1 Nēs ge ǂhôas Judab tsî Jerusalems ǂama Amosi ôab Jesajab ǃoa, Usiab, Jotammi, Axasi tsî Hiskiab tsîgu ǂgaeǂguis ǁaeb ai ge Judab ǂama ǂhaiǂhaihesa.
Elob ge ǁîb ǁaesa ra ǂgōǀau
2 ǀHomgo ǃgâ re, ǃhūbaitse ǃgaoǃgâ re! ǃKhūb ra ǃhoa xuige: “Tita ge ǀgôana ge kaikai, tita ge ǁîna ge kuikhâi, xawen ge ǁîna ti ǃoagu ge khâikhâisen. 3 Gomab ge ǁîb ǀhonkhoeba ra ǂan, dâukib ge ǁîb ǀhonkhoeb ra ǂûna tsoroba bi ǃkhaisa ǂan; xawe Israelǁîn ge tita mûǂan tama hâ, ti ǁaes ge ǁnâuǃā tama hâ.”
4 Tsūba, sa ǁoreb xa ǀoa hâ ǁaese, sadu ǂkhabadīgu xa ǃnao-aihe hâdo! Surib tsūdī rab, ǀgôan eloxoresase ra ûina. ǁÎn ge ǃKhūba ge ǃharaxū, ǁîn ge Israeli di ǃAnuba ge ǂhara tsî ǁîba xu a ǃhaokhoe. 5 Tare-i ǃaroma du ǂnauhe hâse ǀgui nî hâ? Tare-i ǃaroma du khâikhâisen hâse ǀgui nî hâ? Sadu danas ge ǀnai ǂnauǀhapidi xa ǀoa hâ, sadu ǂgaob ge ǀaesen hâ. 6 Sadu ǂaiǃnāga xu sadu danaǂamdi kōse i ge ǂuru ǃkhai-e a ǀkhai. ǂNaudaogu, ǃgaodaogu tsî ǂnauǀhapidi tsîn ǀguin ge hâ. ǁÎdi ge ǃanuhe tamas ka io ǃgae-aihe tama i, tamas ka io ǀkhera oli-i ǀkha ǂkhauhe tama ge hâ i.
7 Sadu ǃhūb ge ge hîkākāhe tsî sadu ǃāde ge ǂhubiǁnâhe. Sadu mûǁaen ge ǃhaokhoena sadu ǃhūb ǃhanaǂûna ge hîkākā. ǁÎn ge mâ xū-i hoa-e khôaǁnâ tsî gere khôaǂkhū. 8 Sions di ǀgôas ge ǃū-aisase ge ǁnāxūhe, draibeǃhanab tamas ka io tôaǃhanab ǃnâ mâ ǁhao-i khami; khākhoen xa xāǂgāhe hâ ǃā-i khami. 9 ǃKhūb Hoaǀgaixab ga ǀoro khoena ûiǃgau kai tama hâ, o da ge Sodoms tsî Gomoras khami ga ī hâ.
10 Sago Sodoms ǂgaeǂgui-aogu khami īgo, ǃKhūb di mîsa ǃgâ! Sadu Gomoras khoen khami īdo, sida Elob di ǁkhāǁkhāde ǁnâu! 11 “Sadu ǁguibade tarebe harebesa ūhâ? Tita ge baigu khauǁguibadi tsî kausa gomagu kaub tsîn xa go ǂâu; tita ge ǁgōgu, gūn tsî pirigu ǀaob ǃnâ ǃgâiǃgâibasen-e ūhâ tama hâ,”
tib ge ǃKhūba ra mî.12 “Ti aiǃâ du ga hā, o du ra ǂâi tita ǁîna ti omǂnamib ǃnân nî mâmasa ra ǂgao ti? 13 Tā ǃaruǀî harebeoǃnâ ǁguibade ǀkhī-ūba te; sadu ǃgâihamxūn ge ti aiǃâ a ui-uisa. Sadu ǀAsa ǁKhâb Kaitsēdi, Sabattsēdi tsî ǃoaba-aiǃkhaigu ge harebeoǃnâ, tsî tita ge ǁoreb ǀkha ǂnaoǂnaosa ǁguibade ǃaruǀî a tani ǁoa. 14 Sadu ǀAsa ǁKhâb Kaitsēdi tsî ǀhaode ta ge a ǃhuisa; ǁîna tanisa ta ge go tsau.
