Jeremiab ge ǃhūǃâsa ra ǁama
1 Mîs ǃKhūb dis ge Jeremiaba disiǁî ǂgaeǂguis kurib Judab gao-aob Sedekiab dis ǃnâ ge hāba. Nēb ge Babilons gao-aob Nebukadnesari di disiǁkhaisaǀaǁî ǂgaeǂguis kuri ge iba. 2 Babilons gao-aob di toroǂnubis ge Jerusalemsa ge ǃnamiǂgā. Kēbo-aob Jeremiab ge Judab gao-aob ǃûi-ommi di ai-ommi ǃnâ ge ǂganamǂgāhe hâ i. 3 Judab gao-aob Sedekiab ge ǁîba ǁnāpa ǂganamǂgā tsî ge mî: Tarexats nēti kēbo tsî ra mî? Nētib ge ǃKhūba ra mî. Tita ge nē ǃāsa Babilons gao-aob ǃomǁae ra māǁnâ. 4 Tsî Judab gao-aob Sedekiab ge Xaldeaǁîn ǃomǁaeba xu ûiǂoa tide, tsîb ge Babilons gao-aob ǃomǁae nî māǁnâhe tsî aitsama ǁîb ǀkha ǃhoa tsî ǁîba nî mû. 5 ǁÎb ge Sedekiaba Babilons ǁga nî ǃgû-ū tsîb ge ǁnāpa nî hâ, tita ǁîb xa nî ǂâis kōse. Babiloniaǁîn ǃoagu du ga ǃkham, xawe du ge dan tide,
tib ge ǃKhūba ra mî.6 Ob ge Jeremiaba ge mî: ǃKhūb di mîs ge tita ge hāba: 7 Sa ǁnaob Salummi ôab, Hanameli ge sats ǃoa hā tsî nî mî, ti ǃhūǃâs Anatots ǃnâ hâsa ǁama re, sats ǁamats nîs ǃoa ǀgū ǀaokhoesis ǂhanuba ūhâ xuige. 8 Tsî ǃKhūb ge mîs ǁkhās khamib ge ti ǁnaob ôab Hanamela tita ǃoa hā tsî ge mî: Ti ǃhūǃâs, Anatots Benjaminni ǃhūb ǃnâ ǂnôas tawa hâsa ǁama re, sats ǀgū ǀaokhoesis ǂhanuba ūhâ xuige. O ta ge ge hōǃâ, ǃKhūb di mîs asa. 9 ǁNā-amaga ta ge Anatots tawa hâ ǃhūǃâsa ti ǁnaob ôab Hanamela xu ge ǁama tsî ta ge ǁîba disihûǀa ǀhaiǀuri maride ge ǀnōǁnâba. 10 Tsî ta ge nēsa ǂkhanis ǃnâ xoa, ǁîsa ǂganamǀgaiǀgai, ǀhûǀguitimî-ao-e xoaǃgao kai tsî ǁîba ǀhaiǀuride ge ǀnōǁnâba. 11 Tsî ta ge ǁamaǂkhanis, xoaǁguib tsî ǂhanub ǂnûiǂgās ǃoa ǂganamǀgaiǀgaihe hâs tsî ǁamaǂkhanis ǂganamsa tamas tsîra ge ū. 12 Tsî ta ge ǁîsa Neriab ôa tsî Maxsejaxi ǁnurib Baruxa ge mā, ti ǁnaob ôab Hanameli tsî xoaǃgao ge ǀhûǀguitimî-aogu tsî hoaraga Jodeǁîgu, gao-ommi di ai-ommi ǃnâ ge ǂnôa i gu ra mûse. 13 ǁÎn hoan mûǁae ta ge Baruxa ge mîba. 14 “Nētib ge ǃKhūb Hoaǀgaixab, Israeli di Eloba ra mî. Nē ǂkhanira, ǂganamǀgaiǀgaisas tsî ǁkhowa-amsas tsîra hoara ū, î ǁîra ǂgoasūs ǃnâ ǂgā, ǂomxa ǁaeba ra sâusase nî hâse. 15 Nētib ge ǃKhūb Hoaǀgaixab, Israeli di Eloba ra mî. Omdi, ǃhanagu tsî draibeǃhanagu tsîn ge ǁkhawa nē ǃhūb ǃnâ nî ǁamahe.”
