Judab gao-aob Usiab
(2 Gao-aogu 14:21-222 15:1-7)1 Hoaraga ǁaes Judab dis ge Amasiab di disiǃnaniǀa kurixa ǀgôab, Usiaba ǁîb soas ǃnâ gao-aose ge ǁhûi. 2 Usiab ge ǁîb îb di ǁōb khaoǃgâ Elatsa ǁkhawa ū-oa tsî ge ǂnubikhâi.
3 Usiab ge disiǃnaniǀa kurixab a hîa ge gao-ao kai, tsîb ge korodisiǀgamǀa kuriga Jerusalems ǃnâ ge ǂgaeǂgui. ǁÎb îs ge Jekolias Jerusalems di ge isa. 4 ǁÎb ge ǁîb îb Amasiab ǁkhāb khami ǃKhūba a ǃgâibana gere dī. 5 ǁÎb di ǀapemā-aob Saxariab ûi hâs kōseb ge ǁîba, ǃKhūba ǂgomǂgomsase gere ǃoaba tsîb ge Elob xa ge ǀkhaehe.
6 Usiab ge Filisteǁîn ǃoagub nî torodīse ǃgûǂoa tsî Gats, Jamnias tsî Asdods tsîdi ǂnubiǂgoaga khôaǁnâ, tsî omǂnamisa ǃāde Asdods ǂnamipeb tsî nau ǃâb Filisteǃhūb dib tsîn ǃnâ ge ǂnubi. 7 Elob di huib ǀkhab ge Filisteǁîn, Arabiaǁîn, Gurbaali ǃnâ ge ǁan hâ in tsî Meunǁîn tsîna ge dan. 8 Amonǁîn ge ǁgui-aimarisa Usiaba gere matare tsîb ge ǁnātikōse ge ǀgai, gommi âb ge Egipteb kōse sīs kōse.
9 Usiab ge Jerusalemsa ǃaruǀî ge ǀgaiǀgai, ǁaposa ǂgō-omga ǁHôas-Dao-ams tsî ǃGoaǃnāb-Dao-ams tsî ǂnubiǂgoab di ǁhôas tsîgu tawa kurus ǀkha. 10 ǁÎb ge ǁkhāti ǂgō-omga ǃaub ǃnâ kuru tsî ǂgui tsaugu tsîna ge khao, ǂgui goman tsî ǀgoan tsînab ge ǃgoaǃnāgu ǃnâs tsî ǂgāgu ais tsîna ūhâ i xui-ao. ǃHanaǂgābab ge ǀnam i xui-aob ge ǃhanasîsenaogu tsî draibeǃhanasîsenaogu tsîga ǃnâuxa ǀkharib tsî ǂûtanixa ǃhūb ǃnâ ge ūhâ i.
11 Usiab ge kai toroǂnubis, torob ǃoa ǂhomisasa ge ūhâ i. ǁÎs di ǃgôab tsî ǀgoraǂgādi ge gao-aob ǂamkhoegu di ǀguib, Hananjab mûǂams ǃnaka, ǁîb di xoa-aokha Jeieli tsî Maasejab tsîkha xa gere dīhe. 12 Toroǂnubis ge ǀgamǀoadisi tsî ǃnanikaidisi ǂamkhoegu xa gere ǂgaeǂguihe. 13 ǁÎgu ǂgaeǂguis ǃnaka gu ge ǃnonakaidisihûǀoadisi tsî korokaidisi toroǃkhamaogu, gao-aoba khākhoen ǃoagu ǃkhamba ǁkhāga ge hâ i. 14 Usiab ge hoaraga toroǂnubisa ǁkhaukhōdi, ǁhâigôagu, toroǀgapadi, torosaran, khādi tsî ǂāgu tsî slengers ǀuidi tsîna gere mā. 15 Jerusalems ǃnâ gu ge ǂansa ūhâ khoegu ǁîb diga, ǂnoa-ūxūna ge kuru hâ i, ǂāga ǁkhâus tsî kai ǀuide ǂgō-omgu tsî ǂnubiǂgoagu ǁhôade xu ǂnoas ǃaroma. ǁÎb di gommi ge hoa ǃkhaidi ai ge ǁnâuhe tsîb ge kaise ge ǀgai, Eloba xub ge huiba gere hō xui-ao.
Usiab ge ǀgapiǂâixasib âb ǂama ra ǁkharahe
16 Xaweb ge gao-aob Usiaba ǀgaib geo, kaise ge ǀgapiǂâixa, tsîs ge ǁnā ǃkhaisa ǁîb ǁnāsa ge ǃaroma. ǁÎb ge ǃKhūb ǁîb di Eloba ge ǃharaxū, Tempeli ǃnâ ǂgâ tsîb ge ǀanǀanaltars ai sī ǀanǀanǁguibasa dī ǃkhais ǀkha. 17 Ob ge prister Asariaba, ǁkhaisadisi ǁkhoaǂgaoxa pristergu ǃKhūb digu ǀkha gao-aoba ge sao 18 ǁîba gu nî mâǃoase tsî ge mî: “Usiatse, sats ge ǃKhūba ǀanǀanǁguibasa hā-ūbasa mā-amsa tama hâ. Aronni surib di pristergu ǀguigu ge ǁnāsa gu nî dīse a khaisa. Nē ǃanu ǃkhaiba xu ǂoa. Sats ge ǃKhūb Eloba go mâǃoa tsîts ge ǁîb di ǀkhaeba ǃaruǀî ūhâ tama hâ.”
19 Usiab ge Tempeli ǃnâ ǀanǀanxūn xapasa ǃomǁae ūhâse ǀanǀanaltars xōǀkhā ge mâ i. ǁÎb ge pristergu ǀkha ge ǁaixa tsîb ge ǁnātimîsi khōǀaesenna ǃūs âb ai ge ǂoaxa. 20 Asariab tsî nau pristergu tsîgu ge ǁîba kō tsî gu ge nē ǀaeba ǃūs âb ai mûo, ǁîba ǃhaese Tempela xu ge ǃhaeǂui. ǁÎb ǂûb ge ǃnoesase ge ǂoa, ǃKhūb ge ǁkhara bi xui-ao.
21 ǁÎb di ǁōb kōseb ge Usiaba ǃomamaxase ge hâ. ǁÎb ge ǃomamaxab a xui-ao ǀguri hâ oms ǃnâ gere hâ tsî Tempeli ǃnâ ǂgâsa ge mā-amhe tama hâ i. ǁÎb ôab Jotammi ge ǃhūb di ǂgaeǂguisa ge ū.
22 Nau xūn hoan, gao-aob Usiab ge ǁîb ǂgaeǂguis ǁaeb ǃnâ dīn ge ǂgurona xu ǀunigan kōse Amosi ôab, kēbo-aob Jesajab xa ge xoamâihe. 23 Usiab ge ǁō tsî gao-aogu ǀhobadiǂgās tawa ge ǁkhōhe, xaweb ge ǃomamaxab ge i xui-ao, gao-aogu ǀhobadi ǃnâ ǁkhōhe tama ge i. ǁÎb ôab Jotammi ge ǁîba gao-aose ge saoǃgon.
© Khoekhoegowab Elobmîs © Bible Society in Namibia, 2020.
