ǃHūb ǃnâ ge ǃgau ǃhaodi
1 ǃKhūb ge Kanaanǁîn ǃoagu ge hâ i torogu ǃnâ ge ǀkhai i Israelǁînab nî ǃâitsâse nē ǃhaode ǃhūb ǃnâ ge ǁnāxū. 2 Mâ surib Israelǁîn dib hoabab torob xa nî ǁkhāǁkhāseb ge ǃKhūba nēsa ge dī, ǀō-aisase ǁnān noxopa ge toro-i ǃnâ hâtsâ tama hâ in ǃaroma. 3 ǁNān ǃhūb ǃnâ ge ǁnāxūhe hâ in ge koro Filisteǁîǃādi, hoaraga Kanaanǁîn, Sidonǁîn tsî Hivǁîn Libanonǃhomgu ǃnâ, Baal-Hermonǃhomma xu Hamats ǃgâunas tawats ra sīs kōse ge ǁan hâ in tsîna. 4 ǁÎn ǀkhan Israelǁîna nî ǃâitsâhegan ge ǁîna ge ǁnāxūhe, î-i ǂanǂuihe isen Israelǁîna ǃKhūb ge ǁîn di aboxana Moseb ǃnâ-u mā mîmāde nî ǁnâuǀnams tamas ka ion ǁnâuǀnam tidesa. 5 Tsîn ge Israelǁîna Kanaanǁîn, Hetǁîn, Amorǁîn, Perisǁîn, Hivǁîn tsî Jebusǁîn tsîn ǁaegu ge ǁan. 6 ǁÎn ge ǁnā ǃhaodi di khoen ǀkha ǃgameǃnâgu tsî ǁîn di elona gere ǀgoreǀî.
Otnieli
7 Israelǁîn ge ǃKhūb ǁîn di Eloba ge ǀuru; ǁîn ge ǁîb ǃoagu ǁore tsî Baali tsî Aseras tsîra di ǁgôa-elo-īga gere ǀgoreǀî. 8 Ob ge ǃKhūba Israelǁîn ǀkha ǁaixa tsî ǁîna Mesopotamiab di gao-aob Kusan Risataimmi ǃomǁae ge māǁnâ tsîb ge ǁîna dan tsî ǁkhaisa kuriga ge gaoǂam. 9 Israelǁîn ge ǃKhūb ǃoa a ǂgai, ob ge ǁîba ǁîna ǀgui khoeba ge sîba, ǁîna ge huiǂuiba. ǁNāb ge Kaleb di ǂkham ǃgâsab Kenasi di ôab Otniela. 10 ǃKhūb di gagab ge ǁîb ai ge hā tsîb ge ǁîba ge Israeli di ǂgaeǂgui-ao kai. Otnieli ge toroba ge ǃkhamǃgû tsîb ge ǃKhūba Mesopotamiab gao-aob ǂama dansa ge mā bi. 11 Hakadisi kurigab ge ǂkhîba ǃhūb ǃnâ ge hâ i tsî ǁnās khaoǃgâb ge Otniela ge ǁō.
Ehudi
12 Israelǁîn ge ǁkhawa ǃKhūb ǃoagu ge ǁore, ǁnā-amagab ge ǃKhūba Moab gao-aob Eglonna Israelǁîn ǃoagu ge ǀgaiǀgai. 13 Eglonni ge Amonǁîn tsî Amalekǁîn tsîn ǀkha ǀhû tsî Israelǁîna dan tsî palmhaidi ǃās Jerixosa ge ū. 14 Tsîn ge Israelǁîna disiǁkhaisaǀa kuriga Eglonna gere ǃoaba.
15 Israelǁîn ge ǁîb ǃoa a ǂgai, ob ge ǃKhūba ǁîna nî ǃnora kai khoeba ǁîna ge sîba. ǁNāb ge Benjaminni ǃhaos di aob Gerab di ôab Ehudi, ǁare ge i khoeba. On ge Israelǁîna Ehuda ǀkhaexūn ǀkha Moab di gao-aob Eglonna ǃoa ge sî. 16 Ehudi ge hoaǀkhākha ai a ǀā gôab, ǁaubexa ǃkhare metera a gaxuba ge dībasen. Tsîb ge ǁnā gôaba amǀkhāb ǂgommi âb ai saran ǃnaka ge ǃgaemâi. 17 ǁNās khaoǃgâb ge ǀkhaexūna Eglonni, kaise ge kausa iba ge ī-ūba. 18 Ehudi ge ǀkhaexūna a mā bis khaoǃgâb ge gao-aoba, ǀkhaexūna ge tani hâ i khoega oa kai. 19 Xawe Ehudi ǂûb ge ǃgaoǂuisa ǀui-īgu Gilgals ǀgūse hâga xu dabasen, tsî gao-aob Eglonna ǃoa oa tsî ǁîb ǃoa ge mî: “ǃGôahesatse, ǂganǃgâsa ǂhôa-e ta ge ūba tsi hâ.”