Jeremiab di ǀgores
16 ǁAmaǂkhanisa ta ge Neriab ôab Baruxa mātoas khaoǃgâ ta ge nēti ǃKhūb ǃoa ge ǀgore. 17 ǃKhū Elotse, sats ge ǀhommi tsî ǃhūbaib tsîkha sa kai ǀgaib tsî ǀgaisa ǃommi ǀkha ge kuru. ǀGui xū-i tsîn ge satsa ǃgomba tama hâ. 18 Sats ge ǂgui ǀoadisina ge ǀkhomxa, xawets ge ǂhanuoǃnân di ôananôaguba ǁîn îgu di ǁoren ǂama ra ǁkhara, kai tsî ǀgaisa Elots, ǃKhūb Hoaǀgaixab ti ǀon hâtse. 19 Sats ge kai xūna ra ǀape tsî ǀgaisa dīga ra dī. Sats ge khoen ra dī xūn hoana ra mû tsî mâ-i hoa-e ǁî-i ûib tsî dīgu ǃoa ra mādawa-am. 20 Sats ge buruxa dīgu tsî saode Egipteb ǃnâ ge dī hâ i tsîts ge ǁnāsa ǃaruǀî Israeli ǃnâ tsî nau khoen ǃnâ ra dī tsîts ge ǀon-e ge dībasen, nētsēs kōse. 21 Sats ge sa ǁaes Israelsa buruxa saodi tsî dīgu, kai ǀgaib tsî ǁkhāsib tsî kai ǃhurib ǀkha Egipteba xu ge ǂgaeǂguiǂui. 22 Sats ge ǁîna nē ǃhūb, ǁîn aboxanats ge māts nî ti mîmâibab, ǃkhū hâ tsî ǂûtanixaba ge mā. 23 Xawe ǁîb ǃnâ ǂgâ tsîn ǁîba ūbasen, on ge satsa ǁnâuǀnam tama ge i tsî sa ǂhanuba ǃkhōǀgaipe tama ge i. Tsîn ge sats ge ǁîna dīn nîse mîmā xūna dī tama ge i; ǁnā-amagats ge nē ǂōǂōsigu hoaga ǁîn ǂama ge hā kai. 24 ǂKhawadīb di ǂnubiǂgoagu ge ǁîs ǂnamipe ge omkhâihe ǁîs nî ūhese tsîs ge ǃāsa gôab tsî ǃâtsūǀkhāb tsî ǂhīǁōb ǃnâ-ū Xaldeaǁîn ǁîs ǃoagu ra ǃkhamn ǃomǁae ge māǁnâhe. Sats ge mîn hoan ge ge ī, sats ge ǁîna aitsama ra mû. 25 Xawets ge satsa ǃKhū Elotsa tita ǃoa ge mî, ǃhanaba mari-i ǀkha ǁamabasen tsî a i ǃkhō-amao-e hâ, ǃās ga Xaldeaǁîn ǀgaib ǃnâ hâ xawe.
26 Mîs ǃKhūb dis ge Jeremiab ǃoa ge hā. 27 “Tita ge ǃKhūta hoaraga khoesib di Elota; xū-i xare-i ge tita ǃgomba tama hâ. 28 ǁNā-amagab ge ǃKhūba nēti ra mî: Tita ge nē ǃāsa Xaldeaǁîn ǃomǁae nî mā, Babilons gao-aob Nebukadnesari ǀgaib ǃnâ tsîb ge ǁîba ǁîsa nî ū. 29 Xaldeaǁîn nē ǃās ǃoagu ra ǃkhamn ge ǁîs ǃnâ ǂgâ tsî ǁîsa ǂhubi tsî nî khauǃkhū, ǁkhāti ǁnā omdi, ǁîdi omǂamǃnâgu, titan nî ǁaiǁaisen ge ǁîgu ai Baala gere ǀanǀanbadi tsî nau eloga ǂnâǁguibade gere dībadi tsîna nî ǂhubiǂui. 30 Israeli khoen tsî Judab din tsîn ge ǂkhamsis âna xu ti mûǁae a ǂkhaban ǀguina gere dī amaga. Israelǁîn ge ǁîn ǃomgu sîsenni ǀkha tita gere ǁaiǁai, tib ge ǃKhūba ra mî. 31 Nē ǃās ge ti ǁaixasib tsî ǀkhaob tsîkha ge khâi kai, ǁîsan ge ǂnubi tsēsa xu nētsēs kōse, tsî ta ge ǁîsa ti ais aiǃâba xu nî dībē, 32 ǁnā ǂkhabasib titan nî ǁaiǁaisen ge Israeli tsî Judab tsîkha khoena dīb hoab ǃaroma; ǁîn tsî ǁîn gao-aogu, ǂamkhoegu, pristergu, kēbo-aogu, Judab aogu tsî Jerusalems di ǁanǂgāsaben tsî hoan ge dīb ǃaroma. 33 ǁÎn ge tita ǃoan nî kōs ǃās ǃnâ tita xu ge ǃkhomǃnoro; ǁîna ta ge ǀûs ose gere ǁkhāǁkhā, xawen ge ti ǂgōǀausa ge ūǃoa tama ge i. 34 Tsîn ge ui-uisa īga, ǁnā ommi ti ǀons ǃoa ǂgaihe hâb ǃnâ ge mâi ǁîban nî ǃanuoǃnâ kaise. 35 ǁÎn ge Baala Hinomǃgoaǃnāb ǃnâ ǀgapi ǃkhaiga ge ǂnubiba, ǁîn di ôagu tsî ǁîn ôadi tsînan Moleka ǁnāpa nî ǁguibase, tita ǁîna ǁnāsa mîmā tama tamas ka io ǂâis xawes tsîna hî tama xawe, nēti i ǁgaiǁgaisa xūna dī tsîn Judaba nî ǁore kaise.”
