Huib ǃaroma hâ ǀgores
Davidi Psalms
1 ǃKhūtse ǁnâu re ti ǀgoresa;
ti ǀkhomabasensa ǁnâu re.
Sa ǂgomǂgomsasib ǃnâ ǁnâu-am te re;
sa ǂhanu-aisib ǃoa.
2 Sa ǃgāb ǀkha tā ǀgoraǃgâs ǃnâ ǂgâ re;
khoe-i xare-i, ûi hâ-i
sa aiǃâ ǂhanu-ai tama xuige.
3 Khākhoeb ge ra ǃgôaǃgon te tsî ti ûiba ra dāǃgâ
ǁîb ge tita ǃkhae ǃkhaidi ai ra ǁan kai
ǀnai ǁō hâ khoen khami.
4 Ti gagas ge tita ǃnâ ra ǂkhabu
ti ǂgaob ge ti ǃnākhoesib ǃnâ hîkākāhe hâ.
5 ǃKharu ge tsēdi xa ta ge ra ǂâi;
sa sîsengu xa ta ge ra ǂâiǂâisen;
sa ǃomkha di sîsengu xa ta ge ra ǂâiǂâisen.
6 Ti ǃomkha ta ge saǀî ra ǀhōǂui,
ti ǀoms ge sa ǃoa ǁgâ hâ, ǂnâsa ǃhū-i khami.
7 ǃHaese ǁnâu-am te re ǃKhūtse
ti gagas ge ra ǂkhabu.
Tā sa aisa tita xu gaugau re,
î ta tā ǁnān āb ǃnâ ra ǁgôan khami ī.
8 Sa hâhâ ra ǀnammi xa ǁgoaga ǁnâu kai te re
Sats ai ta ra ǂgomaiǂnûi xuige.
ǂAnǂan te re daob ǁîb ai ta nî ǃgûba;
sats ǃoab ge ti turaba ra khâi.
9 Ti khākhoena xu huiǂui te re ǃKhūtse
sats tawa ta ra sâusen xuige.
10 ǁKhāǁkhā te re satsa ūǃoasabana dīsa
sats a ti Elo xuige.
As sa ǃgâi gagasa tita ǂhau ǃhūb ai ǂgaeǂgui.
11 Sa ǀons ǃaroma ûib ǃnâ ūhâ te re ǃKhūtse
sa ǂhanu-aisib ǀkha ǂōǂōsiba xu ǂgaeǂguiǂui te re.
12 Sa hâhâ ra ǀnammi ǃaromats ge ti khākhoena nî hîkākā,
tita a sa ǃgā amaga.
© Khoekhoegowab Elobmîs © Bible Society in Namibia, 2020.