Ob ge gao-aoba ǁîb ǃgāga “Sikhoma ǀguri ǁnāxū” ti ge mîmā, o gu ge ǁîgu hoaga ge ǂoa.
20 Ob ge Ehuda gao-aob ǀguri ǁîb di karasaǃnâ ǃnā-oms, oms ǂamǃnâ mâs ǃnâ ǂnôa hîa ǁîb tawa ǀgūse sī tsî ge mî: “Eloba xu hâ ǂhôa-e ta ge ūba tsi hâ.” Ob ge gao-aoba ge khâimâ. 21 Ob ge Ehuda ǁîb di ǁareǀkhāb ǃommi ǀkha gôaba amǀkhāb âba xu ǂgaeǂui tsî gao-aob ǃnāb ǃnâ ge ǃkhāǂgā. 22 Gôab ge ǃkhō-aiǃkhaib hoab ǀkha ge ǂgâ tsîb ge kauba hoaraga gôaba ge ǃgūǂgan. Ehudi ge gôaba gao-aob ǃnāba xu ǂgaeǂui tama ge i tsîb ge gôaba gao-aob di ǃgâbǀkhāb ai, ǀnūkha âb ǁaegu sī ge ǂoa. 23 Ob ge Ehuda ǂoa, dao-amde ǂganam tsî ǃnâu-am 24 tsî ǁnāpa xu ge ūbēsen. Tsî ǃgāgu ge dao-amdi a ǂganamsa ǃkhaisa gu ge hā a mûo, gao-aob ǃnā-oms ǃnâ ǂkhari-omǂnû hâ ti ge ǂâi. 25 ǃÂu ǁkhā gu as kōse gu ge ǃâu, xaweb ge gao-aoba dao-amsa ǁkhowa-am tama i, tsî gu ge ǁkhowa-amma ū tsî ǁîsa a ǁkhowa-am, ob ge ǁîgu di ǀhonkhoeba ǁnāpa ge ǁōǁgoe i.
26 Ehudi ge ǁîgu ge ǃâu hâ i ǁaeb ǃnâ ge ûiǂoa. ǁÎb ge ǃgaoǂuisa ǀui-īga-u ǃkharu tsî Seiras ǁga ge ǃkhoeni. 27 Tsîb ge Efraimmi di ǃnâuxa ǃhūb ǃnâb ge oasī, o xâiǁnâsa ge xâi, Israeli aogab ǃkhammi ǃoa nî ǂgaiga; tsîb ge ǁîga ǃhomga xu ǂgaeǂguiǁgôa 28 tsî ge mî: “Tita sao, ǃKhūb go sadu khākhoen Moabǁîn ǂama dansa mā du xuige.” O gu ge Ehuda sao tsî Moabǁîn Jordanna nî ǃgâuse ī ǃkhaisa ge ū, tsî khoe-i xare-e ǃgâu i nîsa mā-am tama ge i. 29 ǁNātsē gu ge ǁîga disiǀoadisi, ǂoaǂamsa toroǃkhamaogu Moabǁîn diga ge ǃgam; ǀguib ǁîgu dib tsîn ge ûiǂoa tama ge i. 30 ǁNātsēn ge Israelǁîna Moabǁîna ge dan tsîb ge ǂkhîba ǁkhaisadisi kuriga ǃhūb ǃnâ ge hâ.
Samgari
31 Anati ôab Samgari ge Ehudi khaoǃgâ ge ǂgaeǂgui-ao kai. ǁÎb tsîn ge ǃnanikaidisi Filisteǁîga sommi ǀkha ǃgam tsî Israelǁîna ge huiǂui.
© Khoekhoegowab Elobmîs © Bible Society in Namibia, 2020.
