Saulub di ǃhobasens
(ǃNaeǃkhaidi 22:6-16ǃNaeǃkhaidi 26:12-18)1 Saulub ge ǁaib xa ǀoa hâse ǃKhūb di ǁkhāǁkhāsabega* ǃgam ǁkhāb as kōse gere ǁēba. ǁÎb ge ǀgapipristeri* tawa sī tsî 2 mā-amǂkhanidi hîa Damaskus di sinagogegu* ǁga xoasade ge ǂgan, îb ǃKhūb di Daoba ra saona, aoren kas taren kas hoasa ǃkhōsis ǃnâ ū tsî Jerusalems ǁga ǃgû-ū.
3 Tsî nē sîǂuis ǀkhab Damaskusa ra ǀgū hîa i ge ǂkhai ra ǃnâ-i ǀhomma xu hâ-e ǃnapetamase ǁîb ǂnamipe ge ǃnâ. …Damaskusa ra ǀgū hîa i ge ǂkhai ra ǃnâ-i ǀhomma xu hâ-e ǃnapetamase ǁîb ǂnamipe ge ǃnâ. 4 Tsîb ge ǃhūb ai ǁnā tsî dom-i “Saulutse, Saulutse tare-i ǃaromats ra ǃgôaǃgon te?” ti ra mî-e ge ǁnâu.
5 Ob ge Sauluba “Taritsa ǃKhūtse?” ti ge dî. Ob ge domma ǁîba ge ǃeream: “Tita Jesuta sats xa ra ǃgôaǃgonheta ge. 6 Xuige nēsi khâi, îts ǃās ǃnâ ǂgâ, ǁnāpats ge tare-ets nî dī ǃkhaisa nî mîbahe.”
7 Saulub ǀkha ge hâ i khoegu ge ge ǃnōmâ, dom-i hîa ra ǃhoa-i ǀgui-e gu ge ǁnâu, xawe gu ge khoe-e mû tama hâ i ǃkhais xa. 8 Tsî ǃhūba xu khâi tsîb ge mûra âba ǁkhowa-am, xaweb ge xū-e ge mû ǁoa i. O gu ge ǁîb ǀkha ge hâ iga ǁîba Damaskus kōse ge ǃkhōǁôa. 9 Tsîb ge ǃnona tsēdi di ǁaeba mû ǁoase ge hâ tsî nē ǁaeb hoaba ǁkhāti xū-i xare-e ge ǂû tamas ka io ā tama hâ i.
10 ǁNā ǁaeb aib ge Damaskus ǃnâ Anania ti ǀon hâ ǁkhāǁkhāsabeba ge hâ i. Tsîb ge ǃKhūba ai-i ǃnâ “Ananiatse!” ti ge mî.
Ob ge “ǃKhūtse, nē ta ge a” ti ge ǃeream.
11 Ob ge ǃKhūba ǁîb ǃoa “Khâi, îts Judab di oms hîa ‘ǂHanu’ ti ra ǂgaihe ǃganni ǃnâ mâs ǁga ǃgû. ǁNāpats ga sīo Saulub hîa Tarsusa xu hâba dî re. ǁÎb ge nēsi ǀgores ǀkha a ǀhabe. 12 ǁÎb ge ǁkhāti ai-i ǃnâ Ananiab ti ǀon hâ khoeb hîa ǁîba ǁkhawab nî mû ǁkhāse ǃomkha ra ǁgui-aiba go mû” ti ge mî. 13 Ob ge Ananiaba ge ǃeream: “ǃKhūtse, tita ge ǀnai ǂgui khoena xu nē khoeb ra mâtikōse sa ǃanun Jerusalems ǃnâ hâna tsūse sîsenū ǃkhaisa ge ǁnâu. 14 Tsî ta kom ǁkhāti danapristergu xab sa ǀonsa ra ǂgaiǀîn hoana ǃkhōsis ǃnâ ūs di ǀgaiba ge māhe ǃkhaisa ge ǁnâuo.”
