ǀOpesasib tsî gâsib
1-2 ǀOpesa khoen ge ǃgaroxaǀkhā ǀui-i ǀkha a ǀgopeǀnōhe ǁkhā. ǁÎn ge a ǃurihesa, ǀgui khoe-i tsîn ge ǁîn ǀgūse sī ǂgao tama hâ.
3 ǂŪǁoa ǀgôa-e ūhâs ge ǁgûba taosib ase iba tsî tareǀgôas ka, ob ge marisise nî ǂoaǃnâ. 4 ǁNâuǃāxa ǀgôas ge ǃgame-aoba nî hō, xawe tao-oǃnâ ǀgôas ge ǁîs îba tsûaǂgaoba ra hā-ūba. 5 ǁNâuǃāoǃnâ ǀgôas, xū-e ūhâ tamas ge ǁîs di ǃgame-aob tsî ǁgûb tsîkha nî tao kai; ǀguib ǁîkha dib tsîn ge ǁîsa ǃgôasi-e ūhâba tide.
6 ǀGôana ǂhanu tama ǁaeb ai ǀaus ge ǃoab ǃnâ hâ khoena ǁnaebas khami ī, xawe ǂnaus ge ǀgôana ǂhanuse kaikais ǃaroma hoaǁae a ǃgâi.
7 Gâ khoe-e ǁkhāǁkhās ge khôa hâ sūsa ǂaoǀhaos tamas ka io ǃgam ǂoms ǃnâ hâ khoe-e ǂkhaiǂkhais khami ī. 8 Gâ khoe-e xū-e mîǃgāǃgābas ge ǂoms ǃnâ hâ khoe-e mîǃgāǃgābas khami ī. Toats ka, o-i ge “Tare-e go i?” ti nî mî.
11 Khoen ge ǁō hân ǃaroma ǃkhaenab ǃnân hâ xui-ao ra ǃoa. ǁÎn ge ǁkhāti gân tsîn ǃaroma gā-ai taman hâ xui-ao nî ǃoa. ǃNāsasen ge gân ǃaroma, ǁîn ǁō hân ǃgâ-ai ǂkhabusa ûiba ūhâ xui-ao nî ǃoa. ǁŌ hân ge ǀorodomma sâ hâ. 12 Hû tsēde da ge ǁō hân ǃaroma ra ǃoa, xawe gâ tamas ka io eloxoresa khoe-i ge hâhâ ra ǃoaba ra ǃaroma.
13 Tā gâ khoena sari tamas ka io gaxu ǁaeba ǁîn ǀkha ǃhoa. ǁÎna ǂgōsen, îts tā ǁîn xa ǀurixa kaihe, îts ǂkhîb ǃnâ ǂhanihe tamas ka io ǁîn di gâsib xa tsau tamase nî ûi. 14 Gâ khoe-e mā-ams ge kaise ǃgom ǂgoaǀuri-e tanis khami ī. ǁÎ-i ǀons ge a “Gâ.” 15 Gâ khoe-e mā-ams ge ǃhūǁhōs, ǂōǁhōs tamas ka io ǃgom ǀuri-e tanis khami ī.
16 Om-i di ǂnubiǂgoab ǃnâ ǁaposase ǁguihe hâ ǃnao-i, ǃhūǂgubi-i xa ǁnobeǁnobehe ǁoas ǁkhās khami i ge ǁî-i di ǀgoraǃgâs ǃnâ, ǃaromas tsî ǃgâi ǂūxasib xa ra mâxōǀkhāhe khoe-e ǂōǂōsib ǃnâ ǃao tide. 17 ǂÂis hîa gā-aisib ǃnâ-ū xūna ra ǂâis ge ǁaposa ǂnubiǂgoab, îsase anihe hâb khami ī. 18 ǂKhari ǀuidi ǂnubiǂgoab ǀgapise ǂnôadi ge ǂoab ga ǃgomo ǁnāpa ǂnû tide tsî khoe-i ǁî-i di gâre ǂâidi xa ge ǃaoǃnâ kaihe-i ge ǃaorosa mâsigu ǃnâ mâǁapo ǁkhā tide.
Khoexaǃnâsib
19 Sa mûsats ga tsûtsû, on ge ǁgamronna ra ǂoaxa tsî khoe-i ǂgaobats ga tsûtsû, ots ge ǁî-i di ama tsâsiga nî ǂanǂui. 20 ǀHomaninats ga ǀuin ǀkha ǂnoa, ots ge ǁîna nî ǃaoǃao tsî horesa-ets ga ǃkhāǃkhā, ots ge horesagusisa nî khôa. 21-22 ǀGaisa ǂnoagu-ets ga sa ǀhōsab ǀkha ūhâ tsî ǃgâi tama xūna ǁîb ǃoa mî, xawe tā sa khoeǀhōgusisa ǀû. Noxopa kho ǀhōsagu ǁkhā ǃkhais di ǃēs ge hâ. Xawe ǀhōsa-i hoa-i ge ǁî-ets ga ǃkhāǃkhā tsî satsa ǁîǃgôasen, ǁî-i di ǂganǃgâsiga ǂhaiǂhai tamas ka io ǀūǃgâse ǁî-e xu ūdabasen, o satsa xu nî ǀgora.
23 ǀGâsasib ǃnâ hâ ǀgūkhoe-ets ga ūhâ, o ǁî-e mâxōǀkhā î-i ǂgomǃgâ tsi. ǁÎ-i ga ǃgâiǃgâ tamas ka io ǃkhūsiba ǀumi, ots ge ǁnā ǃgâiǃgâb ǃnâ a ǀama ǁkhā.
24 ǀAes ǀanni ge ǀaeǁhabugats nî mûs aiǃâ ra ǂoaxa. ǁNās ǁkhās khami di ge ǃkhāǃkhāde ǀaoǂnâxūs aiǃâ ra hâ.
25 Tita ge tātsēs tsîna ǀhōsa-e ǁkhaubas ǃaroma tao tide tsî tātsē ǂhâba te i hâ ǁaeb ǃnâ ǁî-e xu ūdabasen tide. 26 ǁÎ-i ǃaroma ta ga tsâ, xawe i ge ǁnāsa ǂan-i hoa-e ǁîb ǃoagu nî ǃûisen.
ǁOreb ǃoagu hâ huib di ǀgores
27 ǃÛi-ao-i ga ti ams tawa mâihe tsî kha ga ti amǁgaukha gā-aise ǃnâu-amhe ǃkhaisa ta ge ra ǁkhore. ǁNās ge tita ti dīsādi tsî ti nams ǂûs ǀkha aitsama hîkākāsensa xu nî ǁkhae.
© Khoekhoegowab Elobmîs © Bible Society in Namibia, 2020.