ǃKhūb ge Israela ǃgâiǃgâba ra mîmâiba
36 “ǁNā-amagab ge ǃKhūb, Israeli di Eloba ra mî, ǁnā ǃās ǁîs xa du nēti ra ǃhoas xa: ‘ǁÎs ge Babilons gao-aob di ǃomǁae nî māǁnāhe, torob tsî ǃâtsūǀkhāb tsî ǂhīǁōb ǃnâ-u.’ 37 Tita ge ǁîna ǁnā ǃhūgu, ǁîna ta ge ti ǁaib tsî ǀkhaob tsî kai ǁaixasib ǃnâ doeǁgabē hâ iga xu nî ǀhaoǀhao; tita ge ǁîna nē ǃkhais ǃoa nî oahā-ū tsî ǂkhîb ǃnâ nî ǁan kai. 38 On ge ǁîna nî ti ǁae kai tsî ta ge tita nî ǁîn di Elo. 39 Tsî ta ge ǁîna ǀgui ǂâis tsî ǀgui ǃgûdaoba nî mā, titan hoaǁae nî ǃaoǃgâse, ǁîn di ǃgâib ǃoa tsî ǁîn di ôananôagub di ǃgâib ǃoa. 40 Tita ge ǀamo ǃgaeǀhao-e ǁîn ǀkha nî dī, ǁîna ǃgâina dībasa xu ta ūdabasen tidesa; tsî ta ge ti ǃaoǃgâba ǁîn di ǂgaogu ǃnâ nî ǂgā, tita xun ūdabasen tidega. 41 Tita ge ǁîna ǃgâina dības xa nî dâ tsî ta ge ǁîna amase nē ǃhūb ǃnâ nî ǃhana ti ǂgaob hoab tsî ti ǀoms hoas ǀkha.
42 “Nētib ge ǃKhūba ra mî. Nē ǁaes ǂama ta ge kai ǂōǂōsib hoaba hā-ū hâ is ǁkhās khami ta ge tita hoaraga ǃgâin ǁîna ta ge mîmâiba hâ ina ǁîn ǂama nî hā-ū. 43 ǃHanaǃhūgu ge nî ǁamahe, nē ǃhūb ǁîb xa du ǃū-aisa ǃhūb, khoe-i tsî ûitsama xū-i xare-i ǀkhaiǃnâb, Xaldeaǁîna māǁnāhe hâb, ti ra mîb ǃnâ. 44 ǃHanagu ge mari-i ǀkha nî ǁamahe tsîs ge ǁnā ǃkhaisa xoaǃgaohe tsî nî ǂganamǀgaiǀgaihe ǀhûǀguitimî-aogu mûǁae, Benjaminni ǃhūb ǃnâ tsî Jerusalems ǂnamipe ǁgoe ǀkharigu ǃnâ tsî Judab di ǃādi ǃnâ tsî ǃhomxa ǀkharib ǃādi ǃnâ tsî ǃkhawagasǀkhāb ǂgāxa ǀkharib ǃādi ǃnâ, tita ǃgâiǃgâb âna nî hā-ū xui-ao”
tib ge ǃKhūba ra mî.© Khoekhoegowab Elobmîs © Bible Society in Namibia, 2020.
