Elob di ǀkhomxaǂgaosib Israelǁaes ǂama
1 O ta ra dî: “Eloba ǁnâi ǁîb di ǁaesa ǂhāxū hâ?” Tātsē! Tita tsîn kom Israelǁîo, Abrahammi di surib tsî Benjaminni di ǃhaosa xu hâ ta. 2 Elob ge ǁîb di ǁaes tsoatsoasa xub ge ǁhûisa ǂhāxū tama ge i. ǂAn du a Eliab ge mâti Xoas ǃnâ Elob ǃoa Israelǁîn ǃoagu ǀkhoma hâ i ǃkhaisa? 3 “ǃKhūtse sa kēbo-aogan ge ge ǃgam tsî sa altarde ge hîkākā tsî ta ge ǀguri go ǃgau, on ge nēsi ti ûiba ra ôa-am.” 4 Xawe mâtis elosi ǃereamsa, ǁîb ǃoa ge hâ i? “Tita ge hûǀoadisi aogu hîa Baali aiǃâ ǃhonǁgoa tamaga ge ǃgaubasen.” 5 ǁNātis tsîna i ge nēsi ī, ǀoro khoen Elob di ǀkhommi xa ge ǁhûiǂuihen ge ge ǃgau. 6 Xawe ǁîn di sîsenga xu tama i tsî Elob di ǀkhomma xu. ǁÎn di sîsenga xu i ga hâ, ob ge Elob di ǀkhomma ǃaruǀî ǀkhom tama hâ.
7 Mâti ǁnâi? Israelǁîn ge ôan ra-e hō tama ge i, xawen ǁnān ǁhûiǂuihe gen ge ge hō tsî ǃgau gen ge ge karokaroǂgaohe, 8 Xoas ra mî khami: “Elob ge ǁîna ǃgam ǂoms di gaga-e ge mā; mûde, mûn tidega tsî ǂgaede, ǁnâun tidega nētsēs kōse.” 9 Tsîb ge Davida ra mî:
“Agu ǁîn di ǁâudīga ǁnoa-i ase tsî ǃnôa-i ase ī
ǃnôa-aiǃnao tsî ǀkhaob ase.
10 A di mûdi ana ǂgī kaihe, în mû ǁoa
tsî ǁîn ǁâga hoaǁae ǃgamǃgâ kai.”
11 O ta ra dîs ge Jodeǁîna ǃnôan geo, ǁîn di hîkākāhes ǃoan ge ǁnā? Tātsē! ǁÎn di ǁoren ǃnâ-us ge Jodeǁî taman* ge ǃgâiǃōsiba hōsa, Jodeǁîna tauxa kais ǃaroma. 12 Jodeǁîn di ǁoreb ga ǃhūbaib di ǃkhūsib ase ī tsî ǁîn di ǁnāsa Jodeǁî taman di ǃkhūsib ase ī, o mâtikō ǃnāsaseb ǁîn di ǀoasa ǃgôaba nî ǂâibasen.
Jodeǁî taman di ǃgâiǃōsib
13 Tita ge nēsi sadu Jodeǁî tamadu ǃoa ra ǃhoa. Jodeǁîn di apostelta* as kōse ta ge ti ǃoabas ai a ǂnīsa. 14 ǀNîsi ta ge ti ǂhunuma ǁaes di khoena tauxasib ǃoa khâikhâiǃnâ tsî ǁnāti ǀnîn âna ore ǁkhā. 15 Tsî ǁîn di ǂharahes ga hoaraga ǃhūbaib di ǂkhîbagusa hā-ū, o ǁîn di ǃkhōǃoahesa tare-es nî ǂâibasen, ǁōba xu hâ ûi tamab ka io.
16 Tsî ǂguro ǃâ-i pereb di-i ga Eloba ǁguibaheo, ob ge hoaraga pereba a ǃanu. Tsî hais di ǃnomab ga ǃanu, o gu ge ǂgonagu tsîna a ǃanu. 17 Xawe ǀnî ǁnâugu ǃaub di ǀkherahais digu ga khôaǁnâhe tsî satsa ǃaub di ǀkherahais di ǁnâuba ǁaegub ǃnâ ǃgaeǁae hâ, o ra ge ǁnā ǃkhūsiba ra ǀgoragu. Sadu Jodeǁî tamadu ge ǁnā ǃaub di ǀkherahaidi khami ī tsî du ge nēsi ǀgaisa gagasi ûib Jodeǁîn diba ra ǀgoragu. 18 ǁNā-amaga tā ǂgonagu ǃgâ-ai koasen. Koasen ǂgaots kao ǃnomab ra ûiba mā tsi ǃkhaisa ǂâihō, xawe sats ra ǃnomaba ûiba mās ose.
