Jeremiab ge ǃKhūba ra dîǃnâ
1 Sats ǃKhūts ge a ǂhanu-ai, ti ǁhōba ta ga sats tawa ǀkhī-ūo,
xawe ta ge ti ǁhōba sats ǀkha ra ǀgoragu ǂgao.
Tarexan eloxoresana a ǃgâiǃgâxa?
Tarexab ǀhôagaon ûiba ǃgâiǃgâxase ra aiǃgû?
2 Sats ge ǁîna ra ǃhana, tsîn ge ra ǃnomaǃkhō;
ǀomkhâi tsîn ge ra ǂûtani.
Sats ge ǁîn amǁgaugu ai ǀgūse hâ
tsî ǂgaogu âna xu a ǃnū.
3 Xawets ge sats ǃKhūtsa a ǂan te,
titats ge ra mû tsîts ge ti ǂgaoba sa ǃoagu ra ǃâitsâ.
ǁÎna gūn ǂāhe nîn xase tsububē,
î ǁîna khai, ǂātsēs ǃaroma.
4 Mâ ǁaeb kōseb ǃhūba nî ǃoa
tsî ǃaub ǀgân hoana nî ǂnâ?
ǁNān hîa ǁîb ǃnâ ǁan hân di ǂkhabasib
ge xamarin, ǀgurun tsî ǀhomanina ra hîkākā.
ǁÎn ra “Sada ǀamsab ge ǁîba mû tide” ti mî xui-ao.
5 ǃKhūb ge ra mî:
“Khoen ǀkha ǃkhoeǀnûgus ǃnâts ga tsauo,
mâtits hān ǃoagu a ǃkhoeǀnûgu ǁkhā Jeremiatse?
ǃGorasa ǃhūb aits ga ǁnāo,
mâtits Jordanni di haiǀgoms ǃnâ ǁnâi nî dī?
6 Sa ǃgâsagu, sa ǂhunuma ǀaokhoen tsîn xawen ra gāxaǃnâ tsio,
ǁîn on ge ǃgarise ra ǂgaiǃgon tsi.
Tā ǁîna ǂgomǃgâ, ǂkhîxaǃnâsen ga ǃhoa-ū tsio.”
ǃKhūb ge ǁîb khoen ǂama ra ǃoa
7 ǃKhūb ge ra mî:
“Tita ge Israelǁaesa ge ǁnāxū;
ti ǀumisa ta ge ge ǂhara.
Ti ǀnamsabena ta ge ge māǁnâ
khākhoen ǃomǁae.
8 Ti ǀumis ge xam-i ase,
haiǀgoms ǃnâ ge ība te.
ǁÎn ge tita ǃoagu ge dabasen
ǁnā-amaga ta ge ǁîna ǁkhan hâ.
9 Ti ǀumisa kha tita anxa anise ība;
hoa ǀkhāga xu ǀaugu xa ra ǁnāǂamhesa?
ǂGai re ǀguruna,
în hā amǃnâxa nē ǂûǁaes ǃnâ.
10 ǂGui ǃûi-aogu ge ti draibeǃhanaba ge hîkākā,
ti amǃnâsa gu ge ge dāǂkhū;
ti ǃgâi amǃnâsa gu ge ǃū-aisa ǃgaroǃhūse ge dī.
11 ǁÎn ge ǁîba ǃū-aisase ge dī; ǃū-aisaseb ge tita ǃaroma ra ǃoa.
Hoaraga ǃhūban ge ǃū-aisase ge dī; tsî i ge khoe-i xare-e ǁae tama hâ.
12 Hoaraga ǀgapi ǃkhaidi ǃgaroǃhūb didi ǂaman ge hîkākā-aona ge hā;
nē ǀams ǃhūb disa xu naus kōse; ǂkhî-i xare-i ge khoena ge ǀkhaiba.
13 ǁÎn ge ǃhoroba ǃhana tsî ǁîǁhaina ge ǃgao;
ǁîn ge ge ǀhupuǀhupusen, xawen ge hōǂgābasensa hō tama ge i.
ǃGaos ân xan ge nî tao;
ǃKhūb ǁaib di ǁkhôasib xa.”
ǃKhūb di mîmâis Israeli ǀgūkhoen ǃoa
14 Nētib ge ǃKhūba ra mî: “Ti ǂkhaba ǀgūkhoen, ti ǁaes Israelsa ta ge ǀumis ase mā ǃhūba ra tsâǀkhā ǂgaon xasa, mû tita ge ǁîna ǃhūb âna xu nî tsubuǂui tsî ta ge Judaba ǁîna xu nî ǃnoraǃnora. 15 Tsî ta ga ǁîna tsubuǂuis khaoǃgâ ta ge ǁîna ǀkhomxa tsî mâ-i hoa-e ǁkhawa ǁî-i ǀumis ǁga tsî ǁî-i ǃhūb ǁga nî oahā-ū. 16 Tsî i ge nî ī, ti ǁaes di daogan ga ǂōrisase ǁkhāǁkhāsen, tsî ti ǀons tawa ‘ǃKhūb a ûitsama ǃkhais ao’ ti nūo, ti khoenan Baali tawan nî nūse ge ǁkhāǁkhā hâ i khami, on ge khoen ǁaegu nî ǂnubikhâihe. 17 Xawe ǁnâuǀnam tama ga i ǁaesa ta ge hoaragase ǃhomǂui tsî nî hîkākā”
tib ge ǃKhūba ra mî.© Khoekhoegowab Elobmîs © Bible Society in Namibia, 2020.
