Danieli tsî Beli di pristergu
1 Gao-aob Astiagesi ǁōb khaoǃgâb ge Sirusi, Persiab diba gaosisa ge ūǃkhuni. 2 Danieli ge ge gao-aob Koresi di ǀhōsa tsî ǀapemā-ao i tsîb ge gao-aoba nau ǀhōsagu hoagu âb ǃgâ-ai, ǁîba ǃnāsa ǃgôasiba ge ūba hâ i.
3 Babiloniaǁîn ge Bel, ti ǀon hâ ǁgôa-eloba ge ūhâ i. Tsēkoroben ge khoena Bela disiǀgamǀa xapadi di ǃgâi mel-i, hakadisi gūn tsî ǀgamkaidisi litergu ǂauxûi-i tsîna gere ǁguiba. 4 Gao-aob Sirusi ge Bela kai ǃgôasiba ge ūba hâ i tsî tsēkorobe ǁnāǀî ǃgû tsî ǁîba sī gere ǀgoreǀî. Xawe Daniela ge ǁîb Elob ǂûba gere ǀgoreǀî.
5 ǀGuitsēb ge gao-aoba Daniela “Tare-i ǃaromats Bela ǀgoreǀî tama hâ?” ti ge dî.
Ob ge Daniela ge ǃeream: “Tita ge ǁgôa-elon, khoesi ǃomgu ǀkha kuruhe hâna ǀgoreǀî tama hâ. Tsî ta ge ûitsama Elob, ǀhommi tsî ǃhūbaib tsîkha ge kurub, ûitsaman hoan di ǃKhūb ǀguiba ra ǀgoreǀî.”
6 “Ots kha sida elob, Beli amase ûitsama ǃkhaisa ǂgom tama hâ?” tib ge gao-aoba ge dî. “Mâtikōseb tsēkorobe ǂû tsî ra ā ǃkhaisats kha mû tama hâ?” 7 Ob ge Daniela âi tsî ge mî: “Gao-aotse ta gāhe re. Nē elob Beli tits ra ǀonǂgaib ge ǂgoa-i ǀkha kuruhe tsî brons-i ǀkha ǃkhûǀkhāhe hâ tsî tātsē xū-i xare-e ǂû tsî ā tama hâ.” 8-10 Nēs xab ge gao-aoba ǁaixa tsî hoaraga hûdisi pristergu Beli diga ǂgaiǂgâxa tsî ge mî: “Tari-i nē ǂûna ra ǂû ǃkhaisa go ga mîba te tama i, o go ge nî ǃgamhe. Xawe Beli ra amase ǂû ǃkhaisa go ga ǁgauǂui, ob ge Daniela, Belab ge ǃkhāǃkhā amaga nî ǃgamhe.”
Danieli ge nē aoǁguiba ge ǃkhō-am. 11 Tsî gu ge hoatsama gao-aob ǀkha Beli tempeli ǃnâ a ǂgâ, o gu ge pristerga gao-aob ǃoa ge mî: “Gao-aotse, sige ge ra ǂoa, xuige ǂûna tāb ai mâi, î ǂauxûiba aiǂhomi. Tsî ǂoats kas khaoǃgâ dao-amsa ǃnau-am tsî gaosi ǂganamūxūs ǀkha ǂganam. 12 ǁGoagats ga hā tsî Beli hoa xūna ǂû tama ǃkhaisa mû, ots ge ǃgam ge ǁkhā. Xaweb ga ǂû hâ, ob ge Daniela sige ǃoagub go dī ǂhumi ǀanaǃgâs ǃaroma nî ǃgamhe.”
13 Pristergu ge ǁîgu ge ǂganǃgâsa ǂgâ-amsa tempeli ǃnâ, tāb ǃnaka kuru hâ i xui-ao ge ǂâiǂhansen tama hâ i. Mâ tsuxub hoaba gu ge ǁnāpa-u ǂgâ tsî nē ǁguibaxūna gere hapu.
