Koatsanas
1 Koa re ǃKhūba!
ǃKhūb di ǀonsa koa re, sadu ǃKhūb di ǃgādu,
2 ǁîb di ommi ǃnâ ra ǃoabadu,
Elob ai-omgu ǃnâ ra ǃoabado.
3 Koa re ǃKhūba, ǃKhūb a ǃgâi xuige.
ǀOns âba koaǁnaeba re, ǁîs a ǀnamǀnamsa amaga.
4 ǃKhūb ge Jakoba ge ǁhûiǂuibasen,
Israela, ǁîb di ǂhunuma ūhâxūse.
5 ǂAn ta ge a ǃKhūb a kai ǃkhaisa;
sada ǃKhūb hoa elon ǃgâ-ai a kaisa.
6 Dī ǂgaob ra xū-i hoa-eb ge ǃKhūba ra dī
ǀhommi ǃnâ tsî ǃhūbaib ai
hurigu ǃnâ tsî hoa ǃgamsigu ǃnâ.
7 ǁÎb ge ǃhūbaib ǀamsa xu ǃâude ra ǀkhī kai;
ǀnanubab ge napaga ra dība.
Tsîb ge ǂoaba sâuǃnâ-omde xu ra ǂoa kai.
8 ǁÎb hîa ǂguroǃnaesan Egipteb dina ge ǂnauba;
ǂguroǃnaesan khoen tsî ǀgoan dina.
9 Sats Egiptets ǃnâb ge buruxa dīn tsî saode ge dī,
Faraob tsî hoaraga ǂamkhoegu âb ǃoagu.
10 ǁÎb ge ǂgui ǃhaode hîkākā
tsî ǀgaisa gao-aoga ge ǃgam.
11 Sihonni Amorǁîn di gao-aob
Basanni gao-aob, Ogi
tsî hoaraga gao-aogu Kanaanǃhūb diga.
12 Tsîb ge ǁîga ǃhūba ǁîn di ǀumi-amǃnâs ase ge mā
Israelǁaes ǁîb disa, ǀumi-amǃnâs ase.
13 ǃKhūtse sa ǀons ge ǀamose ra hâ
Sa ǂâiǂâisens ge ǃhaosa xu ǃhaos kōse ra hâ ǃKhūtse.
14 ǃKhūb ge ǁaes âba nî gowaǃnoraǃnora
tsîb ge ǃgān âba nî ǀkhom.
15 ǀHaiǀurib tsî ǃhuniǀurib ge a ǁaes di ǁgôa-elo
khoen ǃomgu ǀkha kurusana.
16 Amde ūhâ, xawe ǃhoa tama
mûde ūhâ xawe mû tama.
17 ǂGaede ūhâ xawe ǁnâu tama,
tsî ǁkhāti amdi ân ǃnâ ǀom-e ūhâ tamana.
18 An ǁîna ge kuruna ǁîn khami ī re
tsî ǁkhāti ǁnān ǁîn ai ra ǂgomaiǂnûin hoana.
19 Koa re ǃKhūba Israeli ommi dido!
Koa re ǃKhūba Aronni ommi dido!
20 Koa re ǃKhūba Levib ommi dido!
Koa reǃKhūba, ǁîba ra ǃaoǃgâdu hoado!
21 Ab ǃKhūba Sionsa xu koahe
ǁîb hîa Jerusalems ǃnâ ǁan hâba.
Koa re ǃKhūba!
© Khoekhoegowab Elobmîs © Bible Society in Namibia, 2020.
