Nasirǁîn di ǁgaragu
1 ǃKhūb ge Moseba ge mîmā, 2 îb sao ra ǁgaraga Israelǁîna mā. Mâ khoeb tamas ka io khoes hîa ga ǀō-aisase Nasirǁîsis ǃaroma nū tsî ǃKhūb di ǃoabas ǃaroma a māsen-i, 3 hoa-i ge ǂauxûi-i tsî ǀgaisa āxū-i tsîna ā tide. Draiben ǀkha a dīsa ā-xū-i tamas ka io draiben tamas ka io rosainkin tsîna-i ge ǂû tide. 4 Nasirǁîn as kōsen ge draibeǂgonaba xu hâ xū-i xare-i, ǁkhāti ǃkhomn tamas ka io draibesoro-i xare-e ǂû tide.
5 Nasirǁîsis di nūs ǃnakan hâs kōsen ge ǁîn di danaǀûn tamas ka io ǀhō-amde ǂkhom tide. Nē nūs xan ge ǃKhūb ǃoabas ǃnân nî ǀoasa ǂâis ǀkha hâsa ra ǂgaoǀkhāhe tsî ǁnā-amaga ǁîn di ǀûna nî ǀom kai. 6-7 ǁÎn ǀûn di gaxusib ge ǃKhūb ǃoabas ǃnân māsen hâsa ra ǁgauǂui, tsîn ge ǁnā-amaga ǁō hâ khoe-i soros ǀgūse sī tide, în tā ǁnās ǀkha ǃanuoǃnâ kaisen, nēsi i ga ǁî-i di îb, îs, ǃgâsab ka io ǃgâsas ka xawe. 8 Nasirǁîn as kōsen ge ǃKhūb ǃoabas ǃaroma khaihe hâ.
9 Nasirǁî-i ga ǃnapetamase ra ǁō khoe-i xa tsâǀkhāhe, on ge ǁî-i ǀûna ra ǃanuoǃnâ tsî i ge ǁî-e hû tsēdi khaoǃgâ ǁî-i ǀûna nî ǂkhomǁnâ; o ǀgui-i ge ǁî-e nî ǃanu. 10 ǁKhaisaǁî tsēs ai-i ge ǁnā khoe-e ǀgam ǂnabura tamas ka io ǂnaira ǃKhūb di Tentommi ǂgâ-ams tawa pristera nî sī-ūba. 11 Pristeri ge ǀguisa ǁoreǁguibas ase tsî nausa khauǁguibas ase ǁî-e ǃnapetamase i ge ǁō hâ khoe-i sorosa tsâǀkhā ǃkhais di ǂkhîbagus ase nî ǁguiba. ǁNā tsēs ǁkhās ai-i ge ǁî-i danaǀûna nî ǁhaitsoatsoa kai 12 tsî Nasirǁî-i ase ǁî-i ǁaeba ǁkhawa ǃKhūb ǃoabas ǃaroma nî khai. ǁÎ-i ge aiǃâ dī hâ i sîsenni ge ǃgôa tama hâ, ǁî-i ge ǃanuoǃnâ i xui-ao. ǃAruǀî-i ge ǁî-e ǀgui kurixa ǁkhaoba ǁoreǁguibas ase nî hā-ū.
13 Nasirǁîn ga ǁîn di nūsa dītoa, on ge sao rase nî dī: ǃKhūb di Tentommi ǂgâ-ams tawa sī 14 tsîn ge ǃKhūb di ǃgôasib ǃaroma ǃnona ūo ǀgoana nî hā-ū: ǀGui kurixa ǁkhaoba khauǁguibas ǃaroma, ǀgui kurixa ǁkhaosa ǁoreǁguibas ǃaroma tsî baiba ǂkhîbagus ǁguibas ǃaroma. 15 ǁÎn ge ǁkhāti ǀharus di khūkhū-e ūhâ tama pere-e nî ǁguiba: ǁAu peredi, oli-i ǀkha habasa mel-i ǀkha hâdi tsî ǀkhera-oli-i ǀkha ǂkhauǀkhāsa ǃgupu pererodi, tsî ǃhoro-i tsî ǂauxûi-i tsîn ǃaroma a ǂhâbasa ǁguibadi tsîna.
16 Pristeri ge nē xūn hoana ǃKhūb di ǃgôasib ǃoa hā-ū tsî ǁoreǁguibas tsî khauǁguibas tsîra nî ǁguiba. 17 ǂKhîbagus ǁguibas aseb ge pristera baiba ǃKhūb di ǃgôasib ǃoa, ǀharus di peren ǀkha ǀguipa tsî ǁkhāti ǃhoroǁguibas tsî ǂauxûiǁguibasa nî dī. 18 ǃKhūb di Tentommi ǂgâ-ams tawan ge Nasirǁîna ǁîn di ǀûna ǂkhomǁnâ tsî ǀûn âna ǂkhîbagus ǁguibas ra dī-aihe ǀaes ai nî ǂhubi.
19 Baib di ǁkhûib ga sâihe, ob ge pristera ǁîb ǀkha ǀhao hâse ǁau pereb tsî ǀharus ǃnâ ǃgupu pereros tsîna Nasirǁîb, danaǀûna ǂkhomǁnâ hâba nî mā. 20 ǁNāpa xub ge pristera ǁîna ǀō-aisa mās ase ǃKhūb ǃgôasib ǃaroma, ǁkhaib tsî ǃūb tamas ka io tîba nî mā; ǁîkha ǂhanub ǃoa a pristeri dikha xōǀkhān ge ǁîna a pristeri di ǃnâu ǁguiba. ǁNās khaoǃgân ge Nasirǁîna ǂauxûi-e a ā ǁkhā.
21 Nēgu ge ǁgaragu Nasirǁîn ǃaroma hâga; xawen ga ǁîna ǁîn nî ǁguibas xa ǃnāsase mîmâi, on ge ǁnā mîmâisa nî dīǀoaǀoa.
Pristersi ǀkhaeb
22 ǃKhūb ge Moseba ge mîmā, 23 îb Aronni tsî ǁîb ôagu tsîga mîba, î gu Israelǁîna gu ga ǀkhae, o sao ra mîde gowaǂui:
24 Ab ǃKhūba ǀkhae tsî sâu du;
25 Ab ǃKhūba ǁîb di aisa ǃnâǃnâǂam du tsî ǀkhom du;
26 Ab ǃKhūba ǁîb di aisa ūkhâiǂam du tsî ǂkhîba mā du.
27 “ǁNāti gu ge pristerga ti ǀonsa Israelǁîn ǂama nî gowaǂui, o ta ge ǁîna nî ǀkhae.”
© Khoekhoegowab Elobmîs © Bible Society in Namibia, 2020.