15 Ob ge ǃKhūba ǁîba ǃoa ge mî: “ǃGû, ǁîb ge ǁnāb tita ǀō-aisase ǁhûiǂuibasen hâba, ti ǀonsab Jodeǁî taman,* gao-aogu tsî ǁkhāti Israelǁîna nî ǂhôase. 16 Tsî ta ge tita mâtikōseb ǁîba ti ǀons ǃaroma nî tsâ ǃkhaisa ǁîba nî ǁgau.”
17 Tsîb ge Ananiaba ǃgû tsî Saulub hâǃnâ oms ǃnâ ǂgâ tsî ǃomma ǁgui-ai bi tsî ǁîb ǃoa “Ti ǃgâ, Saulutse, ǃKhūb Jesub satsa go ǃgoaxats go i daob ǃnâ ǂhaib ge tita sats ǁga go sî, sats nî ǁkhawa mû ǁkhā tsî ǃAnu Gagab xa ǀoaǀoahese” ti ge mî. 18 Tsî ǁnātimîsin ge ǁaub di ǂhawiron khami ī xūna mûra âba xu ge ǁnā tsîb ge ǁkhawa ge mûtsoatsoa; ob ge ǁnāpa xu khâi tsî ge ǁāǁnâhe. 19 Tsîb ge ǁkhāti ge ǂû, sorosi ǀgaib âbab nî hō-oase.
Saulub ge Damaskus ǃnâ ra aoǁnâ
Tsîb ge Sauluba Damaskus ǃnâ ǀnî khami kō tsēde ǂgomsaben ǀkha ge hâ. 20 ǁNātimîsib ge sinagogegu ǃnâ ge aoǁnâtsoatsoa, ǃkhō-am rase “Jesub ge amase a Elob ôa” ti.
21 Nēsa ge ǁnâun hoan ge kaise ge burugâ. Tsîn ge “ǁÎ tamaba kha Jerusalems ǃnâ ge Jesuba ra ǀgoreǀî khoena gere hîkākāba tsî kha ǁkhāti ǁkhā ǂâibasens, ǁîna ǃkhōsis ǃnâ ū tsî ǀgapipristergu ai ǁkhaeǁnâs dis aib hā tama hâ?” ti gere mî.
22 Tsîb ge Sauluba gagasise ǀgai tsî Jesub amase a Xristu* ǃkhais di ǂhôas hîab ǁîsa gere ǂhôas ǀkha kaise ǂgui Jodeǁîn Damaskus ǃnâ hâna gere gowadan. 23 O gu ge ega Jodeǁî ǂgaeǂgui-aoga ǁîba gu nî ǃgam ǃkhaisa ge ǀapeǀhao. 24 Xaweb ge Sauluba ǁîgu di ǀapeǀhaos tsî ǁîgu ra tsēb tsî tsuxuba ǃās di ǂgâ-amsa ǁîba nî ǃgamse ǃûi ǃkhaisa ge ǁnâu. 25 On ge ǀgui tsuxuba ǀnî ge hâ i ǁkhāǁkhāsabena ǃās omǂnamib ǃnâ ge hâ i soa-i ǃnâ-u ǀharu-i ǃnâ ǁîba ge huiǁgôa.
Saulub ge Jerusalems ǃnâ ra aoǁnâ
26 Jerusalems tawab ge sī, ob ge Sauluba ǁnāpa hâ ǁkhāǁkhāsaben ǀkha ǀhaosa ge dītsâ, xawen ge ǁîna ǂgomsabekhoe dīsenni ra khami tsâ tsî kaise ǁîba gere ǃao. 27 Ob ge Barnababa Sauluba apostelgu* tawa sī-ū tsî ǁîga mâtib ge ǁîba Damaskus di daob ai ǃKhūb xa ǃhoa-ūhe tsî a mû bi ǃkhaisa ge mîba. ǁKhātib ge mâtib Sauluba Damaskus ǃnâ ǁkhoaǂgaose Jesub di ǀons ǃnâ gere aoǁnâ ǃkhaisa ge mîba gu. 28 Saulub ge apostelgu ǀkha ǀguipa hâ tsî ǁîgu ǀkha ǀhû hâse hoaraga Jerusalems ǃnâ ǃKhūb ǀonsa ǁkhoaǂgaoxase gere aoǁnâ. 29 Tsîb ge Grikegowaba ra ǃhoa Jodeǁîgu ǀkha gere ǂgaenamǃgâgu xawe gu ge ǁîga ǁîba ǃgamsa gere ǀapeǀhao. 30 Nau ǂgomsaben ge nēsa ǁnâu on ge Kaesareas tawa sī-ū bi tsî ǁîb ǃnaeǃās, Tarsus ǃoa ge sî-oa bi.