14 Pristergu ge ǂoa, ob ge gao-aoba Bela ǂûna ge aiǂhomiba. Ob ge Daniela ǁîb di ǃgāga ge mîmā, î gu tsao-e hā-ū tsî tempeli di ǂaiǂgapab ai tsoro. Gao-aob ose, i ge ǀgui khoe-i tsîna nēsa gu ra dī ǃkhaisa ge mû tama hâ i. ǁNās khaoǃgâ gu ge hoatsama ǂoa tsî dao-amsa ǃnau-am tsî gaosi ǂganamūxūs ǀkha ǂganam tsî ge oa.
15 ǁNā tsuxuba gu ge ǀnai gu ra dī khami, pristerga ǁîgu taradi tsî ôasan tsîn ǀkha tempeli di ǂganǃgâsa dao-ams ǃnâ-ū ǂgâ tsî hoaraga ǂûna hapu tsî ǂauxûib tsîna ge āǂui.
16 Sao ra ǃnauǁgoaga kha ge gao-aob tsî Danieli tsîkha tempeli ǃoa ge ǃgû. 17 Ob ge gao-aoba ge dî: “Danieltse, ǂganamūxūde khôahe di hâ?”
“Hî-î, Gao-aotse, khôahe tama di ge hâ” tib ge ge ǃeream.
18 Tsî dao-amsab ra ǁkhowa-am hîab ge gao-aoba ǁnātimîsi ǀkhai-ai tāba mû tsî ge ǃau: “Kaits ge a, Beltse! Sats ge amase a elo.”
19 Xaweb ge Daniela âitsoatsoa tsî gao-aob ǃoa ge mî: “Tempeli ǃnâts nî ǂgâs aiǃâ, ǂaiǂgapab ai kō, î tari-i di ǂainats ra ǁnāpa mû ǃkhaisa mîba te re.”
20 Ob ge gao-aoba: “Tita ge aogu, tarekhoedi tsî ǀgôan di ǂaina ra mû,” ti ge mî. 21 Gao-aob ge ǁaixa tsî pristergu, ǁîgu taradi tsî ôasan tsîn ǃkhōhe tsî ǁîb ǃoa nî ūhāhe ǃkhaisa ge mîmā. ǁÎn ge ǂganǃgâsa dao-amdi, ǁîdi ǃnâ-ūn ge ǂûn hîa tāb ai mâihe hâna nî ǂûse gere ǂgâde ǁîba ge ǁgau. 22 ǁÎb ge pristerga ǃgam kai tsî Bela, Daniela ge māǁnâ, tsîb ge ǁîba nē ǁgôa-elob tsî ǁîb di tempeli tsîkha hoakha hîkākā.
Danieli ge kaiǀaoba ra ǃgam
23 ǁNāpab ge ǁkhāti kai Kaiǀaob, Babiloniaǁîn xa gere elo-i ase ǀgoreǀîheba ge hâ i. 24 ǀGuitsēb ge gao-aoba Danieli ǃoa ge mî: “Nē elob a ûitsama elo ǃkhaisats ge a ǂnoaǃoa ǁoa, xuige ǁîba ǀgoreǀî!”
25 Ob ge Daniela ge ǃeream: “Tita ge ǃKhūb ti Eloba ra ǀgoreǀî, ǁîb ǀguib a ûitsama Elo xui-ao. 26 Xawe Gao-aotse mā-am te, o ta ge nē kaiǀaoba, hoaǀkhāǀāgôa-i tamas ka io ǃhôa-i tsîn ose nî ǃgam.”
“Mā-am tsi ta ra” tib ge gao-aoba ge mî.
27 Ob ge Daniela tēr-i, ǁnui-i tsî ǀûn tsîna ū, hoana sâiǀhao, tsamperena kuru tsî kaiǀaoba ge ǂûmā. Tsî ǂûb ge, ob ge khū tsî ge ǂariǃā. Ob ge Daniela ge mî: “Mû, tare-e du gere sa Babiloniaǁîdo ǀgoreǀî ǃkhaisa.”
