Huib ǃaroma hâ ǀgores
ǁNaeǃnans ǂgaeǂgui-aob ǃoa: Lelidi ǃoa.
Davidi Psalms
1 Hui te re ti Elotse,
ǁgammi go ǃaob kōse ǀkhī xuige.
2 ǃGam ǂgoab ǃnâ ta ge ra domǂgâ,
mâhō ǁoa ta ab ǃnâ.
ǃGam ǁgamgu ǃnâ ta ge go ǂgâ
tsî gu ge ǁgamga ra dâuǂam te.
3 Huib ǃaroma ǂgais xa ta ge ǂkhabu hâ,
tsî ti dommi ge ra ǂan.
Ti mûra ge go ǁkhā ǁoa,
ti Eloba ǃâus xa.
4 ǃAroma-i ose ǁkhan te hân
ge ti danaǀûn ǃgâ-ai a ǂgui.
ǁNān hîkākā te ǂgao ran,
ǃaroma-i ose khākhoese ība ten
ge a ǀgaisa.
ǁÎn ge ǃnari tama ta ge hâ i xūna
ra mā-oa kai te.
5 Ti Elotse sats ge ti gâsiba a ǂan,
ti tsūdīgu ge sats tawa ǂganǃgâsa tama hâ.
6 Tān sats ai ra ǂgomaiǂnûina,
tita ǃaroma taotaohe re, ǃKhū Elo Hoaǀgaixatse.
Tān satsa ra ǂgaiǀîna,
tita ǃaroma taosib ǃnâ mâ re, Israels di Elotse.
7 Sats ǃaroma ta ge mîǁgaiǁgaide ge tani,
taob ge ti aisa ge ǃgū-ai.
8 Ti ǃgâsaga ta ge ǃhaokhoese ge ība,
ti îs di ôaga ta ge ǀūhesa khoese ge ība.
9 Sa omma ta ūba hâ ôasasib ge go dītoa te,
sats ra mîǁgaiǁgai-ūhe mîdi ge tita ai ra ǁnā.
10 ǂÛtama hâ tsî ta ge ā,
o ta ge ǁnās ǃaroma ge mîǁgaiǁgaihe.
11 ǀHaosarana ta ge ana,
xawen ge ge âiǂui te.
12 ǃĀs di dao-ams tawa ǂnôan ge tita xa ra ǃhoa,
ǀhoroseman ge tita xa ǁnae-amde ra kuru.
13 Xawe tita ge sats ǃoa ra ǀgore ǃKhūtse;
ǃkhōǃoahesa ǁaeb ǃnâ ǃeream te re ti Elotse.
Sa kai ǀnammi ǃnâ ǃeream te re,
sa ǀamo huib ǃaroma.
14 ǂGoaba xu huiǂui te re, î ta tā tsomǂgâ.
Ti khākhoena xu sâu te re,
ǃgam ǁgamga xu sâu te re.
15 Tā gu ǁgamga dâuǂam te re.
Tā gu ǃgam ǁgamga haraǂgā te re,
tsîb āba tā ti ǂamǃnâ ǂganamsen re.
16 ǁNâu-am te re ǃKhūtse sa ǀnammi di ǃgâisiba ǃoa,
ǁnâu-am te re sa ǀkhomxaǂgaosigu di kaisiba ǃoa.
17 Tā sa aisa sa ǃgāba xu gaugau re.
ǂŌǂōsib ǃnâ ta hâ xuige ǃhaese ǃeream te re.
18 ǀGūse hā, î hui te re,
ti khākhoena xu ore te re.
19 Sats ge a ǂan, mâtikōse ta ge mîǁgaiǁgaihesa,
mâtikōse ta ge taotaohe tsî ǃharaxūhesa;
ti khākhoen hoanats ge ra mû.
20 Mîǁgaiǁgaihes ge ti ǂgaoba go ǃan kai
tsî ta ge ǂkhabu hâ.
ǀKhomxaǂgaosiba ta ge ǃâu,
xaweb ge a ǀkhai.
ǁKhaeǂgao-aona ta ge ǃâu,
xawe i ǀgui-i tsîna a ǀkhai.
21 ǃÂ ta ge on ge ǃgāba ge mā te,
ǁgâ ta ge on ge ǀkhuruxûiba ge mā te.
22 Ab ǁîn di tāba ǁîna ǃnuise ība,
ab ǁîn di ǁguibas ǁâudība ǁîna ǁnoase ība.
23 A di mûdi âna ǂgī re,
a gu kamanagu âna ǀûs ose ǁnobe re.
24 Sa ǁaiba ǁîn ai ǁhōǂui re,
îb sa ǂhubi ra ǁaiba ǁîna hāǂam.
25 Ab hâǃkhaib âna ǀkhaiǃnâ,
a i khoe-i xare-e tā tentomdi ân ǃnâ ǃgau.
26 ǁÎn ge sats xa ǂnauhe hâna ra ǃgôaǃgon,
tsî sats xa tsuihe hân di tsûb xa ra ǃhoa.
27 ǁÎna ǁkharab ai ǁkharaba ǀaroba,
în tā sats xa ǃnora kaihe.
28 An ûib di ǂkhanisa xu ǀariǂuihe,
î tā ǂhanu-ain ǀkha xoamâihe.
29 Tita ge ǀkhomǀkhomsa tsî tsûb ǃnâ hâ;
ti Elotse huiǂui te, î sâu te re.
30 Tita ge Elob di ǀonsa nî koaǁnaeba,
gangans ǀkha ta ge ǁîba nî kaikai.
31 Nēs ge ǃKhūba gomab ǃgâ-ai nî ǃgâiba,
ǁnâgu tsî ǃūgu tsîga ūhâ ǁgōb ǃgâ-ai.
32 ǁGâiǀāhe hân ge ǁnāsa mû tsî nî ǃgâiaǂgao,
ǁnān Eloba ra ǀgoreǀîn di ǂgaogu ge nî ǁkhoa.
33 ǃKhūb ge ǂhâb ǃnâ hâna ra ǃgâ,
tsî ǁîb din ǃkhōsis ǃnâ hâna ǀuru tama hâ.
34 Akha ǀhommi tsî ǃhūbaib tsîkha ǁîba koa,
tsî hurib tsî ǁîb ǃnâ hâ ûitsaman hoana.
35 Elob ge Sionsa nî huiǂui,
tsî Judab di ǃāde ǁkhawa nî ǂnubikhâi.
ǁÎb di ǁaes ge ǁîdi ǃnâ nî ǁan tsî ǁîde nî ūbasen;
36 ǁîb ǃgāgu di ôan ge ǁîde nî ǀumi
tsîn ge ǀons âba ǀnamna ǁnāpa ǃnâ nî ǁan.
© Khoekhoegowab Elobmîs © Bible Society in Namibia, 2020.
