Davidi ǀuniga mîmādi, Tempeli di ǂnubihes ǃaroma
1 Gao-aob Davidi ge hoaraga ǂamkhoegu Israeli digu, Jerusalems ǃnâ nî ǀhao ǃkhaisa ge mîmā. O gu ge ǃhaodi di ǂamkhoegu hoagu, gao-aob di ǂamkhoegu, ǃhaoǃnādi di ǂgaeǂgui-aogu, gao-aob di xūn tsî ǂgarib tsîn di mûǂamaogu, gao-ommi di ǂamkhoegu, ǂoaǂamsa toroǃkhamaogu tsî ǂansa aogu hoaga Jerusalems ǃnâ ge ǀhao. 2 Ob ge Davida ǁîgu aiǃâ mâ tsî ge mî: “Ti horesago, ǃgâ te re. Tita ge ǃGaeǀhaos ǂGaes, ǂaiǃnaos ǃKhūb sada Elob disa omma ra ǂnubiba ǂgao. Tsî ta ge ǀnai ǁîb ǃgôasib ǃoa ta Tempela nî ǂnubise aiǂhomisende ge dī, 3 xaweb ge ǁîba ǁnāsa ta nî dīsa ge ǂkhā te, toroǃkhamaota a tsî ta ge kaise ǀaoǂnâxū amaga. 4 ǃKhūb, Israeli di Elob ge tita tsî ti ôananôagub tsîna, Israela da ǀamos kōse nî ǂgaeǂguise ge ǁhûiǂui. ǁÎb ge Judab ǃhaosa ge ǁhûiǂui, ǂgaeǂgui-aob ǁîsa xu nî ǀkhīse, tsîb ge Judab ǃhaosa xu ti îb ǀaokhoena ge ǁhûiǂui. ǁNā ǀaokhoen hoana xub ge ǁîba tita ū tsî hoaraga Israeli ǂama gao-aose ge mâi. 5 ǁÎb ge ǂgui ǀgôaga ge mā te tsîb ge ǁîgu hoaga xu Salomoba, ǃKhūb di gaosib Israelab nî ǂgaeǂguise ge ǁhûiǂui.
6 “ǃKhūb ge tita ǃoa ge mî: ‘Sa ôab Salomob ge tita Tempela nî ǂnubiba. Tita ge ǁîba ǀgôase ge ǁhûiǂuibasen tsî ta ge ǁîba ǁgûse nî iba. 7 Ti ǂhanugu tsî mîmādi tsînab ga nēsib ra dī khami a ǁnâuǀnam, o ta ge ǁîb di gaosisa ǀamos kōse nî aiǃgû kai.’
8 “ǁNā-amaga ta ge sada Elob tsî nē ǀhaohâb Israeli dib di ǃKhūb aiǃâ ra mîmā du, ǃKhūb sada Elob ge mîmā xūn hoana du nî ǁnâuǀnamsa, î du nē ǃgâi ǃhūba ūhâǀgara ǁkhā tsî hâhâ ra ǀumis ase sadu ôananôaguba ǁnāxūba.”
9 Tsîb ge Salomob ǃoa nēti ge mî: “Ti ôatse, sa aboxagu di Eloba ǂanǃgâ, îts ǁîba sa ǂgaob hoab tsî ǂâis ǀkha ǃoaba. ǃKhūb ge sada hoaraga ǂâidi tsî turagu tsîna a ǂan. ǁÎb ǃoats ga sī, ob ge nî ūǃoa tsi, xawe ǁîba xuts ga dabasen, ob ge hoaragase nî ǁnāxū tsi. 10 ǂAn ǁnâi re, ǃKhūb ge ǁîb di ǃanu Tempelats nî ǂnubise ǁhûiǂui tsisa. Nēsi ǁnā sîsenni ǀkha tsoatsoa, î ǁîba ǁgui-aisase dī.”
11 Davidi ge Salomoba Tempeli omgu, sâuǃnâ-omgu, nau omgu hoagu tsî Hoan xa ǃAnu ommi, ǁoren ǀûbas ra dīǃnâheb tsîn dī-aihe hâ ǁgaeǁgaeba ge mā. 12 ǁÎb ge ǁkhāti ǁgaeǁgaeb omǂnamigu tsî ǁîgu ǂnamipe hâ ǃnā-omdi tsî sâuǃnâ-omgu, Tempeli xūn tsî ǃKhūb khaibahe hâ ǀkhaexūn digu diba ge mā bi, 13 tsî pristergu tsî Leviǁîgu nî dī ǃoabadi diba, Tempeli ǃnâ ǃoaba tsî gu Tempeli di xūna nî ǃûiǃgâse. 14 ǁKhātib ge ge mîmā, mâtikō ǀhaiǀurib tsî ǃhuniǀurib tsîn nē sîsenūxūna kurus ǃaroma nî sîsenūhesa, 15 tsî mâ ǃamǀaes tsî ǃamǀaekandelari ǃaroma, 16 ǀhaiǀuri tāgu tsî mâ ǃhuniǀuri tāb, Elob ra ǁguibahe peregu ra ǁgui-aiheb hoab ǃaroma. 17 ǁÎb ge ǁkhāti ge mîmā, mâtikō ǃūmû ǃhuniǀurib nî sîsenūhesa, ferkhegu, ǃoredi tsî xapagu ǃaroma tsî mâtikō ǀhaiǀuriba xapana kurus ǃaroma, 18 tsî mâtikō ǃūmû ǃhuniǀuriba ǃgâihamxūn di ǀanǀanaltars ǃaroma tsî ǁkhāti xerukha, ǁgabokha âkha ǃGaeǀhaos ǂGaes ǃKhūb dis ǂama ra khoraǂuikha di kunis ǃaroma. 19 Gao-aob Davidi ge ge mî: “Nē xūn hoan ge ǃKhūb ge aitsama, dī ta nîse a mîmā te xoaǁguigu ǃnâ a ǃkhōǂgāsa.”
20 Gao-aob Davidi ge ǁîb ôab Salomoba ge mîba: “ǃGâiǂâi, îts mâǀgai tsî sîsenni ǀkha tsoatsoa. Tā i xū-i xare-e ǃao kai tsi. ǃKhūb Elob, ǁîba ta ra ǃoabab ge sats ǀkha nî hâ. ǁÎb ge ǁnāxū tsi tide tsî ǁîb Tempeli di sîsennats nî dītoas kōse nî hâǀkha tsi. 21 Pristergu tsî Leviǁîgu tsîgu ge Tempeli ǃnâ gu nî dī ǃoabade ǀgoraǂuibahe hâ. ǃKharagaǃnâgu sîsenni ǂande ūhâ sîsenaogu ge hui tsisa a māsenxa tsî hoaraga ǁaes tsî ǁîn ǂgaeǂgui-aogu tsîn ge sa mîmās ǀguisa ǃâu hâ.”
© Khoekhoegowab Elobmîs © Bible Society in Namibia, 2020.