28 Tsî Babiloniaǁîn ge tare-i ge ī ǃkhaisan ge ǁnâu, o gao-aoba nî mâǃoase ǁaixasib ǃnâ ǀhao tsî gere ǃau: “Gao-aob ge go Jodeǁî kai. ǁÎb ge Bela hîkākā, pristerga ǃgam tsî ǁkhāti nēsi sida kaiǀaob tsîna go ǃgam.” 29 ǁÎn ge gao-aob tawa sī tsî ǁîb ǃoa ge mî: “Daniela sida ǃomǁae māǁnâ. ǂKhāts ka, o da ge sats tsî sa omaris hoaragas dido nî ǃgam.”
30 Tsî gao-aob ge mîn ra xūnan ra ǂâibasen ǃkhaisa mû, ob ge Daniela ǁîn ǃomǁae ge māǁnâ.
Danieli ge xamn āb ǃnâ ra aoǂgāhe
31 Babiloniaǁîn ge Daniela ū tsî xamn āb ǃnâ ge aoǂgā, tsîb ge ǃnani tsēde ǁnāpa ge hâ. 32 ǁNā āb ǃnân ge hû xamna ge ge hâ i, tsîn ge mâ tsēs hoasa ǀgam khoen di sorora tsî ǀgam gūn tsîna gere ǂûmāhe. Xawen ge nē ǃnani tsēdi ǁaeb ǃnâ, Danielan nî hapu ǁkhāse, ǂûxū-i xare-e ge māhe tama hâ i.
Danieli ge xamn āba xu ra huiǂuihe
33 ǁNā ǁaeb ǃnâb ge kēbo-aob Habakuka Judeab ǃnâ ge hâ i. ǁÎb ge ǂû-e sâi tsî perena ǃores ǃnâ khôaǂgā tsî ǃhoroǃhanagu ǃnâ gere sîsen aoga ge ǃgû-ūba. 34 Xaweb ge ǃKhūb di ǀhomǃgāba Habakuki ǃoa “ǁNāts ūhâ ǂû-e Danieli, Babilons ǃnâ xamn āb ǃnâ hâba sī mā” ti ge mî.
35 Ob ge Habakuka “ǃGôahesatse, tita ge noxopa Babilons ǃnâ sītsâ tama hâ, tsî ta ge ǁnā xamn āb mâpa hâ ǃkhais tsîna a ǀū” ti ge ǃeream.
36 ǀHomǃgāb ge kēbo-aob Habakuka ǀûgu ai ǃkhō tsî ǂoab di ǃhaesib ǀkha Babilons tawa sī-ū tsî ǁîba xamn āb tawa ge sī mâi. 37 Ob ge Habakuka “Danieltse! Danieltse! Elob go sîba tsi ǂû-e ū re” ti ge ǂgaiǂui. 38 Danieli ge Habakuka ǁnâu, ob ge “Gangan tsi Elotse, sats ge tita xa go ǂâi. Sats, satsa ǀnamna ǁnāxūǃgâ tama hâ xui-ao” ti ge ǀgore. 39 Danieli ge khâi tsî ge ǂû. Tsîb ge Elob di ǀhomǃgāba ǁnātimîsi Habakuka ǁgâus âb ǃoa ge ū.
40 Danieli ge xamna aobahes khaoǃgâ di ge hû tsēde ǃkharu, ob ge gao-aoba xamn āb tawa Danieli ǃaroma nî sī ǃoase ge sī. Xawe sī tsîb ge āb ǃnâ kō, ob ge Daniela ûitsamase ge mûǂnôa. 41 Ob ge gao-aoba ǃgari dommi ǀkha “ǃKhūtse, Danieli di Elotse, mâtikōsets a kai. Sats ǀguits ge ama Elo” ti ge ǂgaiǂui. 42 Ob ge gao-aoba Daniela āba xu ǂgaeǂui kai tsî ǁnāgu, ǁîba gere ǃgam ǂgaoga ǁnāpa ge aoǂgā. Tsîn ge xamna gao-aob ra kō hîa ǁîga ǁnātimîsi ge hapu.
© Khoekhoegowab Elobmîs © Bible Society in Namibia, 2020.
