Moseb
1 Jakob di suriba xub ge ǃKhūba eloǃgaoǃgâxa khoeb, mâ khoe-i hoa-i di ǃgôasiba ge dan tsî Elob tsî khoe-i xa ge ǀguitikōse ǀnamhe ib, nēb ge Moseba ge kaikai. 2 ǃKhūb ge ǀhomǃgāgu di ǂkhaisib ǀkha ǀguitikō ǂkhaisib tsî ǀgaib, khākhoen ǃnâ gere ǃaoba ǂgāba Moseba ge mā. 3 Moseb ge ge ǃhoa tsîb ge ǃKhūba buruburuxa xūn ītsoatsoa gena ge dī. ǁÎb ge gao-aob Egipteb diba Mosebab nî ǃgôa ǃkhaisa ge ǁgari. ǁKhātib ge ǂhanub, khoen ǃoa nî māǃkharuheba ge mā bi tsîb ge ǃKhūba ǁîb di ǂkhaisiba ge ǁgau bi. 4 ǃKhūb ge Moseba hoa khoena xu ge ǁhûiǂui tsî ǁîba îǂhôa tsîb ge ǃgamǃgamsenxa i xui-ao ge khai. 5 ǁÎb ge Moseba ǁîb di dommab nî ǁnâu ǃkhaisa ge mā-am tsî ǃkhae kai ǃâus ǃnâ ge ǂgaeǂguiǂgā. ǁNāpab ge ǃKhūba aisa xu ais ǃoa ge mû tsîb ge ǃKhūba mîmāde ge mā bi; ǂhanub hîa ûib tsî ǁnâuǃāba ra hā-ūba. ǁÎb ge Jakob nē ǃgaeǀhaos di mîmāde nî ǁkhāǁkhāsen ga ge dī.
Aronni
6 Moseb di ǃgâsab, Aronni ge Levib di ǃhaosa xu ge khaihe khoe iba. ǃKhūb ge ǁîba ge ǀgapiǀgapi. 7 ǃKhūb ge Aronni ǀkha ǀamos kōse mîǀgui-e ge dī tsî ǁîba pristerseb nî Israelǁîna ǃoaba ǃkhaisa ge ǁgui-ai. ǁÎb ge ǁîba îsa anaǂamsarab tsî îsa saran ǀkha anas ǀkha ǃgôasiba mā, 8 tsîb nî ǀoasase îsase mûsenga. ǃKhūb ge ǁîba anusib tsî ǃnona xūn ǁîb di pristersi ǁkhāsiba ra ǁgauǂuina ge mā: ǃKhain ǀkha kuruhe hâ ǃnubusaran, gaxu anaǂamsarab tsî ǀgapiǀgause anihe hâ forkhōs tsîna. 9 Aronni di anaǂamsarab di ǂomamǃgâb ge granatn ǀkha ge anihe hâ i tsî di ge ǃhuniǀuri ǀurirode ǁîn ǁaegu ge ǂomǂgāhe hâ i. Khoen ge Aronni gere ǃAnusib ǃnâ ǂgâo ǀurirodi ra ǀō ǀgausa ge ǁnâu ǁkhā i. Nēs ge khoen nî Elob ai ǂâisa ǂnûi ǃkhais ǀkha gere hui. 10 ǃAnu anaǂamsarab Aronni ge ana hâ ib ge kuruǃnôagu hîa ǃhuni, ǂhoa tsî ǂhoaǀapa ǁapan ǀkha ǂomhe hâgu ǀkha ge anisa i. ǁÎb ge ǁkhāti ǁkhaisarab Elob di ǂâisa mîǁguis ǃaroma ra sîsenūheba ge ana hâ i. 11 ǃOmsîsenaob ge ǀapa ǁapa-e efoba nî anise ge sîsenū. ǁNāpa di ge ǃgomǀgausa ǀuidi hîa ǃhuniǀuriramdi ǃnâ ǀuiǀkhō-aob xa ǂgāhe hâde ge hâ i, tsî mâ ǀguis hoas ai i ge xoaǁkhāsiba ūhâ xoa-ao-e ǀons ǀguis Israelǁîn di ǃhaos disa ǀā xū-i ǀkha ge xoa. 12 ǃKhūb ge Aronna ǁkhāti ǃkhaiǀgapasa ge mā. Nē ǃkhaiǀgapas ais ge îsa ǃhuniǀuri krons, ǂansa ūhâ khoeb hîa ge “ǃAnusib” ti hâ ǂganǃgâsa mîsa ǁîs ǃnâ ǃgaoǂgāb xa ge kuruhe. Nēs ge ge kaise îsa anisenxū i tsî ǁîsa ǀgapas ge ge kai ǃgôasi i. 13 Aronni ǁaeb aiǃâ i ge ǁnāti-ī îsa xūna ge mûhe tama hâ i. ǀGui-i tsîn ge Aronni tsî ǁîb ôananôagub ose ǁîna ge ǀgapa tama hâ i tamas ka io nî ǀgapa. 14 ǀGam ǃnāra tsēs ǃnâ, hoaǁae gu ge nē pristerga hoaragase ra khauǂui ǁguibade nî ǁguiba.
