1 ǀGâsa khoe-i ga gā-ai, o i ge ǃgâi ǃaromas ǂnīsa i nîs disa ūhâ tsî i ge ǀgapi khoe-i ti nî ǂâihe.
Īsigu
2 Tā khoe-e ǁî-i di ǃgâi īsib ai koa. ǀNî ǀkhāb ai tā khoe-e ǁî-i di anusa tama īsib ai kō. 3 ǂÛn hoan xa ǂkhon ǂû-i ge ǃhabun hîa a ǂkhariron xa ra kuruhe. 4 Tā îsa saranats ana hâ ǃkhais ǀkha koasen tsî ǀharexa sarana ana hân hîa ǃgomma ra tsâna ǃhō. ǃKhūb ge buruxa xūn khoen xa tātsē mûhe tamana ra dī. 5 ǂGui gao-aogu ge ǁîgu ǁkhāsiba ge ǂoaǃnâ tsîn ge khoen hîats ge ǀnai ǁîn xa ǁnâu tama hâ ina, ǁîgu di ǃkhaide ge ǃkhōǃkhuni. 6 ǂGui ǂgaeǂgui-aogu ge taotaosiba ge tsâ. ǂGui ǂanǂansa khoegu ge ǀnîn di ǃomgu ǃnâ ge ǁnā.
ǂAnbasen
7 ǀAuts nîs aiǃâ sa amaba ǂhanuse ūhâ tsî ǂâiǃgâ. 8 Tā ǃhoa ra khoe-e ǃhoaǀgara, ǃereamts nîs aiǃâ tare-e i ra mî ǂgao ǃkhaisa aibe ǃgâ. 9 Tā sats ǀkha dīxū-e ūhâ tama xū-i ǃaroma ǂnoagu. Tā ǁore-aon ra dī mîǁguib ǃnâ ǁhao.
10 Ti ôatse, tā ǂgui xūn ǃnâ dīxūxa. ǂGui xūna dīsats ga dītsâ, ots ge ǁîn ǃaroma ǃgomma nî tsâ. Sa sîsengats ge dītoa ǁkhā tide tsîts ge ǁkhāti ǁnāpa xu bē ǁkhā tide. 11 Aiǁgaus ase, nēbab ge ǀgui khoeb, khobo-i khami sîsenǀû tamase ra sîsenna hâ, xawe ob hâo, ǁaeb khaos ai ra hâ. 12 ǀNî ǀkhāb aib ge ǀnî khoeba kaise ǀgâsa tsî sîsenna dī ǁoa. ǁÎb ge a ǂau tsî huiba ǂhâba ǁkhā, xaweb ge ǃKhūba ǁîb ǀkha a ǂkhî tsî ǂkhabusa mâsiba xu ra ǂgaeǂui bi. 13 Tsî ǁkhawab ra ǂaidi ai hā, o-i ge mâ-i hoa-e ra buru.
14 Xū-i hoa-i ge ǃKhūba xu ra hā: ǃGâiǃgâb tsî ǂoaǃnâs, ǀgâsib tsî ǃkhūsib, ûib tsî ǁōb, 15 gā-aisib, ǁnâuǃāb, ǂans ǂhanub dis, ǀnammi tsî ǃgâina dīs; nēn hoan ge ǃKhūba xu ra hā. 16 Dīsādi tsî ǃkhaenab ge tsoatsoasa xu ǁore-aon ǀkha ge hâ i tsî ǁnān hîa ǂkhaba xūna dīs ǃnâ ǃgâiǃgâibasensa ūhân ge aiǃâb ǃoa, ǁōn nî tsēs kōse nî ǂkhabadī. 17 ǃKhūb di ǀkhaexūn eloǃaoǃgâxa khoenab ra mān ge ra mâǃkharu. ǁÎb ga ǃgâiǃgâibasensa sats ǃnâ ūhâ, ots ge nî ǃgâiǃō. 18 Khoeb ge ǀgaisa sîsenni ǀkha a ǃkhū ǁkhā ǁkhoaxasiba xu ǁkhaesen tsî, xawe ǁî-i ǃaroma tare-eb ra hō? 19 ǁÎb ga ǁî-aitsama mî: “Nēsi ta ge ǂnû-oasen tsî sîsenba ta ge xūn ǀkha ǁâudī ǁkhā.” Xaweb ge mâtikōseb ǁōb nîs aiǃâ nî ûi ǃkhaisa a ǀū tsî ǁîb di ǃkhūsiba ǀnîn ǀkha nî ǁnāxū.
