Sirax 37 - Khoekhoegowab New Translation 2020 (KKG20)

ǂKhaba ǀhōsan tsî ama ǀhōsan

1 ǂGui khoen ge “Tita tsîn ge sa ǀhōsa” ti nî mî, xawen ge amaba ǃhoa tama hâ. 2 ǀGū ǀhōsa-i ga khākhoe kai, ob ge tsûaǂgaoba ǃgamsents nî ǃkhaisa ǃaroma ǁkhā. 3 Nē ǂkhaba ǂâisa, mâpa xus ra hā tsî ǃhūbaiba ǂhumib ǀkha ǃgū-ai? 4 ǀNî ǀhōsan ge xūn ra ǃgâise ra aiǃgûs kōse ǀgui a sa ǀhōsa, xawe ǃgomsib ga hā, o sa ǃoagu ra dabaǂnûisen. 5 Ama ǀhōsa-i ge sa khākhoen ǃoagu hui tsî ra ǁkhauba tsi. 6 Tā ǁnāti ī ǀhōsanna ǀuru, î ǁîn ona hōts ka ǃkhūsi-i ǃnâ amǃnâxa kai.

ǀApemā-aon

7 Mâ ǀapemā-ao-i hoa-i ge ǁî-i ǀapes a ǃgâi ti ra ǂâi, xawen ge ǀnîna satsa xu hōǂgā-e ǃâubasen hâse ra ǀapemā. 8 Khoe-i ga tare-ets nî ǂanǂansa ǀgaub ǃnâ dī ǃkhaisa ǀapemā tsi, o aibe ǃgâise ǂâiǃgâ. ǁÎ-i ra mî xū-ets nî dīs aiǃâ kōkō, ǁî-i xa i ǂgurose ra ǂâi ǃkhaisa. Tare-i ǃaromas ǁî-i di ǀapemāsa ǁî-i di aiǂhanu-i ase nî sîsen? 9 ǁÎ-i ge “ǂHanusets ra dī” ti mî tsî mâ-oa tsî mâtits ūts hâ-i hoa-e ra ǂoaǃnâ ǃkhaisa nî kō.

10 Tā ǂgomǃgâ tsi tama khoe-i tawa ǀape-ôa, tsî tā i satsa ra suri khoe-e sa ǀapede ǂan.

11 Tā khoes di mûǂgāǀgauba ǁîs ra tau khoes ǂama dî,

tamas ka io ǃaoǃnâkhoeba mâtib nî ǃkham ǃkhaisa,

tamas ka io ǂharugu-aoba mâtikō ǁkhāsiba i xū-e amase anusa,

tamas ka io ǁama-aoba ǂhanu ǂganǀgaub xū-i diba,

tamas ka io surixa khoe-e ǁî-i di ganganxasib xa,

tamas ka io karosaǂgao khoe-e mâti i nî khoexaǃnâ ǃkhaisa,

tamas ka io ǀopesa khoe-e mâti i nî sîsen ǃkhaisa,

tamas ka io ǁaerob ǀguib di sîsenao-e mâtikō ǁaeba i sîsenna toa i nîs kōse nî ū ǃkhaisa,

tamas ka io ǀopesa ǃgāba ǃgom sîsenni xa.

Tā ǁîn nî mā tsi ǀapemādi di ǀguis xawes ai ǂâisa ǂnûi.

12 ǀApemā-ets ga ǂhâbao, khoe-i hîa ǃKhūba ǀgoreǀî tsî ǁîb di mîmāde ra ǁnâuǀnam-i ai ǂgomǃgâ. Sats ǀkha ǂoaǃnâts ka, o nî tsâbaǁhao khoe-i ai ǂgomaiǂnûi. 13 Sa ǂhunuma ǀgoraǃgâs ai ǂgomaiǂnûi, nau khoe-i di ǀapemās ge ǃnāsase ǂgomǂgomsa tama hâ. 14 Sa ǂhunuma ǂâiǀgaub ai ǂgomǃgâs ge hû ǃûi-aogu, ǀgapi ǃûiǂgō-ommi ai hâgu xa ǃnāsase mîba tsi ǁkhā. 15 Hoan ǂamai, Hoan xa ǀGapib ǃoa ǀgore, îb ǂhanu xū-ets nî dī ǃkhaisa ǁgau tsi.

Gā-aisib tsî ǂgomǃgâs

16 Sîsenni ǀkhats nî tsoatsoas aiǃâ, ǂōrisase ǀapeǁgui tsî ǀape-ôa. 17 Ûib di ǂgaeǂguis hoas ge ǁnâuǃāb ǃnâ ra tsoatsoa. 18 ǁÎb ge haka xūn ai ǃgaoǃgaohe hâ, ǃgâib tsî ǂkhabab, ûib tsî ǁōb; xawe ǀunis ai da ra ǃhoa xū-i ǀgui-i ge ra harebe.

19 Khoeb ge kaise gā-ai tsî ǂoaǂamsa ǁgauǃnâ-ao ǁkhā, xawe ǁîb di ǂhunuma ǁhōgu tsîna ǁkhāba tama ra i. 20 ǀNî khoeb ge gā-aise a ǃhoa ǁkhā, xaweb ge ǀunis ai, khoen xab ǃhuisahe xui-ao nî ǃâǁō. 21 Nēs ge ǃKhūb ga sîsen-e mā bi tama i, tamas ka io ǁnâuǃā-i xare-eb ga ūhâ tama io a īǁkhā. 22 Khoeb ga ǁîb di ǂhunuma ǁhōgab nî mâti ǂgaeǂgui ǃkhaisa ǂan, on ge khoena ǃgâi ǁnâuǃābab ūhâ xui-ao nî koa bi. 23 Gā-ai khoeb ga ǁîb khoena ǁgauǃnâ-aose ǃoaba, ob ge ǃhoa ǁkhā tsîn ge khoena ǁîb di ǃgâi ǁnâuǃāb ai nî ǂgomaiǂnûi. 24 Mâ khoe-i hoa-i ge nēti ī khoeba koa tsî ǁîb ǃaroma ǃKhūba nî gangan. 25 Mâ-i sada di-i hoa-i di ûib ga ǀam, xaweb ge Israelǁîn di ûiba nî aiǃgû. 26 Xawe khoen ge ǁnān hîa sada ǁaegu gā-aina ǀamose ǃgôasiba mā tsî ǂâis ǃnâ nî ūhâ.

Tā kaise ǂûna

27 Ti ôado, ûi du hâs kōse tare-e du ra ǂû ǃkhaisa ǂanbasen. Mâ ǂû-i sats ǃaroma ǃgâi tama ǃkhaisa ǂanǂui, î ǁî-e tā ǂû. 28 ǀNî ǂûn ge ǀaesase nî tsâ kai tsi. Mâ khoe-i hoa-i ge mâ ǂûǃnôa-i hoa-i xa ǃgâibahe tama hâ. 29 ǂÛnasib tsî kaise ǁkhoaxa ǂûna, mâ ǂûs hoas tawa ǂûǃnāsa ǃûisen. 30 Mâ ǁaeb hoabats ga kaise ǂû, ots ge nî ǀae tsî ǂûǃnāts ka, ots ge hoaǁae nî uixa. 31 ǂAnbasen! ǂÛnab ge ǂgui khoen di ǁōba ge ǃaroma. ǁÎba xu ǂgōsen, î gaxuse ûi.