19 Ots ge nî mî: “ǂGonagu ge ge khôaǁnâhe tita ǁî-i ǃnâ nî ǂgāhese.” 20 ǂHanu a, ǂgomoǃnâsib ǃaroma gu ge ge khôaǁnâhe, xawe sats ge ǂgoms ǃnâ ge mâǀgai. Tā ǀgapi xūn xa ǂâiǂâisen xawe ǃaoǃgâxa. 21 Elob ga ǂgonaga sâu tama io, o satsa sâub nî? 22 ǁNā-amaga da ge nēpa ra mû mâtikōseb Eloba ǃgâi tsî ǁkhōǁkhōsa ǃkhaisa. ǁÎb ge ǁnān, ǁnāgen ǃoagu ǁkhōǁkhōsa, xawe sadu ǃoagu a ǃgâi, ǁîb ǃgâisib ǃnâts ga sao-o. Xawe ǁnāsats ga dī tama i, ots ge ǁkhāti nî ǃgaoǁnâhe. 23 Jodeǁîn tsîn ge ǂgomoǃnâsib ǀkhan ga aiǃgû, o hân ge i ǃkhaib ǃnâ nî ǂgāhe, Elob ǁnāsa dīsa a ǁkhā amaga. 24 Sadu Jodeǁî tamadu ge ǃaub di ǀkherahaisa xu ǁhāǁnâhe hâ ǁnâub khami ī tsî du ge ǁnā ǂūsib ǃoa ǃgâi ǀkherahais ǃnâ ge ǂgāhe. Jodeǁîn ge nē ǂgāhe hâ ǀkherahais khami ī tsî i ge Elob ǃaroma nî supu nē ǁhāǁnâhe hâ ǂgonaga ǁîgu di ǂhunuma hais tawa ǁkhawa ǀhaoǀhaosa.
ǃKhūb di ǀkhomxaǂgaosib hoan ǂama
25 ǃGâsado, ǁnāpab ge ǂganǃgâsa amab hîa ta sadu ra ǂan kai ǂgaoba hâ, sadu ǁî-aitsama gā-aise ūhâsen tidega. Israelǁîn di ǃnâudanaxasib ge hâhâ tide, xawe Jodeǁî taman di ǀoasa ǃgôab Elob ǃoa nî hās kōse ǀgui nî hâ. 26 Tsî nēb ge ǀgaub hoaraga Israeli nî oreheba, Xoas ra mî khami:
“Sionsa xub ge ǃGâiǃōdī-aoba nî hā
tsî eloxoresasiga Jakob suriba xu nî ūbē.
27 Nēs ge ti ǃgaeǀhaos ǁîn ǀkha ta nî dīsa,
ǁîn ǁorena ta ga ūbēo.”
28 ǃGâiǂhôas ǃaroman ge ge Elob di khākhoe kai; xaweb ge ǁîn di aboxagu ǃaroma ǁhûiǂuib ge khoena ge ǀnam. 29 Elob ga ǁîb di ǀkhaega ǀgui ǃnāsa khoe-e mā, ob ge ǁîga ǁkhawa ǂgae-oa tama hâ. 30 Sadu Jodeǁî tamadu tsîn ge aibe Eloba ge ǁnâuǀnam tama hâ i, xawe du ge nēsi Jodeǁîn a ǁnâuǀnamoǃnâ xui-ao, Elob di ǀkhomxasiba ge ǃkhōǃoa. 31 ǁKhā ǀgaub ain ge Jodeǁîna sadu ge ǃkhōǃoa ǀkhomxaǂgaosib ǃaroma Eloba ge ǁnâuǀnamoǃnâ, xawen ge ǁîn tsîna nēsi ǁîb di ǀkhomxaǂgaosiba a ǃkhōǃoa ǁkhā. 32 ǁNā-amagab ge Eloba hoa khoena ǁnâuǀnamoǃnâsib ǃnâ ge māǁnâ, ǁîb di ǀkhomxaǂgaosibab nî hoan ǃoa ǁgauǂuise.
Elob ǃoa hâ koatsanas
33 Mâtikōsen Elob di ǃkhūsib, gā-aisib tsî ǂans tsîna a ǃgam. ǁÎb ga ǀgoraǃgâ, xawe tari-e ǁnāsa a ôaǃnâ ǁkhā? Tamas ka io tari-e ǁîb daoga ǂanǂui ǁkhā? 34 Xoas ra mî khami:
“Tari-e kha ǃKhūb di ǂâisa a ǂan?
Tari-e a ǁîb di ǀapemā-ao?
35 Tari-e ǁîba xū-e ge mā,
ǁkhawab nî mādawaga?”
36 ǁÎb ǃnâ-un ge hoa xūna kuruhe tsî ǂnubihe hâ. ǁÎb dib a ǂkhaisiba ǀamos kōse! Amen.*
© Khoekhoegowab Elobmîs © Bible Society in Namibia, 2020.
