Jesaja 36 - Khoekhoegowab New Translation 2020 (KKG20)

Asiriaǁîn ge Jerusalemsa ra ǃhuriǃhuri

1 Disihakaǁaǀî kurib, Gao-aob Hiskiab gere ǂgaeǂgui ǁaeb aib ge gao-aob Sanherib Asiriab dib ge hoaraga omǂnamisa ǃādi Judab didi ǃoagu khâimâ tsî ǁîde ge ū. 2 Asiriab gao-aob ge Rabsakeba Lakisa xu Gao-aob Hiskiab ǃoa Jerusalems ǁga kai toroǂnubis xa ǁnūhe hâse ge sî. 3 ǁNāpab ge Hilkiab ôab Eliakimmi, gao-ommi ǃereamsa ge ūhâ ib tsî xoa-aob Sebnab tsî ǂkhanisâu-aob Asafi ôab Joab tsîga ǁîba sī nî ǀhao-ūse ge ǃgûǂoa. 4 Ob ge Rabsakeba ǁîn ǃoa ge mî: “Hiskiab ǃoa mî: ‘ǁNā-amagab ge gao-aoba ra mî, Asiriab gao-aoba: Tare-i aits sa ǂgomǃgâsa ra ǃgaoǃgao? 5 Mîdi ǀguidi a ǀape tsî torob di ǀgai tits ǂâi hâ? Tari-i aits nēsi ǂgomǃgâ hâ, ti ǃoaguts ge khâikhâisen xui-ao. 6 Mû, sadu ge Egipteb ai ra ǂgomǃgâ, ǁnā khôa hâ ǂāb, ǁîb ai ra ǁgâibasen ǃommi hoaba nî ǃkhāba. ǁNātib ge Egipteb gao-aob Faraoba ǁîb ai ra ǂgomǃgân hoana nî ība.

7 “ ‘Xawe du ga “Sida ge sida ǃKhūb Elob ai ra ǂgomaiǂnûi,” ti mîo, ǁîb di ǀgapi ǃkhaigu tsî altar tamade Hiskiaba ge ūbēde, Judab tsî Jerusalems tsîra ǃoab ra mîse: “Nē altars aiǃâ du ge nî ǀgoreǀî?” 8 Nēsi ti ǀhonkhoeb Asiriab gao-aob ǀkha ǀhûǀguitimîsa dī, o ta ge ǀgamǀoadisi hāna nî mā du, ǁînats ga ǂâu hâ hāǃgapi-aoga hōbao. 9 Mâtits kha ǁîb a ǂam ǂammâisab ti ǀhonkhoeb ǃoaba-aogu ǁaegu hâba ra ǂhara! Tsî mâtits kha Egipteba ǁîb torokunidi tsî hāǃgapi-aogu tsîn ǃaroma a ǂgomǃgâ ǁkhā? 10 ǃKhūb ose ge isa nē ǃhūb ǃoagu khâimâ tsî ta ge ǁîba hîkākāsa? ǃKhūb ge tita ǃoa “Nē ǃhūb ǃoagu ǃkham, îts ǁîba hîkākā,” ’ ti ge mî.”

11 O gu ge Eliakimmi, Sebnab tsî Joab tsîga Rabsakeb ǃoa ge mî: “Toxopa sa ǃgāgu ǀkha Aramiagowab ǃnâ ǃhoa re, ǁîba ge ra ǁnâuǃā xuige. Tā sige ǀkha Hebregowab ǃnâ ǃhoa, ǂnubiǂgoab ai hâ khoen nî ǁnâu xuige.”

12 Xaweb ge Rabsakeba ge ǃeream: “Ti ǀhonkhoeb ge sago ǀhonkhoeb tsî sago ǀguigo ǀkha ta nî ǃhoase sî te tama hâ. ǁÎb ǂhôas ge ǂnubiǂgoab ai ǂnôa khoen ǃaromas tsîna ge sîhe, ǁîn tsîn sago ǂûgo khami ǁîn xauba ǂû tsî ǀūba nî āse.”

13 Ob ge Rabsakeba mâ tsî ǃgari dommi ǀkha Hebregowab ǃnâ ge ǃhao: “Kai gao-aob mîde ǃgâ re, Asiriab gao-aob dide! 14 Nētib ge gao-aoba ra mî: ‘Ab Hiskiaba tā ǂgaeǂhapu go, ore go ǁkhāb tide xuige. 15 Ab Hiskiaba tā nētib ra mîse ǃKhūb ai ǂgomǃgâ kai go: Amaseb ge ǃKhūba nî ore go; nē ǃās ge Asiriab gao-aob ǃommi ǃnâ māǁnâhe tide.’ 16 Tā Hiskiaba ǃgâ! Nētib ra Asiriab gao-aoba mî xuige: ‘ǂKhîba tita ǀkha dī, î tita māǁnâsen re; o-i ge mâ-i hoa-i sadu di-e sadu draibehaide xu nî ǂû tsî ǁkhāti sadu ǀnomahaide xu; tsî du ge sadu ǀaude xu nî ā, 17 tita hā tsî sadu di ǃhūb ǂûb khami ī ǃhūb ǃoa nî ūǃgû dus kōse, ǃhūb ǃhorob tsî ǂauxûib dib, ǃhūb pereb tsî draibeǃhanagu diba. 18 Tāb Hiskiaba nēti ra mîse ǂgaeǂhapu du nē mîdi ǀkha: “ǃKhūb ge nî ore du.” ǁAedi ǁgôa-elogu di ǀguiba xare sadu ǃhūba Asiriab gao-aob ǃomma xu huiǂuib ge? 19 Hamati tsî Arpadi ǁgôa-eloga mâpa hâ? Sefarvaims ǁgôa-eloga mâpa hâ? Samariaba ti ǃomma xu ǃnoraǃnora gu ge? 20 Sago ǁaegu mâ ǁgôa-elogu nē ǃhūgu diga ǁîgu ǃhūga ti ǃomma xu ge ǃnoraǃnora? Mâ ǀgaus aib ǃKhūba Jerusalemsa ti ǃomma xu ore ǁkhā?’ ”

21 Xawe gu ge ge ǃnō tsî ǃeream bi tama ge i, gao-aob ge ǁîga “Tā ǁîba ǃeream,” ti mîmā hâ i xui-ao. 22 O gu ge Hilkiab ôab Eliakimmi, gao-ommi ǂammâisab, xoa-aob Sebnab tsî Asafi ôab Joab hîa ge ǂkhanisâu-ao ib tsîga doa hâ saran âgu ǀkha Hiskiab tawa sī tsî Rabsakeb ge mî xūna ǁîba ge mîba.