ǃHūbaisi tsî ǀhomsi ǀgoreǀîs
1 ǂGuro ǃgaeǀhaos ge ǁkhāti ǀgoreǀîs di ǁgaragu tsî ǃhūbaisi ǀgoreǀîǃkhaib tsîna ge ūhâ i. 2 Tsîb ge Tentomma ge ǂnubikhâihe, aisǀkhāb ǃnā-oms dib ǃAnu ǃKhaib ti ra ǂgaiheb ǃnân ge ǃamǀaekandelari tsî tāb, ǁîb ain ǁguibaperena hâb tsîna ge hâ i. 3 Tsî ǀgamǁî ǂgāmâisab ǃgâb aib ge Tentomma ge hâ i, Hoan xa ǃAnu ǃKhaib ti gere ǂgaiheba. 4 ǁÎb ǃnâ ra ge ǃhuniǀuri ǀanǀanaltars tsî ǃGaeǀhaos ǂGaes, ǃhuniǀurib ǀkha ge ǃkhûǀkhāsa is tsîna ge hâ i. ǁÎs ǃnân ge ǃhuniǀuri xapas mannab hâǃnâs, Aronni ǀkharub, ǂnarexa ge ib tsî ǀgam ǀuiǂgapakha, ǁîkha ai di Disi Mîmāde xoasakha tsîna ge hâ i. 5 Tsî ǁîs ǂamai kha ge xerukha, Elob di ǂkhaisib dikha, ǁîkha di ǁgapogu ǀkha ǂkhîbagus ǃkhaisa ra somsomǂamkha ge hâ i. Nēsi da ge nē xūn hoan xa ǂōrisase a ǃhoa ǁoa.
6 Nē xūn nēti aiǂhomihe hâse gu ge pristerga ǁîgu ǁguiǂamde nî dīse, hoaǁae ǂguro mâ Tentommi ǃnâ gere ǂgâ. 7 Xaweb ge ǀgapipristera* ǀgui ǃnāsa kurib ǃnâ ǀguri Hoan xa ǃAnu ǃKhaib ǃnâ gere ǂgâ. ǁÎb ge ǁîb di ǁoren tsî ǁaes gere ǀūǂamsib ǃnâ dī ǁoren di ǁguibas ǃaroma, mâ ǃnās hîab ga ǂgâs hoasa ǀaoba gere ǂgâ-ū. 8 Nēs ǃnâb ge ǃAnu Gagaba ganupeb Tentomma mâ hîab Hoan xa ǃAnu ǃKhaib ǃoa garu daoba ǁkhowa-amsa tama ǃkhaisa ra ǂhaisa kai. 9 Nēs ge ǁgauǁgaus nē hâ ǁaeb ǁga ra ǁnaeǁgausa, mādi tsî ǁguibadi Eloba ra ǁguibahedi, ǃoaba-ao-e ǃanu ǂgaoǂansa mā tama ǃkhais disa. 10 ǁÎ-i ǂûs, ās, ǃkharaga ǁāsenǀgaugu tsî khoesi ǂnûiǂgādi tsîn ai ǀgui ǂâisa ra ǂnûi xui-ao. Nē ǁgaragu ge ega di Elob ǀasa ǂnûiǂgāde nî hās kōse ǀgui a sîsenxa.
11 Xawe Xristub* ge ǃgâi xūn ǀnai nēpa hân di ǀgapipristerse ge hā. ǁÎb ge a kai tsî dīǀoaǀoasa Tentommi, ǃommi ǀkha kuruhe tama tsî nē ǃhūbaib di tamab di prister. 12 ǁÎb ge Hoan xa ǃAnu ǃKhaib ǃnâ hoan ǃaroma ǀgui ǃnās ama ge ǂgâ, pirin tsî tsâun di ǀaob ǀkhas ose, xawe ǁîb di ǂhunuma ǀaob ǀkha, sada di ǀamo oresa ǁapoǁapos ǃaroma. 13 Pirin tsî ǁgōgu di ǀaob tsî ǂkham tsâus hîa ǂhubiǂuihe hâs di tsaob di ǀgapis ge ǁnān hîa, ǃanuoǃnân di ǃaugasi īsiba ra ǃanuǃanu. 14 Mâtikō ǃnāsaseb ǁnâi Xristub, ǀamo Gagab ǃnâ-u ge ǂnao-o ǁguibase ǁî-aitsama Eloba a māsenni di ǀaoba sada ǂgaoǂande, ǁō hâ sîsenga xu da ûitsama Eloba nî ǃoabase a ǃanuǃanu ǁkhā?
