Moab gao-aob ge Bileamma ra sî
1 Israelǁîn ge ǁîn ǃgûs ǀkha aiǃgû tsî Moabǂgāgu aiǂoasǀkhāb Jordanǃāb dib, Jerixos ǃoagu ge ǁgoe ib tawa sī hâǃkhaiba ge ǂnaumâi.
2 Moab di gao-aob, Sipori ôab Balaki ge tare-en ge Israelǁîna Amorǁîn ǀkha dī tsî mâtikō ǃgôab di Israelǁîn a ǃkhaisa ǁnâu, 3 on ge ǁîb tsî ǁîb khoen tsîn hoana kaise ge ǃao. 4 ǁNā-amagan ge Moabǁîna Midianǁîn di ǂgaeǂgui-aogu ǃoa ge mî: “Nē ǂnubis di khoen ge sada ǂnamipe hâ xūn hoana nî tsākhâi, ǁgōb ra ǃgarob di ǀgâna ǃûhāpu khami.” ǁNā-amagab ge gao-aob Balaka 5 ǁîb di sîsabegab ge Beori ôab, Bileammi, ǁnā ǁaeb ai ge Petors, Eufratǃāb ǀgūse ǁgoes, Amausǃhūb ǃnâ ge hâ ib ǁga sî tsî ǁîba ge mîmā kai: “Hoaraga ǁaes go Egipteba xu hāsats nî ǂansa ta ge ra ǂgao; ǁîn ge mâ ǀkhā-i hoa-i ai ǂapaǂoa tsî sida ǃhūban nî ǁkhâuǁnâ ǃkhais ǀkha ra ǃaoǃao da. 6 ǁÎn ge sida xa a ǂgui, ǁnā-amaga toxopa hā, î ǁîna ǀâxareba te. ǁNā ǀgaus ai da ge ǀnîsi, ǁîna dan tsî ǃhūba xu a sauruǂui ǁkhā. Tita ge a ǂan, ǀkhaebats ga gowaǂui, on ra khoena ǀkhaehe ǃkhaisa, tsî ǀâxarebats ga gowaǂui on ra khoena ǀâxarehe ǃkhaisa.”
7 ǁNāti gu ge Moabǁî tsî Midianǁî ǂgaeǂgui-aoga ǀâxareb di gowaǂuis ǃaroma mataresa ū tsî Bileammi ǁga ǃgû tsî Balaki ǂhôasa ǁîba sī ge mîba. 8 Bileammi ge ǁîgu ǃoa ge mî: “Nē tsuxuba nēpa ǁom, ǁari ta ǃKhūb ra mîba te xū-i hoa-e nî mîba go xuige.” O gu ge Moabǁî ǂgaeǂgui-aoga Bileammi tawa ge hâ.
9 Ob ge Eloba Bileamma ǂhai tsî ǁîba ge dî: “Tariga nē khoegu sa tawa hâga?”
10 Ob ge ǁîba Eloba ge ǃeream: “Moab di gao-aob Balaki, Sipori ôab ge ǁîga go sî, î gu tita hā mîba, 11 Egipteba xu ge hā khoen hoaraga ǃhūb ǃnâ ra ǂapaǂoa ǃkhaisa. ǁÎb ge tita ǁîna nî ǀâxare ǃkhaisa ra ǂgao, îb ǁîna ǃkhamdan tsî ǃhūba xu sauruǂui.”
12 Elob ge Bileammi ǃoa ge mî: “Tā ǁîgu ǀkha ǃgû, tsî tā Israelǁîna ǀâxare, ǁîn ǀkhaehe hâ xuige.”
13 Sao ra ǁgoagab ge Bileamma Balaki sîsabegu tawa sī tsî ǁîga ge mîba: “Sago ǃhūb ǁga ǁaru; ǃKhūb go tita sago ǀkha ǃgûsa ǂkhā xuige.” 14 ǁNāti gu ge ǁaru tsî Balaka sī ge mîba Bileammi ge ǁîga saosa ǂkhā ǃkhaisa.
15 Ob ge Balaka ǂgurob ge sî hâ i khoegu xa ǂgui tsî ǂhâǂhâsa ǃâsa gere ǀhuruga ǁkhawa ge sî. 16 ǁÎgu ge gao-aob Balaki di ǂhôasa Bileammi tawa sī-ū tsî nēti ge mî: “Tā i xū-i xare-e ǂhani tsi, tita tawa hāsa! 17 Tita ge ǂguiǃnâguse mādawa-am tsi tsî ǂgaots ra xū-i hoa-e nî dība tsi. Toxopa hā, îts nē khoena ǀâxareba te.”
18 Xaweb ge Bileamma ge ǃeream: “Balaki ga hoaraga ǀhaiǀurib tsî ǃhuniǀurib ǁîb di gao-ommi diba mā te, xawe ta ge ti ǃKhūb tsî ti Elob di mîmāsa ǁnâuǀnamoǃnâ tide, mâtikōse i ga xū-e ǂkhari tamas ka io kai xawes tsîna. 19 Xawe nau khoegu ge dī khami nē tsuxuba nēpa ǁom, î ta ǃKhūba xu ǁnâu, ǀnî xū-eb nî mîba te ǃkhaisa.”
20 ǁNā tsuxub ǃnâb ge ǃKhūba Bileamma ǂhai tsî ge mî: “Nē khoegu ga hā tsî sats ǁîgu ǀkha nî ǃgû ǃkhaisa ǂgao, ots ge ǁîgu ǀkha nî ǃgû, xawets ge tita nî mîba tsi xūn ǀguina nî dī.” 21 ǁNā-amagab ge Bileamma sao ra ǁgoaga ǁîb dâukisa ǃgaeǃgâ tsî Moabǁî ǂgaeǂgui-aogu ǀkha ge ǃgû.
