnâ
1 ǁNā ǃkhais ǃaroma ta ge tita Pauluta, Xristub* Jesub di ǃkhōsabese Jodeǁî taman ǃaroma Elob ǃoa ge ǀgore. 2 Elob ge ǀō-aisa ǃereamxasib ǁîb ǀkhommi ǂâis diba sadu ǃaroma mā te ǃkhaisa du ge ge ǁnâu. 3 Elob ge ǁîb di ǂganǃgâsa ǀapesa ǂhaiǂhai tsî ǁîsa tita ge ǂanǂan, ǀnai ta ge ǃnubuse xoa hâ i khami. 4 Tsî tita ge xoana du ga khomai, o du ge Xristub di ǂganǃgâsib hîa ta ǂanna nî ǁnâuǃā. 5 ǂGurokam ǁaeb di khoen ge nēsa ge ǂhaiǂhaibahe tama hâ i, xawe nēsisab ge ǃAnu Gagaba ǁîb di ǃanu apostelgu* tsî kēbo-aogu tsîna ra ǂhaiǂhaiba. 6 ǃGâiǂhôas ǃnâ-us ge Jodeǁî taman ge Jodeǁîn ǀkha ǀguitikōse ǀhûǀumi-ao kai, ǁkhā soros di ǁanin ase ī tsî Elob di mîmâis Xristub Jesub ǃnâ dīǀoaǀoahe hâs ǃnâ amǃnâxasa.
7 Nē ǃGâiǂhôas ǃnâ-ub ge Eloba ǁîb di marioǃnâ ǀkhommi di māsa xu ǃoaba-aose ǁîb ǀgaib di sîsenga xu ge dī te. 8 Tita, Elob di khoen hoan xa ǂkhamta ge nē ǀkhomma ge māhe, î ta Xristub di ôaǃnâheǁoasa ǃkhūsib di ǃGâiǂhôasa Jodeǁî tamana aoǁnâba. 9 Hoaraga khoena ta nî Elob hîa hoa xūna ge kurub di ǂganǃgâsa ǀapes, ǃkharu ge ǁaeb hoaba ge ǂganǃgâsa is di sîsenga ǂhaisa kaibase. 10 Tsî nēsi i ge kerkheb ǃnâ-u ǂguiǃnâgu ǀgaugu Elob gā-aisib diga hoaraga danaǂgaeǂgui-aogu tsî ǀhomsi ǃkhaidi tsîna a ǂanǂanhe ǁkhā, 11 ǁîb di ǀamo ǀapes, Xristub Jesub sada ǃKhūb ǃnâ-ub ge hōsa ǃoa. 12 Xristub ǃnâ ǀguiǀguihes tsî ǁîb ǃnâ-u hâ ǂgomsa xus ge Elob kōse da ǁkhoaǂgaoxasib tsî ǃnorasasib ǃnâ sī ǁkhāsa. 13 ǁNā-amaga ta ge ra ǂgan du, î du tā tita ra sadu ǃaroma tsâ ǃkhais xa ǂkhabuǂâi, nēs sadu ǃgôasib kōse ǀgui ī xui-ao.
Paulub ǀgores Efeseǁîn ǃaroma
14 ǁNā-amaga ta ge ǀgores ǃnâ ǁGûb aiǃâ ra ǃhonǁgoa, 15 ǁîba xus ge hoaraga ǁaes ǀhommi tsî ǃhūbaib ai hâsa ǁîb ǀons tsî ǂūsiba ǃkhōǃoana. 16 Ab Eloba ǁîb ǂkhaisib di ǃkhūsiba xu ǀgaib ǀkha ǁîb di ǃAnu Gagab ǃnâ-u ǃnākhoesib âdo ǀgaiǀgaiǃnâ. 17 ǀGore ta ra, îb Xristuba sadu ǂgaogu ǃnâ ǂgoms ǃnâ-u ǁan, î du ǀnammi ǃnâ ǃnomaǃkhō tsî ǃgaoǃgaohe, 18 î du ǀoasase hoaraga Elob di khoen ǀkha mâtib Xristub di ǀnamma ǂhaba tsî gaxu, ǀgapi tsî ǃgam ǃkhaisa ǁnâuǃās ǁkhāsiba ūhâ. 19 ǀGore ta ra, î du Xristub ǀnammi hîa ǂansa ra īǂamma ǁnâuǃā tsî Elob di dīǀoaǀoasasib hoab ǀkha ǀoaǀoahe.
20 ǁNāb hîa ǁîb di ǀgaiba xu sada ǃnâ ra sîsenni, sada ra ǂgan tsî ǂâi xūn hoan ǃgâ-ai a dība da ǁkhāb ǃoa, 21 ǁîb dib ge ǂkhaisiba, kerkheb tsî Xristub Jesub ǃnâ hoaraga surigu ǃoa, hoa ǀamosib kōse! Amen.*
© Khoekhoegowab Elobmîs © Bible Society in Namibia, 2020.
