Semajab di kēbos
(1 Gao-aogu 12:21-24)1 Rehabeammi ge Jerusalems ǃnâb ge sīo, ǀguikaidisi tsî ǁkhaisadisiǀoadisi ǃkham ǁkhā aoga Judab ǃhaos tsî Benjaminni ǃhaos tsîra xu ge ǀhaoǀhao, Israeli ǃoagub nî torodīga, îs gaosisa ǁkhawa ǁîb, Rehabeammi di. 2 Xaweb ge ǃKhūba kēbo-aob Semajab ǃoa ge mî, 3 îb nē ǂhôasa Rehabeammi tsî Judab tsî Benjaminni ǃhaora di khoen hoana sī mîba: 4 “Tā ǃgûǂoa tsî sadu ǃgâsan, Israelǁîn ǃoagu sī torodī. Mâ-i hoa-i âdo sadu omde ǃoa oa, nē ǃkhais go tita xu ī xuige.” On ge ǃKhūb di mîsa ǁnâuǀnam tsî Jerobeammi ǃoagu ǃkhamǃgûsa ge ǀû.
Rehabeammi ge ǃāde ge omǂnami
5 Rehabeammi ge Jerusalems ǃnâ ge ǁan tsîb ge sao ra ǃādi Judab tsî Benjaminni tsîkha dide ge omǂnami: 6 Betlehems, Etams, Tekoas, 7 Betsurs, Sokos, Adulams, 8 Gats, Maresas, Sifs, 9 Adoraims, Lakis, Asekas, 10 Soras, Ajalons tsî Hebrons tsîde. 11 ǁÎb ge ǁîde ǀgaisase omǂnami tsî mâs hoas ǃnâ ǂamkhoeba ge mâi tsîb ge mâs hoas ǃnâ ǂûn, ǀkhera-oli-i, ǂauxûi-i 12 tsî ǁkhāti ǁkhaukhōdi tsî ǁhâigôagu tsîna ge ūhâ i. ǁNātib ge Judab tsî Benjaminni tsîkha ge gaoǂam.
Pristergu tsî Leviǁîgu ge Judab ǃnâ ra sī
13 Hoaraga ǀkharigu Israeli diga xu gu ge pristergu tsî Leviǁîgu tsîga Judab ǁga ge hā. 14 Leviǁîgu ge ǁîgu ǃû-aidi tsî xūn tsîna ǁnāxū tsî Judab tsî Jerusalems tsîra ǃoa ge doe, gao-aob Jerobeammi tsî ǁîb di ôagu tsîn ge ǃKhūb di pristerse gu nî ǃoaba ǃkhaisa mā-am gu tama i xui-ao. 15 Jerobeammi ge ǁîb di ǂhunuma pristerga ge ǁgaumâi, ǀūben ǀgoreǀîǃkhaidi ai gu nî ǃoabase, tsî ǁgâuagu tsî ǁîb ge kuru tsâukha di īkha tsîna nî ǀgoreǀîse. 16 Israelǁîn ǃhaodi di khoen ǃKhūb Israeli di Eloba ra ǃoaba ǂgaon hoan ge Leviǁîga Jerusalems ǁga ge sao, ǃKhūb ǁîn aboxagu di Eloban ǁguibade nî ǀkhī-ūba ǁkhāse. 17 ǁNā ǃkhais ge Judab di gaosisa ge ǀgaiǀgai, tsîn ge ǃnona kuriga Salomob ôab Rehabeamma gere ǂkhâǃnâ, tsî gao-aob Davidi tsî gao-aob Salomob tsîkha ǂgaeǂguis ǃnakan ge ûi hâ i khami ge ûi.
Rehabeammi di surib
18 Rehabeammi ge Mahalats, Davidi ôab Jerimoti ôasa ge ǃgame. ǁÎs di îs ge Eliab ôa tsî Isaib ǁnuris Abigailsa ge i. 19 ǁÎra ge ǃnona ǀgôagu, Jeusi, Semarjab tsî Sahammi tsîga ge ūhâ i. 20 Egab ge ǁîba Absalommi ôas Maakas ǀkha ge ǃgame tsîra ge haka ǀgôagu, Abiab, Ataib, Sisab tsî Selomiti tsîga ge ūhâ i. 21 Rehabeammi ge ǀhaob ai disiǁkhaisaǀa taradi tsî ǃnanidisi xōǀkhātaradi tsîna ge ūhâ i, tsîb ge ǀgamdisiǁkhaisaǀa ǀgôagu tsî ǃnanidisi ǀgôadi tsîna ge ǁorabahe. ǁÎb di taradi tsî xōǀkhātaradi hoadi xab ge Maakasa ǃnasase ge ǀnam i, 22 tsîb ge Maakas ôab Abiaba ǃgâsan hoan di danase mâi tsî ǁîba, gao-aoseb nî saoǃgon bise ge ǁgaumâi. 23 Rehabeammi ge gā-aise dī tsî ǀgôagu âba ǁguiǂamde mā tsî ǁîga ǃkharagaguse, Judab tsî Benjaminni di omǂnamisa ǃādi ǃnâ ge ǁan kai. ǁKhātib ge ǁîga ǃnāsa ǂûna mā tsî ǂgui taradi tsîna ge ūba.
© Khoekhoegowab Elobmîs © Bible Society in Namibia, 2020.
