Koaǁnaetsanas
1 Dâxase ǃKhūb ǃnâ ǁnae re sadu ǂhanu-aido!
Kares ge ǂhauǃnâ-e anu hâ.
2 Kare re ǃKhūba harpdi ǀkha,
disiǁapaxa harps ǀkha ǃgâi ǀōba dība bi.
3 ǀAsa am-e ǁnaeba bi
ǂans ǀkha dâxa ǀōb ǀkha.
4 ǃKhūb di mîs a ǂhanu-ai
tsîb ǁîb di hoaraga sîsenni ǃnâ a ǂgomǂgomsa xuige.
5 ǁÎb ge ǂhanub tsî ǂhanu-aisiba a ǀnam;
ǃhūbaib hoab ge ǃKhūb di hâhâ ra ǀnammi xa ǀoa hâ.
6 ǃKhūb ams di mîde xu gu ge ǀhomga ge ǂnubihe;
tsî ǁîgu di ǂnubis hoasa ǁîb ams di ǀomma xu.
7 ǁÎb ge ǁgamgu hurib diga ǀguis ǃkhais ais ase ra ǀhaoǀhao
ǁîb ge ǁîga sâuǃnâ-omgu ǃnâ ra sâu.
8 Ab ǃhūbaib hoaba ǃKhūba ǃao re
în hoa ǁanǂgāsaben ǃhūbaib dina ǁîba ǃaoǃgâba ūhâba.
9 ǁÎb ge ǃhoa, o i ge ī;
tsî ǁîb ge mîmā, o i ge mâ xui-ao.
10 ǃKhūb ge ǃhaodi di ǀapede ra hîkākā
ǀapedi ǁaedi dideb ge ra ǁauxūdī.
11 ǃKhūb di ǀapes ge ǀamose ra hâ
tsî ǁîb ǂgaob di ǀapede ǃhaosa xu ǃhaos kōse.
12 ǀKhaehes ge hâ ǁnā ǁaes ǁîs di Elob a ǃKhūsa
ǁnā ǁaes ǁîb ǀumis aseb ǁhûiǂuibasen hâsa.
13 ǃKhūb ge ǀhomma xu kōǁnâ
tsî khoen ôan hoana ra mû;
14 ǁîb ǁanǃkhaisa xub ge ra kō
ǃhūbaib ai ǁan hân hoana.
15 ǁÎb hîa ǁîn di ǂgaoga ge kurub
ge sîsengu âna ra ǁnâuǃā.
16 Gao-ao-i ǁî-i di kai toroǂnubis xa ǃnoraǃnorahe ǁoa
ǃkhais ǁkhās khami i ge toroǃkhamao-e ǁî-i kai ǀgaib xa ǃnoraǃnorahe tama hâ.
17 Torob di hāb ge dans di ǃâubasen tama hâ
mâtikōseb ga ǀgaisase mûsen xaweb ge hui tama hâ.
18 Mû, ǃKhūb di mûs ge ǁnān ǁîba ra ǃaoǃgân ai hâ
ǁnān ǁîb di hâhâ ra ǀnammi ai ra ǂgomaiǂnûin ai;
19 ǁîn ûiga ǁōba xu sâu;
tsî ǁîna ǃâtsūǀkhāb ǃnâ ûitsamase nî ūhâse.
20 ǃKhūb ai da ge ra ǂgomaiǂnûi
ǁîb a sida hui tsî ǁkhaukhō xui-ao.
21 Sida ǂgaogu ge ǁîb ǃnâ ra ǃgâiaǂgao
ǁîb ǃanu ǀons ai da ra ǂgomaiǂnûi.
22 Ab sa hâhâ ra ǀnamma sida ai hâ re
sats ai da ra ǂgomaiǂnûis ǁkhās khami.
© Khoekhoegowab Elobmîs © Bible Society in Namibia, 2020.