15 Moseb ge Aronna pristerse, ǃanu oli-eb ge ǁîb di danas ai ǂnâ ǃkhais ǀkha ge ǀnau. Tsîb ge ǃKhūba ǀamo ǃgaeǀhaosa Aronni tsî ǁîb ôananôagub ǀkha, ǁîn nî ǀamose pristerse sîsen tsî khoena ǀgoreǀîs ǃnâ ǂgaeǂgui tsî ǁîna ǃKhūb ǀons ǃnâ ǀkhaega ge dī. 16 ǃKhūb ge Aronna hoaraga khoesib ǁaeguba xu ǁguibadeb nî ǁguibaga ǁhûi tsî ǃgâihamxūnab nî ǃKhūb nî ǁîb khoena ǂâis ǃnâ ūhâ tsî ǁîn ǁoren âna ūbē ga ge ǂhubi. 17 ǁÎb ge Aronni nî ǃkhōǀgaipega ǁîba ǁkhāsib ǂhanusi ǀapemādeb nî māga ǁîb ai mîmāde ge ǂgomǃgâ tsî ǃnâba Israelǁîna ǂhanuba ǁkhāǁkhās ǃnâ-ū ge hā-ūba. 18 ǀNî ǃnā-i ai Israelǁîn ge ǃgaroǃhūb ǃnâ hâ i, o gu ge ǃgubis di ǁaixa khoegu hîa ge prister tama hâ iga, Aronna suri tsî ǁîba ge mâǃoa. Nēgu ge Datanni, Abirammi tsî Korab ǁîb di saoǃgonaon ǀkha. 19 ǃKhūb ge tare-en ra dī ǃkhaisa mû tsî ge ǁaixa. ǁNātikōse ǁaixa tsî buruxa dī-e dī tsî ǁîna ǁhabu ra ǀaes ǀkha ge hîkākā. 20 ǃKhūb ge Aronna ǁkhawa ge mādawa-am, ǀō-aisa ǃgôasiba mā bis ǀkha: ǂGuro ǃhanaǂûn ǁguibas di aiǂhanuba, pristergu nî ǂâu hâ ǂûna ūhâse. 21 ǃKhūb ra ǁguibahe ǁguibadi din ge ǁîgu ǂûna; ǃKhūb ge ǁîna Aronni tsî ǁîb di ôananôaguba ra mā. 22 Xawe Aronni tsî ǃgau hâ khoen ǁkhān khamib ge ǃhū-e ǀumi tama, ǀgui khami i ǀō-aisa ǃhūǃâro-i ge ǁîb ǃaroma hâ tama hâ. ǃKhūb ǂûbab ge ǂhâba hâ.
Pinehab
23 Israelǁîn ge ǃKhūba mâǃoa, ob ge Pinehab, Eleasari ôaba ǁkhoaǂgao tsî ǃgari-aose ge ǀgaimâ. Nē ǀgaub aib ge Israelǁîn di ǁoren ǃaroma ǀûbasa ge hā-ū. 24 ǁNā-amagab ge ǃKhūba ǁîb ǀkha ǂkhîb di ǃgaeǀhaos hîa ǀamose nî hâhâ tsî ǃanusib tsî ǁîb khoen di ǂgaeǂgui-ao tsî ǁîb tsî ǁîb ôananôaguba ǀgapipristeri di berosa ǀamose nî ǂgaeǂguise ge dī. 25 ǃKhūb ge ǁkhāti mîmā-e Davidi, Jesseb ôab, Judab ǃhaosa xu hâb ǀkha ge dī. ǁÎb ge ǁîba gaosis nî ǁgûba xu ôasab ǁga ǃkharu ǃkhaisa ge mîmâi. Xaweb ge ǃKhūba, Aronna pristersis nî hoaraga aore ôananôagub ǁga ǃkharu ǃkhaisa ge mîmâi.
26 Nēsi ǃKhūb hîa ǃgâi tsî satsa ǂkhaisib krons ǀkha ge ǀgapaba koa. Ab ǃKhūba Israelǁaes di pristerga ǂhanu-aise ǀgoraǃgâs di gā-aisiba mā, îb ǁîn di ǃgâiǃgâb tsî ǃgôasiba ǃgoaxaǁaeb ǃnâ aiǃgû ǁkhā.
© Khoekhoegowab Elobmîs © Bible Society in Namibia, 2020.
