Holoferneb ge Betuliasa ra ǁnāǂam
1-3 Sao ra tsēb ge Holoferneba ǁîb ǂhunuma toroǃkhamaogu tsî ǁnāgu nau ǃhaode xu ge hâ igu tsîga ge mîmā, î gu tentomde khôaǁnâ tsî Betulias ǃoa dāǁnâ. ǁÎb ge ǁkhāti hoa daogu ǃhomgu ǃnâ-ū ra ǃkharugu nî ǁkhâuǁnâhe tsîn Israelǁîna nî ǁnāǂamhe ǃkhaisa ge mîmā. Kai ǃgôab di toroǃkhamaogu ge ge hâ i; ǀguikaidisi tsî hûdisiǀoadisi ǀnūtoroǃkhamaogu tsî disiǀgamǀaǀoadisi hātoroǃkhamaogu tsîga. Nēgu tawa gu ge ǂhâbasa xūna ge tani hâ iga ge ǃgôaǀarohe tama hâ i. Nē toroǃkhamaogu hoagu ge dāǁnâ tsî ǁîgu tentomde Betulias ǀgūse ǁgoe ǃgoaǃnāb ǃnâ ǂnôa ǁgamǀaudi xōǀkhā sī ge ǂnaumâi. Nē hâǃkhaib ge Dotansa xu Balbaims tsî Betuliasa xu Siamons, Jesreelǃgoaǃnāb ǁga ge ǃoa hâ is kōse ge khoraǂuisa i.
4 Tsî Israelǁîn ge nē toroǂnubis di ǂguisiban ge mû, o kaise ǃao tsî ge mîǀîgu: “ǁNā toroǃkhamaogu ge mû gu ra xū-i hoa-e nî hapu. Nēpa i ge ǁnātikō ǂû-i ǁnātikō ǂnubi-i nî ǂû-e nē ǃhomgu, ǃgoaǃnāgu tsî ǃnâugu ǃnâ a ǀkhai.” 5 ǃAo gu gere xawe gu ge hoaraga Israelǁîga ǃkhamūxūna ū, toroba ǃkhams ǁgauǂuis ǃamǀaede ǂgō-omgu ai ǃamam tsî hoaraga tsuxuba ge ǃûiǂkhai. 6 Sao ra tsēb ge Holoferneba, Israelǁîn Betulias din nî mûga ǁîb hoaraga hātoro-aoga ge ǂgaeǂguiǂui. 7 ǁÎb ge hoaraga daogu ǃās ǃnâ ra ǂgâgu tsî ǁgam-e ra mā ǀaudi tsîna ge ôaǃnâ. ǁÎb ge nēna ǁkhâuǁnâ tsî toroǂnubis ǁgab nî oas aiǃâ ǃkhē-aoga ǁnāpa ge ǃûi kai.
8 Hoa Edomǁîn tsî Moabǁîn toroǂnubira di ǂgaeǂgui-aogu ge Mediteraneahuri-ammi di toroǂnubis di ǂgaeǂgui-aogu tsîgu ǀkha Holoferneb ǃoa hā tsî ge mî: 9 “ǃGôahesatse, sige ǀapemāsats ga ǂâiǃgâ, o gu ge ǂguigu, sa toroǃkhamaogu diga ǃgamhe tide. 10 Nē Israelǁîn ge ǁîn ǁhâigôagu ai ǁkhaubasens ǃaroma mûmâinǃgâ tama hâ, xawe ǁîn ǁan hâ ǃhomgu di ǀgapisib ai, nē ǃhomgu aits supuse a ǂharo ǁoa xui-ao. 11 ǁNā-amaga, ǃKhōdana-ao Holofernetse, sa toro-aogats ga ǀnî hâ ǃāde gu ra ǁnāǂam khami Betuliasa ǁnāǂam kai, o gu ge ǀnîgu sa toroǃkhamaogu diga nî ǃgamhe. 12 Sa hâǃkhaib ǃnâ hâ, î sa toroǃkhamaoga hâǃkhaidi âgu ǃnâ ǁnāxū. Sige digu hîa ra ǃgauga, ǀaudi ǃhommi ǂai-am ǂnôade gu nî ǃûimâ ǃkhaisa mîmā, 13 ǁnāpa ǀguin Betuliaǁîna ǁgam-e sī ra xuri xuige. ǁGâs xan ga ǁō, on ge ǁîn di ǃāsa sats ai nî ǁkhaeǁnâ. ǁNā soab ǃnâ ge ge sige tsî sige khoegu tsîna ǀgapise nē ǁgoeǂnami hâ ǃhomgu ǃoa ǂoa, ǁnāpa sī tentomde ǂnaumâi tsî ǀgui-i xawe-i ǃāsa xu nî ǂoa ǃkhaisa nî ǁkhae. 14 Aorekhoegu, tarekhoedi tsî ǀgôan hîa ǃās ǃnâ hân hoan ge ǃâtsūǀkhāb xa nî ǁō tsî gu ge ǃganga ǁîn di ǁō hâ sorodi xa, sa toroǂnubis nî ǁnāǂams aiǃâ nî ǀoa. 15 Nē ǀgaub aits ge ǁîna ǁîn di khâikhâisens tsî ǂkhîb ǃnâ satsa māǁnâsensan ra ǂkhā ǃkhais ǃaroma ǁkhara ǁkhā.”