Bileammi tsî ǁîb dâukis
22 Elob ge Bileammi ge ǃgû ǃkhais xa ge ǁaixa, tsî ǁîb ǃoaba-aokha xa ǁnūhe hâseb ǁîb dâukis ai ǃgapigaru hîab ge ǃKhūb di ǀhomǃgāba ǁîb daoba ge mâǁkhae. 23 Dâukis ge ǀhomǃgāb gôaba ūhâ ǃkhaisas ge mû, o daoba xu ǃkhoeǁgôa tsî ǃgarob ǃnâ ge ǃkhoeǂgâ. Bileammi ge dâukisa ǂnau tsî ǁkhawa daob ǃnâ ge ǂgâxa-ū. 24 Ob ge ǀhomǃgāba daob ra hoaǀkhākha ai draibehaidi tsî ǀuiǂnubiǂgoakha xa sī ǂō ǃkhais ai ge mâ. 25 Dâukis ge ǁkhawa ǀhomǃgāba mû, os ge ǂnubiǂgoab ai sī ǃnomsen tsî Bileammi ǂaisa ǂnubiǂgoab ai ge tsûtsû. Bileammi ge ǁkhawa dâukisa ge ǂnau. 26 ǀHomǃgāb ge ǁkhawa aisǀkhāb ǁga ǃkharu tsî khoe-i ǃkharu ǁoase ǂō ǃkhais daob dis ai sī ge mâ. 27 Dâukis ge nē ǃnāsas ge ǀhomǃgāba mû, o ge ǁnāǁgoe. Bileammi ge kaise ǁaixa tsî dâukisa ǁîb ǀkharub ǀkha gere ǂnau. 28 Ob ge ǃKhūba dâukisa ǃhoas ǁkhāsiba ge mā tsîs ge ǁîsa Bileammi ǃoa ge mî: “Tare-e ta tsūse sa ǃoagu go dī? Tare-ets nē ǀgaus ai ǃnona ǃnāde go ǂnau teba?”
29 Ob ge Bileamma ge ǃeream: “Titas ra gârekhoemû xui-ao! Gôaba ta ga ūhâ hâ, o ta ge ga ǃgam si hâ.”
30 Dâukis ge ǁîba ge ǃeream: “Ti tama ta, sa ûihâb hoabats gere ǃgapi-ai ta? Nēts ra tita ûi-ū khami ûi-ū tsi ta ge hâ i?”
“Hî-î” tib ge Bileamma ge ǃeream.
31 Ob ge ǃKhūba Bileamma gôab ǀkhab ǀhomǃgāba mâse ge mû kai; tsîb ge Bileamma ǁnāsab ge mûo, ais âb ǀkha ǃhūb ai ge ǁnāǁgoe. 32 ǀHomǃgāb ge ǁîba ge dî: “Tare-i ǃaromats sa dâukisa nē ǀgaus ai ǃnona ǃnāde go ǂnau? Satsa ta nî ǃgûts tidese ǁkhaega ta ge go hā, ǃgû tamats ga hâ daobats ra ǃgû xui-ao. 33 Xawes ge sa dâukisa mû te tsî ǃnona ǃnāde daoba xu go ǁgôa. ǁÎs ga daoba xu ǁgôa tama hâ, o ta ge satsa ǃgam tsî dâukis di ûiba ga sâu hâ.”
34 Bileammi ge ǀhomǃgāba ge ǃeream: “Tita ge go ǁore. Tita ge daob ǃnâ mâ tsîts goro ǁkhae te ǃkhaisa go ǀū i; xawes ga ti ǃgûsa sa mûǁae ǂhanu tama i, o ta ge dabasen tsî nî ǁaru.”
35 Xaweb ge ǃKhūb ǀhomǃgāba ge mî: “Nē khoegu ǀkha ǃgû, xawe tita ra mîba tsin ǀguina mî.” Ob ge Bileamma khoegu ǀkha ǃaruǀî ge ǃgû.
Balaki ge Bileamma ra ǁkhoreǁhare
36 Bileammi ǃgoaxa ǃkhaisab ge Balaka ǁnâu, ob ge ǁîbab sī nî ǃkhōǃoase Ars, Arnonǃāb Moab ǀkharib di ǃhūǀgoras tawa ǁgoe ǃās ǁga ge ǃgû. 37 Balaki ge Bileammi ǃoa ge mî: “Tare-i ǃaromats ǃnoesase ta ge ǂgai tsi xawe hā tama ge hâ i? Mādawa-am tsi ta tide tits ge ǂâi?”
38 Ob ge Bileamma ǁîba ge ǃeream: “Sa tawa ta ge go hā, xawe ta ge tita xu xū-e a ǃhoa ǁoa. Tita ge ǃKhūb ga mîba te xūn ǀguina nî mî.” 39 ǁNāpa xub ge Bileamma Balaki ǀkha ǃās Husots ǁga ge ǃgû. 40 ǁNāpab ge Balaka goman tsî gūn tsîna ǂā tsî ǀnî ǁgan-e Bileammi tsî ǂgaeǂgui-aogu ǁîb ǀkha ge hâ i gu tsîga ge mā.
Bileammi ǂguro kēbos
41 Sao ra ǁgoagab ge Balaka Bileamma Bamot-Baals tawa ge ūǃapa. ǁNāpa xub ge Bileamma ǀnî ǃâb Israelǁîn diba ge mû ǁkhā i.
© Khoekhoegowab Elobmîs © Bible Society in Namibia, 2020.