20 Sa sîsenni tawa mâ, î ǂâisa ǁîb ai ǂnûi tsî ǁîb tawa kaira. 21 Tā ǁore-aon ra amǁnāna suri, sa sîsenni ai ǀgui ǂâisa ǂnûi, î ǃKhūb ǃnâ ǂgom. ǃKhūb tawa i ge kaise supu, ǀgâsa khoeba ǀāsetimîsi ǃkhū kaisa. 22 Eloǃaoǃgâxa khoen ge mādawa-ams ase ǃKhūb di ǀkhaeba nî ǃkhōǃoa tsî ǀkhaeb ge ǃhaeǁaeb ǃnâ māhe ǁkhā. 23 Tā ǂhâts hâ xūn tamas ka io hānîǁaeb tare-e ǃkhōǂgāba tsi hâ ǃkhais xa ǂâiǂhansen. 24 ǀNî ǀkhāb ai “Tita ge ǂhâba ta hâ xūn hoana ūhâ. Hānîǁaeb ǃnâ i ge xū-i xare-e tita ǀkha tsūse ī tide” ti tā ǂâi. 25 Xūn ga ǃgâise ǃgû, on ge khoena tsū ǁaeb xa ǂâi tama hâ tsî xūn ga ǃgâise ǃgû tama i, on ge ǃkhūsib xa ra ǀuru. 26 ǃKhūb ge supuse khoe-i nî ǁō tsēs kōse, mādawa-ams tamas ka iob nî ǁkharasa ǃâu ǁkhā. 27 ǁNā ǁaeb ǃnâ gu ge mûhe gu nîga, ǁîb di sîsenga nî ǂhaiǂhaihe. ǁÎb di hoaraga ǃgâiaǂgaob ge ǀgui mûǀapirob, tsūǃgâb dib ǃnâ a ǀariǂuihe ǁkhā. 28 Tā ǁōb aiǃâ i khoe-e ǃgâiǃō ûiba ūhâ ti ǂâi, amasets ǁî-ets ǁō i nîs aiǃâ ǃgâise ǂan ti mî ǁoa xuige.
Mâtits sa ǀhōsana nî ǁhûi ǃkhaisa ǂan
29 ǂAnbasen, î tā gā-ai khoen, ǂgui ǀgaugu ai gāxaǃnâ da ǁkhā xuige, mâ khoe-i hoa-e sa oms ǃnâ ǁkhoreǁhare. 30 ǀHomani-i ra ǁnoas ǃnâ ǃkhōhe khami, ǁnātib ge ǀgapiǂâixab di ǂgaoba ī, ǂhiras hîa ǀkhauǃās nî xū-e ra kōmas khami. 31 ǂKhabadī-aob ge ǃgâiba ǂkhabab ǃnâ ra ǀkharaǀkhara tsî sa ǃgâidīga ra ǀgoraǃgâ. 32 ǀGui naniros ge ǂgui ǂnomna ra kau kai tsî eloxoresab ge ǀaobab nî ǂnâxūsa ǃâu hâ. 33 ǁNāti ī khoen tsî ǁî-i di ǂkhaba ǀapede ǂanbasen; ǁîn ge hoaragase nî hîkākā du. 34 ǃHaokhoe-ets ga sats ǀkha sa oms tawa hā-ū, o-i ge ǂkhabab ǀguiba sats tsî sa omaris din ǁaegu nî ǃaroma.
© Khoekhoegowab Elobmîs © Bible Society in Namibia, 2020.
