ǀUniga hû tsûtsû-aidi
1 Tsî ta ge ǀnî kai tsî buruxa sao-e ǀhommi ǃnâ ge mû. Hû ǀhomǃgāga, hû tsûtsû-aidi, ǁîdi ǀunigadi, ǁîdi ǃnâb Elob di ǁaiba ra toa di ǀkha.
2 Tsî ta ge xlāhurib hîa ǀaes ǀkha habasab khami ī xū-e ge mû. Tsî ta ge ǁkhāti ǁnān hîa ǀgurub tsî ǁîb di īb tsî ǁîb ǀons di ǃgôasa ge danna xlāhurib ai Elob di harpde ūhâse ge mûmâ. 3 ǁÎn ge Elob di ǃgāb Moseb tsî ǁKhaob di ǁnaetsanasa gere ǁnae:
“ǃKhū, Elo Hoaǀgaixatse
mâtikōse gu sa sîsenga kai tsî buruburuxa!
Gao-aots ǃhaodi hoadi ditse,
ama tsî ǂhanu-ai gu ge sa daoga!
4 Tari-e satsa ǃao tsî sa ǀonsa ǂkhaiǂkhai tide, ǃKhūtse?
Sats ǀguits ge ǃanu.
Tsî di ge hoaraga ǁaede hā
tsî satsa nî ǀgoreǀî,
sa ǂhanu-ai sîsengu hoana a ǂhaisaba amaga.”
5 Nēs khaoǃgâ ta ge Tempeli hîa ǀhommi ǃnâ hâb, Elob di Tentommi a ǁkhowa-amsa ǃkhaisa ge mû. 6 Hû ǀhomǃgāgu, hû tsûtsû-aide ūhâgu ge ǃanu, ǂkhai ra saraba ǂgaeǂgāhe hâse tsî ǃhuniǀuri ǃgaesenga ǁkhaigu ai ǃgae hâse Tempela xu ge ǂoaxa. 7 Ob ge haka ûitsama kurusabegu di ǀguiba hû ǀhomǃgāga hû ǃhuniǀuri ǃoredi Elob, hîa ǀamosib kōse ûi hâb di ǁaib xa ǀoa hâde ge mā. 8 Tempeli ge Elob di ǀgaib tsî ǂkhaisib di ǀanni xa ge ǀoa tsî-i ge khoe-i xare-e Tempeli ǃnâ ge ǂgâ ǁoa i, ǁnā hû tsûtsû-aidi, hû ǀhomǃgāgu xa ǀkhī-ūhedi nî toas kōse.
© Khoekhoegowab Elobmîs © Bible Society in Namibia, 2020.
