ǁGôa-elogu tsî ama ǃoabas
1 ǁNâu re Israels khoedo, mîs ǃKhūb ge sado mîbasa.
2 “Tā ǀkhara ǁaedi di daoga sao;
tā ǁnaetisa tama saon ǀhommi din xa ǂhanihe,
nau ǁaedi ga ǃao xawes tsîna.
3 Nē khoen di ǂgoms ge a harebeoǃnâ.
ǃAub hai-i ge ǁhāǁnâhe,
tsî haikuru-aob xa, ǃōs âb ǀkha ra sîsenūhe,
4 tsî ǃhuniǀurib tsî ǀhaiǀurib ǀkha ra anihe.
ǂNūǀurib tsî hamers ǀkhab ǁîna ra ǃgâu;
ǁnoben tidese.
5 ǁÎn ǁgôa-elogu ge tôaǃhanab ǃnâ mâ ǃaoǃao-ūxūb khami ī;
ǁîgu ge a ǃhoa ǁoa;
ǁîgu ge ra tanihe,
ǃgû ǁoa gu a amaga.
ǁÎga tā ǃao
ǂkhôadī ǁoa gu a xuige
ǁkhātis ge ǃgâidīsa ǁîgu tawa a ǀkhai”
tib ge ǃKhūba ra mî.6 ǃKhūtse, ǀgui-i xare-i ge hâ tama hâ, sats khami ī-e.
Sats ge a ǁkhā,
ǀons âts ge kai tsî a ǀgaisa.
7 Tari-e kha ǃao tsi tide, sats hoa ǁaedi di gao-aotsa!
Sats ge ǃgôahesa a anu.
Hoaraga gā-ain ǁaes din ǃnâ,
tsî ǁîn di gaosigu hoagu ǃnâ i ge ǀgui-i xare-e a ǀkhai,
sats khami ī-e.
8 ǁÎn ge hoatsama gâre tsî a gâ;
ǁkhāǁkhās harebeoǃnâgu disa;
ǁîgu ge a hai!
9 Tarsisa xu hâ ǀhaiǀurib
tsî Ufasa xu hâ ǃhuniǀurib ǀkha ǃkhûǀkhāsa,
ǀuriǂnau-aob di sîsenni,
tsunitsuni-aob ǃommi di sîsenna.
ǁÎn ge purpuri tsî ǂhoaǀapa sarab ǀkha anihe hâ;
nēn hoan ge a ǂansen di sîsen.
10 Xaweb ge ǃKhūba a ama Elo,
ǁîb ge a ûitsama Elo,
ǀamo Gao-aoba!
ǁÎb di ǁaixasib xab ǃhūbaiba ra ǀkhū,
ǁaedi ǁaixasib âba a tani ǁoa.
11 [ǁNā-amaga du ge sado ǁîna nēti nî mîba: “Elogu ǀhommi tsî ǃhūbaiba ǂnubi tama gu ge ǃhūbaiba xu tsî ǀhommi ǃnakaba xu nî kā.”]
Koatsanas
12 ǃKhūb ge ǁîb ǀgaib ǀkha ǃhūbaiba ge ǂnubi,
gā-aisib âb ǀkhab ge ǃhūbaiba ge dī,
tsî ǀhomma ge ǃāǂui.
13 ǁÎb mîmās ai gu ǁgamga ǀhommi ǃnâ ra ǃguru;
ǁîb ge ǃâude ǃhūbaib ǀamsa xu ra hā-ū.
ǀNanub ǃnâb ge ra napa kai
tsîb ge sâuǃnâ-omdi âba xu ǂoaba ra sî.
14 Nēsa ra mû-i hoa-i ge gâre tsî gâse ra tsâ,
ǁnān ǁgôa-elona ra kurun ge ra taotaohe,
ǁgôa-elon ǁîn ra kurun ǂhumi tsî ǁō hâ xui-ao.
15 Harebeoǃnâ tsîn ge a taotaosa,
ǁîn ge ǁîn ǁkharab ǁaeb ga ǀoa, o nî kāǁō.
16 Jakob Elob ge ǁîn khami ī tama hâ;
ǁîb ge ǁnāb hoaraga xūna ge kurub
tsî Israelǁaesa ǁîb di ǂhunuma ǁaese ge ǁhûiba.
ǃKhūb Hoaǀgaixab tib ge ǀon hâ.
Hā nî ǃkhōsis
17 Jerusalems khoedo, ǃnamiǂgāhe du ge hâ! ǀHaoǀhao re sadu di ūhâxūna. 18 “Mû tita ge nē ǃhūb di ǁanǂgāsabena nî ǀnamixū, tsî ta ge ǁîn ǂama ǂōǂōsi-e nî hā kai, hōǃân nîse”
tib ge ǃKhūba ra mî.19 “Tsūba te ti ǂkhôas ǂama!
Ti ǀhapidi ge a tsûsa.
Xawe ta ge tita ge mî:
‘Nēb ge a ǁō-ai, a ta ǁîba tani.’
20 Ti tentoms ge hîkākāsa,
tsurigu âs ge ǃgâu hâ.
Ti ôan hoan ge tita xu ge ǃgû, tsîn ge a ǀkhai,
ti tentomsa nî ǁkhawa mâi khoe-i ge a ǀkhai,
ti ǂgāmâisaga nî ūkhâi-e.
21 “ǃÛi-aogu ge a gâre
tsî ǃKhūb tawa ǀape-ôa tama hâ.
ǁNā-amagan ge aiǃgû tama hâ
tsîn ge ǁîn di hoaraga ǀgoana ǀgaru hâ.
22 ǀGanab ǃnurub dib ge hâ!
Kai ǂkhupib ge ge ǀapasǀkhāb di ǁaedi ǃnâ hâ.
Judab ǃādi ge ǃū-aisa ǃgaroǃhūb ǃnâ nî dabahe;
ǀgirin ǁanǃkhaise.”
23 ǃKhūtse tita ge a ǂan, daob â-i khoe-i di tama ǃkhaisa,
khoe-i ǃgû ra-i di ǃkhai tamas ge ǁî-i ǃgûdaoba ǂansa.
24 ǁKhara te re ǃKhūtse,
xawe ǂhanu-aisib ǃnâ.
ǁNāsa tā ǁaixasib âts ǃnâ dī,
îts tā hîkākā te.
25 ǁAedi hîa satsa a ǀūdi ǂama ǁgôasib âtsa ǁhōǂui re;
tsî khoen sa ǀonsa ǂgaiǀî taman ǂama.
Jakoban ge ge hapu, ǁîban ge ge hîkākā
tsî ǁanǃkhais âban ge ge hîǀhuru.
© Khoekhoegowab Elobmîs © Bible Society in Namibia, 2020.
