ǁKhaob tsî oreb ge khoen
1 Tsî ta ge ǁKhaoba Sionǃhommi ai ge mû tsî ǀguikaidisi tsî hakadisihakaǀaǀoadisi khoen hîa ǁîb di ǀons tsî ǁîb Îb di ǀons tsîra ǃūdi ân ai xoasana. 2 Tsî ta ge ǀhomma xu dom-i hîa ǁgammi khami ra ǀō-e ge ǁnâu. ǃGurub khami gere ǀō tsîb ge ǁnā ǀōb hîa ta ge ǁnâuba ǀkhō-aon xa harps ai ra ǀhuruheb khami gere ǀō. 3 Tsîn ge ǀguikaidisi tsî hakadisihakaǀaǀoadisi khoena trons tsî haka ûitsama kurusabegu tsî ǂnomdomgu* aiǃâ ge mâ i. ǁÎn ge ǀasa ǁnaetsana-i khoe-i xare-i ǀū, ǁîn ǀguin a ǂan-e gere ǁnae. Hoaraga khoesib ǃnân ge ǁîn ǀguina Elob xa ǃhūbaiba xu ge orehe. 4 ǁNāgu ge tarekhoe-i ǀkha ge ǂharugu tamas ka io ǁomǀhao tama hâ i khoegu tsî ǁnās ǃaroma ǃanuga. ǁÎgu ge ǁKhaoba ǃgûb ra ǃkhai-i hoa-i ǁga ra sao. Elob ge ǁîga hoaraga khoesib ǃhūbaib ai hâba xu ore amaga tsî gu ge ǁîga a ǂguro, Elob tsî ǁKhaob tsîkha nî ǁguibahega. 5 ǁÎgu di amde xu i ge tātsē ǂhumi-i xare-e ge ǂoaxa tama hâ i, ǁîgu ge ǂnao-e ūhâ tama hâ.
ǃNona ǀhomǃgāgu
6 Tsî ta ge ǀnî ǀhomǃgāb hîa ǀhommi ǁaegu ǃhūbaib ai ǁan hâ ǁaes, ǃhaos, gowab tsî khoen ǃoa ǀamo ǃGâiǂhôas Elob disa nî aoǁnâse ra ǁkhanaba ge mû. 7 Tsîb ge ǃgari dommi ǀkha ge mî: “Eloba ǃao, î ǁîba ǃgôasiba mā, ǀgoraǃgâs di ǁaeb go ǀoa xuige. ǀGoreǀî re ǁîb ǀhommi, ǃhūbaib, hurib tsî ǁgamǀaudi tsîna ge dība.”
8 Tsîb ge ǀgamǁî ǀhomǃgāba ǂgurob khaoǃgâ sao tsî ge mî: “ǁNās ge go! ǁNās ge go kai ǃās Babilonsa! ǁÎs hîa ge ǁaedi hoade ǁîs ǂauxûib ǀaib diba āsisa!”
9 Tsîb ge ǃnonaǁî ǀhomǃgāba ǂguro ǀgamkha khaoǃgâ hā tsî ǃgari dommi ǀkha ǂgaiǂui tsî ge mî: “ǁNān hîa ǀgurub tsî ǁîb ība ra ǀgoreǀîn tsî ǃūdi ân ai tamas ka io amǀkhāb ǃomgu ân ai saosan 10 ge Elob ǂauxûib, ǁîb ǁaib dib hîa ǃūmûse ǀgabis ǁîb ǁaib dis ǃnâ ra ǂnâǂgāheb xa nî ā! Hoan hîa nēsa ra dīn ge ǃanu ǀhomǃgāgu ǁKhaob digu aiǃâ ǀaes tsî sulfuri tsîn ǀkha nî tsûtsûhe. 11 Tsîb ge ǁnā ǀaes hîa ǁîna ra tsûtsûs di ǀanna ǀamos kōse ra ǃapa. Tsîn ge ǁnān hîa ǀgurub tsî ǁîb di ība ra ǀgoreǀîn tamas ka io mâ-i hoa-i hîa ǁîb ǀons di saosa ūhâ-i tsîna tsēs tsî tsuxub tsîna sâ tide.”
12 Nēpan ge Elob di khoena nî mâǀgai, ǁnān hîa Elob di mîmāde ǃkhōǀgaipe tsî Jesub ǃnâ ra ǂgomna.
13 Tsî ta ge nēti ra mî dom-e ǀhomma xu ge ǁnâu: “Nēti xoa re: ǀKhaehen ge hâ ǁnān nēsisa xu ǃKhūb di ǃoabas ǃnâ ra ǁōna!”
“Ā, amase!” tib ge Gagaba ra ǃeream. “ǁÎn ge ǁîn di sîsenga xu nî sâ tsî ǁîn di sîsengu ge ǁîna ra sao.”
ǃHūbaib di ǃgaos
14 Tsî ta ge ge kō, o ta ge ǁnāpa ǂkhai ra ǃâusa ge mû. Tsî ta ge Khoen Ôab khami ī khoe-i, ǃhuniǀuri kronsa danas ai ūhâ tsî ǀā ǃhoroǃgao-ūdasa ǃomǁae ūhâba ǁîs ai ge mûǂnôa. 15 Tsîb ge ǀnî ǀhomǃgāba Tempela xu ǂoaxa tsî ǃgari dommi ǀkha ǁnāb ǃâus ai ǂnôaba ǃoa ge ǂgaiǂui: “Sa ǃhoroǃgao-ūdasa ū, îts ǃgaotsoatsoa re, ǃgaos di ǁaeb go hā xuige. ǃHūbaib ǃgaos ǃaroma ǁan hâ xuige!” 16 Ob ge ǃâus ai ǂnôaba ǃhūbaib ǃnâ ǁîb di ǃhoroǃgao-ūdasa ge ǃkhāǂgā tsîs ge ǃgaosa ge ǀhaoǀhaohe.
17 Tsî ta ge ǀnî ǀhomǃgā-i, ǀhommi ǃnâ hâ Tempela xu ra ǂoaxa-i hîa ǁkhāti ǁî-i tsîna ǀā ǃhoroǃgao-ūda-e ǃomǁae ūhâ-e ge mû.
18 Ob ge ǀnî ǀhomǃgāb ǀaes di ǃereamsa ūhâba altarsa xu ge hā. ǁÎb ge ǃgari dommi ǀkha ǁnā ǀhomǃgāb ǀā ǃhoroǃgao-ūdasa ǃomǁae ūhâb ǃoa ge ǂgaiǂui: “Sa ǃgao-ūdasa sîsenū, î draibeǃhanab ǃhūbaib diba ǃgao re, draiben ǁan hâ xuige!” 19 Tsîb ge ǀhomǃgāba ǃgao-ūdas âba ǃhūb ǃnâ ǃkhāǂgā tsî draibena ǃhūbaib di draibehaisa xu ǃgaoǁnâ tsî Elob ǁaib di ǀāǃnâǃkhais ǃnâ ge aoǂgā. 20 Tsîn ge draibena ǃās ǃauga, ǀāǃnâǃkhais tawa gere ǀāhe tsîb ge ǀaob ǁnā ǀāǃnâǃkhaisa xu gere dâuǂoaxaba, hāgu di tomdi kōse gere sī, ǁaubexa ǀgamkaidisi tsî khoesedisiǃnaniǀa kilometergu di ǃnūsiba.
© Khoekhoegowab Elobmîs © Bible Society in Namibia, 2020.
