ǃGau ge ǃhūb di ǀgorahes
1 Hoaraga ǃhūban ge dans khaoǃgân ge Israelǁîn hoana Silos tawa ǀhao tsî ǃKhūban gere ǀgoreǀîǃnâ Tentomma ge ǂnaumâi. 2 Noxopan ge hû ǃhaodi Israelǁaes didi khoena ǁîn di ǃhū-e ge māhe tama hâ i. 3 Ob ge Josuaba Israelǁîn ǃoa ge mî: “Mâtikōse du kha nî ǀhabe, ǃKhūb sadu aboxagu di Elob ge mā du ǃhūba du sī nî ūs aiǃâ? 4 Mâ ǃhaos hoasa xu ǃnona khoega mā te. Tita ge ǁîga nî sî, î gu hoaraga ǃhūba ǃgûǃnâ tsî mâ ǀkhariba gu ǁîn dise ǂhâba hâsa xoamâi, tsî ǁkhawa tita ǃoa oaǀkhī. 5 ǃHūb ge ǁîn ǁaegu hû ǃâdi ǃnâ nî ǀgoraǂgāhe. Judab ge ǁîb di ǀkharib ǃnâ, ǃkhawagas ǃnâ nî hâ, tsî Josefa ǁîb di ǀkharib ǃnâ, ǀapas ǃnâ. 6 Nē hû ǃâdi ǃhūb dide xoamâi, î hā-ūba te, o ta ge ǃKhūb sada Elob aiǃâ ǀkhūsa nî ao, ǁîba ta nî dîba duse. 7 Leviǁîn ge sadu ǀkha ǃhūb di ǃâ-e hō tide, pristerse ǃKhūba ǃoabas a ǁîn di ǃâ xui-ao. Gadi tsî Rubenni tsî ǃkhare ǃhaos Manaseb dis tsîdi ge ǀnai ǃKhūb di ǃgāb Moseb xan ge māhe ǃâb ǃhūb diba Jordanni aiǂoas ǃnâ ge ǃkhōǃoa.”
8 Tsî khoegu ge ǃhūba gu sī nî xoamâise a ǃgû, ob ge Josuaba ǁîga nēti ge mîmā: “Hoaraga ǃhūba ǃgûǃnâ, î go ǁîba xoamâi tsî ǁkhawa tita ǃoa oaǀkhī, o ta ge tita nēpa Silos ǃnâ ǀkhūsa ao tsî ǃKhūb ai nî dî.” 9 O gu ge khoega ǃhūb hoaragaba ǃgûǃnâ tsî ǁîba gu ge hû ǃâdi ǃnâ ǀgora ǀgausa xoamâi tsî ǃādi tsîna ge xoakhâi. ǁNās khaoǃgâ gu ge Silos di hâǃkhaib ǁga Josuab ǃoa ge oa. 10 Ob ge Josuaba ǃKhūbab ǁîn ǃaroma nî dîse ǀkhūsa ao tsî ǃgau hâ ǃhaodi Israeli dide, mâs hoasa ǀgui ǃâb ǃhūb diba ge mā.
Benjaminni ge māhe ǀkharib
11 Benjaminni ǃhaos di ǀaokhoen ǀkharib ge ǂgurose ge ǀgoraǂgāhe. ǁÎn di ǃhūb ge Judab tsî Josefi tsîkha ǃhaora ǁaegu ge ǁgoe i. 12 ǁÎn di ǃhūǀkharib ge ǀapas ǃnâ Jordanni tawa tsoatsoa tsî ǁnāpa xu Jerixos ǀapasǀkhāb ai ǁgoe ǁnōba-u huriǂoas ǃnâ ǁgoe ǃnâuxa ǃhūb ǃnâ-u ǃkharu tsî Bet-Avens di ǃgaroǃhūb kōse gere sī. 13 ǁNāpa xus ge ǃhūǀgorasa Lus, Betels tis tsîna gere ǀonǂgaihes di ǃkhawagas ǃnâ ǁgoe ǁnōb kōse sī tsî Atarot-Adars ǁga gere ǁgôa, ǃNakab-Bet-Horons ǀapas ǃnâ ǁgoe ǃhommi ai. 14 ǃHūǀgoras ge ǁnāpa xu ǀkhara ǀkhāb ǁga ī, ǃhommi di huriǂoasǀkhāba xu ǃkhawagas ǁga ǃoa tsî Kirjat-Baals (Kirjat-Jearims), Judab ǃhaos dis ǁga gere ǁgôa. ǁNās ge a huriǂoasǀkhāb di ǃhūǀgora. 15 ǃKhawagasǀkhāb di ǃhūǀgoras ge Kirjat-Jearims ǀgūse tsoatsoa tsî Neftoaxǀaus kōse ra sī. 16 ǁNāpa xus ge Hinomǃgoaǃnāb ǃoagu mâ ǃhommi amǃgâb kōse ra ǁgôa, Refaimǃgoaǃnāb di ǀapas kōse. Tsîs ge Refaimǃgoaǃnāb ǃkhawagas ǃnâ-u, Jebusǁî ǁguruba-u Enrogels ǁga ra ǃkharu. 17 ǁNāpa xus ge ǀapasǀkhāb ǃoa Ensemes ǁga ra ī tsî ǁnāpa xu Gelilots hîa ǃhommi ǃaos, Adumims ǃoagu ǁgoes tawa ra sī. ǃHūǀgoras ge aiǃâ Bohanni ǀUis ǁga ǁgôa, (Bohanni ge Rubenni di ôa ge iba) 18 tsî Jordanǃgoaǃnāb ǃoagu ǁgoe ǁgurub di ǀapasǀkhāb ai ra ǃkharu. ǁÎs ge ǃgoaǃnāb ǃnâ ǁgôa, 19 Bet-Hoglas ǁgurub di ǀapasǀkhāb ai ǃkharu tsî ǂŌxahurib ǀapas ǃnâ, Jordanǃāb ra hurib ǃnâ dâuǂgâpa sī ra ǀuni. ǁNās ge a ǃkhawagasǀkhāb di ǃhūǀgora. 20 Jordanni ge ge aiǂoasǀkhāb di ǃhūǀgora i. Nēdi ge ǃhūǀgoradi Benjaminni ǃhaos di ǀaokhoen ge ǁîn dib nîse māhe ǃhūb dide.
21 Benjaminni ǃhaos di ǀaokhoen didi ge Jerixos, Bet-Hoglas, Emek-Kesis, 22 Bet-Arabas, Semaraims, Betels, 23 Avims, Paras, Ofras, 24 Kefar-Amonis, Ofnis tsî Gebas tsîde; ǀhaob ai disiǀgamǀa ǃādi tsî ǁîdi ǂnamipe ǁgoe ǃārodi tsîde. 25 ǁNāpa di ge ǁkhāti sao ra ǃāde ge hâ i: Gibeons, Ramas, Beerots, 26 Mispas, Kefiras, Mosas, 27 Rekems, Irpels, Taralas, 28 Selas, Elefs, Jebus (ǁnās ge Jerusalemsa), Gibeas tsî Kirjat-Jearims tsîde; disihakaǀa ǃādi tsî ǁîdi ǂnamipe ǁgoe ǃārodi tsîde. ǁNāb ge ǃhūb Benjaminni ǃhaos di ǀaokhoen ge ǁîn dise māheba.
© Khoekhoegowab Elobmîs © Bible Society in Namibia, 2020.
