1 Ob ge Pauliba ǃoaǃū ǀGapi ǀapemāǃnans diga kō tsî ge ǃhoatsoatsoa: “Ti ǃgâsago, nētsēs kōse ta ge tita Elob aiǃâ ǃanu ǂgaoǂans ǀkha ûi hâ.” 2 Ob ge ǀgapipristeri,* Ananiaba Paulub ǀgūse ge mâ iga ge mîmā ǁîba gu nî ams âb ai ǁapu ǃkhaisa. 3 Ob ge Pauluba ǁîb ǃoa ge mî: “Elob ge satsa nî ǁapu, sa ǁāǃuriǃurihe hâ ǂnubiǂgoatsa! Tita nî ǂhanub ǃoa ǀgoraǃgâhe ǃkhaisa nî mûǂamsets ǂnôa hîats ǂhanub ǃoagu sîsen tsî tita nî ǁapuhe ǃkhaisa ra mîmā?”
4 On ge ǁnān hîa Paulub xōǀkhā ge mâ ina “Elob di ǀgapipristerats ra ǃhāsara?” ti ge dî bi.
5 Ob ge Pauluba ge ǃeream: “Ti ǃgâsado, tita ge ǁîb a ǀgapiprister ǃkhaisa go ǀū i. Nēti xoahe hâ amaga: ‘Sa ǁaes di ǂgaeǂgui-aob ǃoaguts ge ǂkhabase ǃhoa tide.’ ”
6 Tsî Paulub ge nē ǀapemāǃnans di khoen ǀnîn a Farise tsîn nauna Saduse ǃkhaisa ge ǂan i tsîb ge “ǃGâsago, tita ge Fariseta, Fariseb di ôata! Tsî ta ge ti ǃâubasens ǁō hân di khâimâs ǃnâ hâ xui-ao nētsē ra ǁnâuǃgâhe” ti ge ǂgaiǂui. 7 Tsî ǁnāsab ge mî, os ge ǀapemāǃnansa ǂnoagutsoatsoa tsî ǀgam ǃâra ǃnâ ge ǀgora; Farisegu* tsî Sadusegu* ase, 8 (Sadusegu ǁō hân di khâis tamas ka io ǀhomǃgān tamas ka io gaga-i a ǀkhai ti ra mî xui-ao; xawe Farisegu ge nēn hoan ǃnâ ra ǂgom.) 9 Tsîb ge ǂkhubiba ǃaruǀîǀgui ge kai. O gu ge ǀnîgu Moseb ǂhanub* di ǁkhāǁkhā-aogu di gu hîa Farisega khâi tsî ge mî: “Sige ge nē khoeb tawa i tsū xū-e hō tama hâ. ǀNîsi i kom gaga-i tamas ka io ǀhomǃgā-e ǁîb ǀkha go ǃhoao.” 10 ǂKhūbib ge kaise a ǃgari tsî ǀgai, ob ge toroǃkhamaogu di ǂgaeǂgui-aoba kaise nē khâikhâisenaon xa ge ǃao, tsî ǁîn nî Pauluba ǀkhauǃā khami ge tsâ. Tsîb ge toroǃkhamaogu âba ge mîmā, khoen ǁaeguba xub Pauluba toroǃkhamaogu di hâǃkhais ǁga nî oa-ūhe ǃkhaisa. 11 ǁNā tsuxubab ge ǃKhūba Paulub tawa ǂhai tsî ge mî: “ǂGaoba ūhâ re Paulutse. Nēpats Jerusalems ǃnâ tita xa khoena goro ǃhoaba khamits ge ǃGâiǂhôasa Romes tsîn ǃnâ nî sī ǃkhō-am.”
Pauluba ǃgams di ǀapeǀhaos
12 Nautsēkam ǁgoagan ge Jodeǁîna ǀhao tsî ǀhûpe ge nū, Pauluban ǃgam tama hîan xū-i xare-e ǂû tamas ka io ā tide ǃkhaisa. 13 ǁAubexan ge nē ǀapeǀhaosa gere dīna hakadisis xa ge ǃnāsa i. 14 Tsîn ge danapristergu tsî ǂnomdomgu* tsîn tawa sī tsî ge mî: “Sige ge ǀhû hâse go nū, Pauluba ge ǃgam tama hîa ge xū-i xare-e ǂû tide ǃkhaisa. 15 O ge ge sago ra ǁgui-ai, î go toroǃkhamaogu di ǂgaeǂgui-aoba sī mîba îb Pauluba ǁkhawa ǀapemāǃnans tawa oaǀkhī-ūhe. Kaise ǀoasase tsî ǂōrisase ǁîb di ǁhōba ra ôaǃnâ ǂgao khami dīsen. Sige ge ǁîba noxopab nēpas tsîna ǀkhī-ūhe tama hîa daob ǃnâ nî ǃgam.”