16 Holoferneb tsî ǁîb di ǃoaba-aogu hoagu ge nē mîdi ǀkha kaise ge ǂkhîǂâixa tsîb ge ǁnā ǃkhais ǃaroma nē ǀapemāsa ge sîsenxa kai. 17 Moabǁîgu tsî koroǀoadisi Asiriaǁîgu tsîgab ge ǃās di ǁgamamde gu nî ǃûise ǃgoaǃnāb ǃnâ ge khoraǂui. 18 Edomǁîgu tsî Amonǁîgu tsîgu ge Dotans ǃoagu, ǃhomgu ǃnâ tentomde ge ǂnaumâi. ǁÎgu ge ǁkhāti ǀnî toroǃkhamaoga ǃkhawagas aiǂoas ǁga Akrabas hîa Kusis, Mokmurǃāb xōǀkhā ǁgoes ǃoa ge sî. ǃGau ge Asiriaǁî toroǃkhamaogu ge ǃgoaǃnāb ǃnâ tentomde ge ǂnaumâi. ǁNātikōses toroǂnubisa ge kai i tsîn ge ǁîgu tentomdi tsî xūn tsîna hoaraga ǂgāba gere ǀoaǀoa.
Betulias ǃnâ hâ mâsigu
19 On ge Israelǁîna, ǃKhūb ǁîn di Eloba huib ǃaroma ge ǂgaiǀî. ǁÎn ge khākhoegu ge ǁîsa xun ǁhâǂoa ǁoase ǃāsa ǁgoeǂnami hâ i xui-ao ǃaruǀî ǁkhoaǂgaosi-e ge ūhâ tama hâ i. 20 Hoaraga Asiriaǁî toroǂnubis; ǀnūtoroǃkhamaogu, hākunidi tsî hātoroǃkhamaogu ge Betuliasa, ǃnonadisihakaǀa tsēde ge ǁgoeǂnami hâ i, ǃās di khoen ǁgamxapadi ge ǀkhaiǃnâs kōse. 21 Hoaraga ǁkhaegu tsî tsaugu hoagu ge ge ǀkhaiǃnâtsoatsoa, tsî gu ge ǃās di ǂgaeǂgui-aoga, mâ khoe-i hoa-i āǁgamro-e nî hō ǁkhāse ǁgam-e gere ǀnōǁnâ tsîs ge ǀgui tsēs tsîna hoan ǂâu hâse nî hōse ge ǃkharu tama hâ i. 22 ǀGôan ge ge ǂkhabutsoatsoa tsîn ge hoaraga ǃās ǃnâ, ǃgangu tsî dao-amdi ǃnâ tarekhoedi tsî ǂkham khoen tsîna ǁgâs xa ǂkhabu tsî gere ǁnā. ǀGai-i ge ǃaruǀî ǁîn ǃnâ ge ǀkhai i.
23 ǃĀs di khoen hoan ge Usiab tsî ǃās di ǂgaeǂgui-aogu tawa sī ǀhao tsî ge ǂgaiǂui: 24 “Elob ge sago sida ǃoagu go ge dīn ǃaroma nî ǁkhara! Sago ge nē ra īn ǃaroma, ǂkhîba go Asiriaǁîn ǀkha dī tama xui-ao nî ǀhapixa. 25 Sida nî hui khoe-i xare-i ge nēsi a ǀkhai! Elob ge ǁîn di ǃomǁae sida go māǁnâ. Sida ge ǂkhabu hâ tsî ǁgâs xa ra ǁō. 26 Asiriaǁîna nēsi ǂgai, î ǁîn ai māǁnâsen, îb Holoferneb tsî ǁîb di toroǂnubisa sada ǃāsa ū tsî ǁîs ǃnâ hâ xūna ūbasen. 27 Sida i ge nî ǃgâiba ǁgâs xa da nî ǁōs xa ǃkhōsabese ǁîn xa ūhesa. ǁÎn ge sida nî khobodī, xawe da ge ûitsamase hâ tsî sida tarekhoedi tsî ǀgôan ra ǁō ǀgausa mûǃnâ tide. 28 ǀHommi tsî ǃhūbaib tsîkha ge sats ǃoagu a ǃkhō-amao tsî ǁkhāti sada Elob, sada aboxagu di ǃKhūb, hîa ǁîgu tsî sida di ǁoren ǃaroma ra ǁkhara dab tsîna. ǂGom tsî da ge ǀgores ǀguisa nî hî, nē tsū xūn nētsē sida ǀkha ī tide ǃkhaisa.”
29 ǁNāpa ge hâ i khoen hoan ge ǃgarise ātsoatsoa tsî ǃKhūb, Elob ǃoa ge ǀgore. 30 Ob ge Usiaba ǁîn ǃoa ge mî: “Ti khoedo, tā ǂkhabuǂâi! A da noxopa koro tsēde ǃâu tsî kō ǃKhūb sada Elob xa da ǀkhomxahe tide ǃkhaisa. Amaseb ge ǁîba sada hoaragase aoxū tide. 31 Xawe i ga hui-e koro tsēdi khaoǃgâ hā tama io, o ta ge sadu ra mî khami nî dī.” 32 Ob ge Usiaba khoega omǂnamiǂnubiǂgoagu tsî ǂgō-omgu ǃoa ǃkhē gu nîse ge oa kai. Hoaraga tarekhoedi tsî ǀgôan tsîn ge omdi ǃoa ge ǁaru. Hoaraga ǃās khoen ge kaise ge ǃan hâ i.
© Khoekhoegowab Elobmîs © Bible Society in Namibia, 2020.