31 Ob ge kerkheba ǃaruǀî ǃaob ǃnâ ûi tama i tsî Judeab, Galileab tsî Samariab* ǃnâ ǂkhîba ūhâ tsî ǃgôab ǃnâ ge ǀarosen. ǁKhātin ge ǂgomsabena ǃKhūb di ǃaoǃgâb tsî ǃAnu Gagab ti ǁkhaeǂgaob ǃnâ gere ûi.
Petrub ge Lidas tsî Jopas ǃnâ buruxa sîsenga ra dī
32 Ob ge Petruba ǃādi ǃnâ ǃgû tsî ǂgomsabena gere sari tsîb ge ǁîb di ǃgûmadi ǃnâ Lida ti ǀon hâ ǃās ǃnâ ge ǁan hâ i Elob di khoen tawa ge sī. 33 Tsîb ge ǁnāpa ǁkhaisa kuriga ǁgoes ǀguisab ra hîse ge ǃhora i khoeb, Aenea ti ǀon hâb ǀkha ge ǀhao. 34 Ob ge Petruba ǁîb ǃoa ge mî: “Aeneatse, Jesub Xristub ge go ǂuruǂuru tsi. Khâima îts kharob âtsa ūkhâi.” Tsîb ge ǁnātimîsi ge khâimâ. 35 Aeneab ra ǃgû ǃkhaisan ge mû on ge hoaraga khoen Lidas tsî Sarons dina ǃKhūb ǃoa ge ǃhobasen.
36 Tsîs ge Jopas ǃnâ ǁkhāǁkhāsabes, Tabitasa ge hâ i. (Grikegowab ǃnâ Dorkas, “ǁkhamas” ti ra ǂâibasen.) ǁÎs ge khoena kaise ǃgâidī tsî ǀgâsana gere hui. 37 Xawes ge ǀaesen tsî ge ǁō. Tsîs ge soros âsa ǂhomihe tsî ǀgapiseb di ǃnā-oms ǃnâ khoen nî kōse ge ǁguihe. 38 Tsî Petrub Jopas ǀgūse Lidas ǃnâ hâ ǃkhaisan ge ǁnâu on ge ǀgam khoekha ǁîb ǃoa nēti nî ǀkhomase ge sî: “Toxopa ǃhaese sikhom ǀkha ǃgû re.” 39 Petrub ge ǁîkha ǀkha ge ǃgû tsî ǁnāpab ge sī, o Dorkas ge ǁgoeǃnâ i, ǀgapiseb di ǃnā-oms ǃnâ ge ǂgâ-ūhe. ǂGâb ge os ge ǁnā ǃnā-omsa ǃoataradi hîa ā tsî ǁîba saran tsî anaǂamsaran Dorkas xa di ge ǂombahe hâ ina ra ǁgaudi xa ge ǀoa hâ i. 40 Ob ge Petruba hoan hîa ǁnāpa ge hâ in nî ǂoa kaihe ǃkhaisa ǂgan, ǃhonǁgoa tsî ge ǀgore. Soros ǁga dabasen tsîb ge “Tabitase, khâi” ti ge mî. Mûdi âsa ǁkhowa-am tsîs ge Petrubas ge mûo ǂgōse ge ǂnû. 41 Tsîb ge ǃommi ai ǃkhō tsî ge huikhâi si. ǁÎb ge ǃoataradi tsî nau hoaraga Elob di khoena ǂgai tsî ǁîs ûitsama ǃkhaisa ge ǁgau.
42 Nē ǂhôas ge hoaraga Jopas ǃnâ ge ǂabaǂoa tsîn ge ǂgui khoena ǃKhūb ǃnâ ge ǂgom. 43 Tsîb ge Petruba ǂomxa ǁaeba Jopas ǃnâ Simonni hîa khōkuru-aob di oms tawa ge hâ.
© Khoekhoegowab Elobmîs © Bible Society in Namibia, 2020.
