Jesub ge Moseb xa a kai
1 ǁNā-amaga, ǃanu ǃgâsadu hîa ǀhomsi ǂgais ǃnâ ra amǃnâxado, Jesub, Apostel* tsî ǀGapipristeri* sada ra ǁguiǁnâ ǂgoms diba ǂōrisase ǃgaoǃgâ re. 2 ǁÎba ge ǁgaumâi Elobab ge ge ǂgomǂgomsaba i, Moseb ge ǁîb sîsenni ǃnâ Elob di ommi ǃnâ ǂgomǂgomsa is ǁkhās khami. 3 Omsa ra ǂnubi khoeb, oms xa kai ǃgôasiba ūhâs, ǁkhās khamib ge Jesuba Moseb ǃgâ-ai kai ǃgôasiba anu hâ. 4 Mâ oms hoas ge khoe-i xa ra ǂnubihe, xawe Elob ge hoa xūna ge ǂnubi. 5 Moseb ge ǃoaba-aob ase hoaraga ommi Elob dib ǃnâ ge ǂgomǂgomsa i, Elob nî mî xūn xab nî ǃkhō-amse. 6 Xaweb ge Xristuba* Elob di ommi ǂama ǀGôab ase ge ǂgomǂgomsa i. Sada ge a ǁîb di om, ǁkhoaǂgaosib tsî ǂgomǃgâs ǀkha da ga ǃâubasens ǃnâ hâhâo.
Elob khoen di sâb
7 ǁNā-amaga, ǃAnu Gagab ra mî khami:
“Nētsē, ǁîb domma du ga ǁnâuo,
8 sadu ǂgaoga tā sadu aboxagu khami karokaro,
Elob ǃoagun ge khâikhâiseno,
ǃâitsâs di tsēs ai ǃgaroǃhūb ǃnâ;
9 ǁnāpa gu ge sadu îga ǃâitsâ tsî gere ôaǃnâ teo,
hakadisi kurigu kōse ta dī hâ sîsengan gere mû xawe:
10 Tsî ta ge ǁnā ǃkhais ǃaroma nē ǁaes ǀkha ǁaixa tsî ge mî:
‘ǂGaogu ân ge hūgaǀgui ra ǁhapuma
tsîn ge ti daoga ǂan tama hâ;
11 o ta ge tita ti ǁaib ǃnâ ge nū,
ti sâb ǃnân ǂgâ tide ǃkhaisa.’ ”
12 ǂAnbasen ǃgâsado, î-i tā ǀgui-i xare-e ǂkhaba ǂgaob, ǂgomoǃnâsib diba ūhâ tsî ǁnās ǀkha ûitsama Eloba xu ǁnāǁgôa. 13 Xawe mâ tsēs hoas ai ǂgaoǂgaoǃnâgu, î du “Nētsēs” ti ra mîhes kōse, tā ǀgui-i âdu tsîna ǁoreb di ǂgaeǂhapus xa ǃnâudanaxa kaihe. 14 ǀHōsaguse da ge Xristub ǃnâ a ǃâ, ǀams kōse da ga tsoatsoa-ū da ge ǂgomǃgâsa a ǃkhōǀgarao.
15 Nēti ra mîhe xui-ao:
“Nētsē, ǁîb di domma du ga ǁnâu,
o sadu ǂgaoga tā karokaro,
Eloba ra mâǃoan khami.”
16 Mâna kha ǁnâu tsî ti ǃoagu ge khâikhâisenna? Moseb di ǂgaeǂguis ǃnaka ge Egipteba xu ǂgaeǂguiǂuihen hoa tamana? 17 Tsî mâ khoen ǀkhab ge hakadisi kuriga ǁaixa hâ i? ǁNān, ǁore tsî ge ǃgaroǃhūb ǃnâ ǁō tamana? 18 Tsî mânab kha ge nūba ǁîb di sâb ǃnân ǂgâ tide ǃkhaisa? ǁNâuǀnamoǃnân ǀgui tamana? 19 Tsî da ge ra mû ǂgomoǃnâsib ân ǃaroman ge ǂgâ ǁoa i ǃkhaisa.
© Khoekhoegowab Elobmîs © Bible Society in Namibia, 2020.