15 “ǀGores ǃaroma du ga sadu ǃomga ǀhōǂui, o ta ge ti mûra sado xu nî gaugau; ǂgui ǀgorede du ga ǀgore, xawe ta ge ǃgâ tide, sadu ǃomgu ǀaob ǀkha ǂnaoǂnaosa xui-ao. 16 ǁĀsen! ǃAnuǃanusen! Ti mûǁaeba xu sadu ǁorena ūbē; ǂkhabadība ǀû! 17 ǃGâidīsa ǁkhāǁkhāsen! ǂHanu-aisiba ôa; ǁgâiǀāsana hui; ǃguniǀgôana mâǂgâba; ǃoataradi ǂhanuga ǃkhamba!”
18 ǃKhūb ge ra mî: “Hā, î da ǃhoaǂui. Sadu ǁoren ga ǀaob khami ǀapa, xawen ge tsamaros khami nî ǃuri; ǁîn ga ǀapase mûsen xawen ge gūǀûn khami nî ǃuri. 19 Māsenxa tsî du ga ǁnâuǀnamxa, o du ge ǃhūb di ǃgâi ǂûna nî ǂû. 20 Xawe du ga ǂkhā tsî khâikhâisen, o du ge gôab xa nî hîkākāhe,”
tib ge ǃKhūba ra mî.ǁOreb xa ǀoa hâ ǃās
21 Mâtis kha ǂguro ge ǂgomǂgomsa i ǃāsa ge ǀai-ao kai! ǁÎs ge ǂhanu-aisib ǃās ase ge ī i; ǂhanu-aisib ge ǁîs ǃnâ ge ǁan hâ i, xawe nēsi gu ge ǃgamaogu ǀguiga ǁnāpa hâ. 22 Jerusalemse, sa ǀhaiǀurib ge ge harebeoǃnâ; sa ǂauxûib ge ǁgamǂnûirihe tsî ge ǁkhoaoǃnâ kaihe. 23 Sadu ǂgaeǂgui-aogu ge khâikhâisen tsî ǃnari-aogu ǀkha ge ǀhōsagu. Hoagu ge ǀhôagao ǁaxasiga ge ǀnam tsî matare-oahesa ra ǁgūba. ǁÎgu ge ǃguniǀgôana khâimâba tama, tsî ǃoataradi ǂhanuga ǂnoaba tama hâ.
24 ǁNā-amagab ge ǃKhūb Hoaǀgaixab, Israeli di ǀGaisa ǂgaeǂgui-aoba ra mî: “Ti khākhoen ai ta ge ti ǁaiba ǁhōǂui tsî ǁîna nî ǀkhao. 25 Ti ǃomma ta ge ǁîn ǃoagu nî ūkhâi; tita ge ǀuri-i ra ǃanuǃanuhe khami ǃanuǃanu du tsî sadu ǀurisasib hoaba nî ūbē. 26 Sa ǀgoraǃgâ-aoga ta ge ǂguros khami nî dī tsî sadu ǀapemā-aoga tsoatsoas ǃnâ gu ge ī i khami. ǁNās khaoǃgâs ge ‘ǂHanu-aisib ǃĀs, ǂGomǂgomsa ǃĀs’ ti nî ǂgaihe.”
27 Sions ge ǂhanu-aisib xa nî orehe tsî ǁîs ǃnâ ǁan hân hoan hîa ra ǃhobasenn tsîna. 28 Xawe khâikhâisen tsî ra ǁorena hîkākāhe tsîn ge ǃKhūba ra ǃharaxūna nî ǃgamhe.
29 ǃAnudi ase du gere ǀgoreǀî tsî ǃgapaǀî aikehaidi xa du ge nî taotaohe; ǃhanagu hîa du ge ǁhûǂuibasengu xa du ge nî ǃhausen. 30 ǂNaregu âsa ra ǂnâ aikehais khami du ge nî ī, ǂnâhe tama ǃhana-i khami. 31 ǀAes naniros ra ǀgâba ǃkhāǂhubi khamin ge ǀgaisa khoena ǁîn ǂûn di ǂkhabadīgu xa nî hîkākāhe, tsî ǁnā ǀaesa nî ǀari khoe-i xare-i ge nî ǀkhai.
© Khoekhoegowab Elobmîs © Bible Society in Namibia, 2020.