15 ǁNā-amagab ge ǁîba ǀasa ǃgaeǀhaos di ǁaegumâ-ao, ǁnān hîa ǂgaihe hân nî ǀamo ǀumis di mîmâisa ǃkhōǃoase. ǂGuro ǃgaeǀhaos ǃnâ gere dīhe ǃûǂamdi di ores aseb ge ǁōba hâ i xui-ao.
16 ǀUmis xasa i ge a ǂhâbasa, ǁîsa ge xoaǁgui-i ǁō hâ ǃkhaisa ǁgauǁgausa. 17 ǁÎsa ge xoaǁgui-i ganupe a ûitsama ǁaeb ǃnâs a harebeoǃnâ xui-ao; ǁî-i ge aibe nî ǁō, nē ǀumis di xoaǁguib nî sîsenxaga. 18 ǁNās ǃaromas ge ǂguro ǃgaeǀhaos tsîn ge ǀaob ose ǂnûiǂgāhe tama hâ isa. 19 ǂHanub ǃoab ge hoaraga mîmāde ǁaes ǃoa gowaǂuitoas khaoǃgâb ge Moseba tsâugu tsî pirigu ǀaoba ǁgam-i ǀkha haba tsî ǂkhanis tsî hoaraga ǁaesa ǀaoǀapagūǀûn tsî hisopǁnâun ǀkha ge ǀgapi-ai. 20 Tsîb ge ge mî: “Nēb ge ǀaob, Elob ge ǁîsa du nî ǁnâuǀnamse mîmā du ǃgaeǀhaosa ra ǁapoǁapoba.” 21 ǁKhā ǀgaus aib ge Tentommi tsî hoaraga xūn, eloǃoabas ǃnâ gere sîsenūhen tsîna ǀaob ǀkha ge ǀgapi-ai. 22 Tsî ǁkhāti a mîhe ǁkhās ge hoa xūn ge ǂhanub ǃoa ǀaob ǀkha ǃanuǃanuhe tsî i ǀaob di ǂnâxūs ose ǁoren ǀûba-i xare-e a ǀkhai ǃkhaisa.
Xristub ge ǁōb âb ǀkha ǁorena ra ūbē
23 ǁNā-amaga tabernakeli tsî ǁîb ǃnâ hâ xūn hoan; ǁgaeǁgaedi ǀhommi ǃnâ hâ xūn didi ge ûitsamaxūn di ǀaob ǀkha nî ǃanuǃanuhe. Xawe ǀhomsi xūn ǂûn ge ûitsamaxūn di ǀaob ǃgâ-ai ǃgâi ǁguibadi ǀkha nî ǃanuǃanuhe. 24 Xristub ge khoen xa ǃomgu ǀkha kuruhe hâ, ǃAnu ǃKhaib, ama xūn di ǁgaeǁgaes ase īb ǃnâ ǂgâ tama hâ. ǁÎb ge ǀhommi ǂûb ǃnâ ge ǂgâ tsî nēsi sado ǃaroma Elob aiǃâ ra ǂhai. 25 ǁÎb ge mâ ǃnās hoasa ǀGapipristeri hîa, kurikorobe ǁîb ǂûb di tama ǀaoǁguibas ǀkha Hoan xa ǃAnu ǃKhaib ǃnâ ra ǂgâb khami ǃnākorobe ǂgâ tama hâ. 26 ǁNāti i ga ī hâo, ob ge Xristuba ǃnākorobe ga tsâ hâ ǃhūbaib ge ǃgaoǃgaohe ǁaeba xu. Xaweb ge nēsi ǀgui ǃnās ama ǃhūbaib di ǀuni ǁaegu ǃnâ ǁî-aitsama ǁguibasens ǃnâ-u ǁorena ge ūbē. 27 Khoeb ge ǀgui ǃnāsa ǁōsa mîǁguibahe hâ tsî ǁnās khaoǃgâ ǀgoraǃgâsa. 28 ǁNās ǁkhās xaseb ge Xristuba ǀgui ǃnās ǀguisa ge ǁguibahe, ǂguin di ǁorenab nî ūbēse. Tsîb ge ǀgamǁî ǃnāsa khoen di ǁorena nî ūbēse hā tide, xawe ǁnān ǁîba ǃâu hân di ǃgâiǃōsiba nî hā-ūse.
© Khoekhoegowab Elobmîs © Bible Society in Namibia, 2020.