16 Xaweb ge Paulub di ǃgâsas ôaba nē ǀapeǀhaosa ǁnâu tsî toroǃkhamaogu hâǃkhaib ǁga ǃgû tsî Pauluba sī ge mîba. 17 Tsîb ge Pauluba mâisagu di ǀguiba ǂgaiǀgū tsî ge mîba: “Nē ǂkham khoeba toroǃkhamaogu di ǃkhōdana-aob tawa sī-ū re. ǁÎb ge kaise ǂhâǂhâsa xū-i ǁîbab ra mîba ǂgao-e ūhâ xuige.” 18 Ob ge mâisaba Paulub di ǁnurisaba ū tsî toroǃkhamaogu di ǃkhōdana-aob tawa sī-ū tsî ge mî: “ǃKhōsabeb Paulub ge nē khoeba ta sats tawa nî ǀkhī-ū ǃkhaisa go ǂgan te; ǁîb satsa xū-e ra mîba ǂgao xui-ao.” 19 Ob ge toroǃkhamaogu di ǂgaeǂgui-aoba ǁîba ǃommi ai ǃkhō tsî ǀgui ǀkhāb ǁga ū tsî “Tare-ets ra mîba te ǂgao?” ti ge dî. 20 Ob ge “ǀNî Jodeǁîgu ge satsa gu nî ǂgan, îts Pauluba ǁîn di ǀapemāǃnans ǃoa sî, kaisen ǂōrisase ǁîb di ǁhōba ôaǃnâ ǂgao hâ xū-i khami” ti ge mîba bi. 21 Tsîb ge ǃaruǀî ge mîba bi: “Xawe tā ǃhoadan kaisen! ǁAubexa hakadisi khoegu ge daob xōǀkhā ǀnai ǃâuǁgoe, ǁîba ǁnāǂam tsî gu nî ǃgam bise. ǁÎgu ge ganupe gu Pauluba ǃgam tama hâ hîa gu xū-i xare-e ǂû tamas ka io ā tide ǃkhaisa go nū. Tsî gu ge sats nē ǂgans ai oe-am tsî ǁîba nî sî ǃkhais ǀguisa ǃâu hâ.”
22 Ob ge toroǃkhamaogu di ǂgaeǂgui-aoba ǁîba ǃkhâikhom, sî-oa bi tsî ge mî: “Tā i khoe-i xare-e nēsats go satsa mîba te ǃkhaisa ǂan.”
Paulub ge gowoniab Feliksi ǁga ra sîhe
23 Tsîb ge toroǃkhamaogu di ǂgaeǂgui-aoba ǀgam mâisakha âba ǂgaiǀgū tsî ge mîmā: “ǃGû î ǀgamkaidisi toroǃkhamaoga sī ǂhomi, nē ǃoe, khoese ir Kaesareas ǁga nî ǂgaekhâise. ǁKhāti hûdisi hāǃgapi-aogu tsî ǀgamkaidisi ǁhâigôaǁhâi-aogu tsîna. 24 Paulub tsîna ǃgapi-aixūna ǂhomiba, î ǁîba ǃnorasase ǀkharisi mûǂamaob, Feliksi tawa sī-ū.”
25 Tsîb ge toroǃkhamaogu di ǂgaeǂgui-aoba nēti ra mî sîǂkhanisa ge xoa:
26 “Klaudius Lisiata xu hâ tawedes, ǀGapiǃgôahesa ǀKharisi mûǂamao Felikstse: 27 ǀNî Jodeǁîn ge nē khoeba ge ǃkhō tsî ǁîba goro ǃgam ǂgao. Xawe ta ge tita ǁîb a Romeǁî ǃhūǁî ǃkhaisa ta go ǂanǂui, o ǁîba toroǃkhamaogu ǀkha go sī, ǁîba sī nî ǃnoraǃnorase. 28 ǁÎban tare-i ai ra ǃnuriǃgâ ǃkhaisa ǂanǂui ǂgaos ai ta ge ǁîba ǁîn di ǀapemāǃnans ǁga ge hā-ū. 29 Xawe ta ge ǁîb ǁōb ǁkharab tamas ka io ǃkhō-oms ǃnâb ni aoǂgābahe ǃûǂam-e ūhâ tama ǃkhaisa go mûǂan; ǁîb ǁîn di ǂhanub di ǂnoagu-aidi ai hâ dîdi ai ǀgui ra ǀhapiǂnûiǀkhāhe xui-ao. 30 Tsî ǁîn ra ǁîba ǃgamsa ǀapeǀape ǃkhaisa ta go ǁnâu, o ta ge ǁîba ǁnātimîsi sats ǁga go sî. Tsî ta ge ǁîb di ǀanaǃgâ-aona sats aiǃân sī ǁîb di ǃoagun ūhâ ǀhapimāsa ǁgui, ti go mîba.”
31 Tsî mîmāhe gu ge khami gu ge toroǃkhamaoga Pauluba Antipatris kōse ge sī-ū. 32 Tsî gu ge ǁîga toroǃkhamaogu hâǃkhais ǁga ge oa, tsî gu ge hāǃgapi-aoga ǁîba aiǃâ Kaesareas ǁga ge ǃkharu-ū. 33 Tsî Kaesareas tawa gu ge sī, o gu ge Paulub tsî sîǂkhanis tsîna ǀkharisi mûǂamaob Feliks ai ge ǁkhaeǁnâ. 34 Ob ge ǁîba sîǂkhanisa khomai tsî Pauluba mâ ǀkharib dib a ǃkhaisa ge dî. Tsîb ge Pauluba “Silisiab” ti ge ǃeream bi. Paulub a Silisiab ǀkharib di ǃkhaisab ge ǁnâu, 35 ob ge “Sa ǀanaǃgâ-aon ga ǀkhī, o ta ge nî ǁnâuǃgâ tsi” ti mî tsî toroǃkhamaoga ge mîmā Herodeb di gao-ommi ǃnâb nî ǃkhōsis ǃnâ ūhâhe ǃkhaisa.
© Khoekhoegowab Elobmîs © Bible Society in Namibia, 2020.
