1 Ti ôatse, tā ǀgâsa khoena ûiban nî kuru ǃkhaisa ǁkhae-am tamas ka io ǁîna ǂhâsib ân ǃnâ ǃâu kai. 2 Tā ǃâsa khoe-e tsûaǂgao kai tamas ka io ǂhâ hâ khoe-e ǁaixa kai 3 Tsî ǀnain ga ǂkhîoǃnâ, o tā ǁîn ǂhâ hâ ǁaeb ai xūna ǃhaese mā tamas is ǀkha, mâsiba aiǃâb ǃoa tsūtsū. 4-5 Tā ǀhūsasib ǃnâ hâ ǀkhope-aoba huisa ǂkhā. Tā ǀgâsa khoeba mûǃhara tamas ka io satsab nî ǀâxare ǃkhais di ǃaroma-e mā. 6 ǁNātikōse tsûaǂgao tsîb ga ǀâxare tsi, ob ge ǁîb di Kuru-aoba ǀgores âba nî ǁnâu-am.
7 Khoen nî ǀhûhâsib ǃnâ sats ǀkha ǂkhîǂâixase tanisen. ǂGaeǂgui-aoga ǃgôasiba mā. 8 ǀGâsan ga xū-e mî, o ǁîna ǃgâ, î ǁîna ǃgâi ǀgaub ai ǃeream. 9 ǂHanuoǃnâse ra sîsenūhe khoena ǂhanuoǃnân di ǃomǁaeba xu huiǂui, î sa ǀgoraǃgâde ǂhanu-aise dī. 10 ǃGuniǀgôana ǁgûse ība, î ǃoatarade ǁîdi aogu ǃaruǀî mādi ǁoa huiba mā. Ots ge Hoan xa ǀGapib di ôab xase nî ī tsîb ge sa îs ǃgâ-ai nî ǀnam tsi.
Gā-aisib di mādawa-ams
11 Gā-aisib ge ǁnān ǁîba ra ôana ra kōǃgâ tsî ǁîna ǀgapi ǃharodi kōse ra ǀgapiǀgapi. 12 ǁÎba ǀnams ge ûib ǂûba ǀnams ase ī tsî ǃnauǁgoaga ǁîba nî mûse khâis ge a ǃūmû ǃgâiaǂgao. 13 Gā-aisiba ga hō khoe-i hoa-i ge kai ǃgôasiba nî māhe. ǃGû iga ǃkhai-i hoa-i aib ge ǃKhūba ǁî-e nî ǀkhae. 14 Gā-aisiba ra ǃoaban ge ǁNāb, ǃAnuba ra ǃoaba tsîb ge ǃKhūba Gā-aisiba a ǀnam-i hoa-e a ǀnam. 15 Gā-aisiba ra ǁnâuǀnamn ge ǂhanuse nî ǀgoraǃgâ; tsî ǁnān ǂâisa ǁîb ai ra ǂnûin ge ama ǁaposasiba ūhâ. 16 Gā-aisib ǃnâ ǂgom, ots ge ǁîba ūhâbasen tsî sa ôananôagub ǁga nî māǃkharu. 17 ǂGurosab ge Gā-aisiba ǃgom daogu ai nî ǂgaeǂgui tsi. ǁÎb ge ǁnātikōse nî ǃao kai tsi tsîts ge aiǃgû ǁoats a ti nî ǂâi. ǁÎb ra ǂgaoǀkhā tanisenǀgaub ge ǁkhāǁkhāsenao-e nî tsûtsû tsî ǁîb ge ǂgaoǀkhādi ǀkha ǁîbats nî ǀoasase ǂgomǃgâs kōse nî ǃâitsâ tsi. 18 Xaweb ge hā tsî ǀhabe tamase nî hui tsi. ǁÎb ge ǁîb di ǂganǃgâsiga ǂhaiǂhaiba tsi tsî nî ǃgâiaǂgao kai tsi. 19 Xawets ga Gā-aisiba xu ǃgûbē, ob ge nî ǁnāxū tsi tsîts ge nî hîkākāhe.
ǁÎ-aitsama ǂgomǃgâsens
20 Īǁkhāsib di aiǂhanuba ū, xawe ǂkhabab ǃoagu ǃûisen. Tā aitsama taotaosen. 21 ǃGamǃgamsens ge ǃgôasib tsî ǃaoǃgâb tsîkha ǃoaǂui hâ, xawets ga sats ǂûts xa ǂkhabusa ǂâiǀgauba ūhâ, ots ge nî ǁore. 22 Tā ǁnātikōse ǃgamǃgamsen, nau khoen ǁîn ra ǂâi khami nî sîsenū tsise. 23 ǂHâbasa ǁaegu ai ǃhoasa tā îganǀgē. Tā sa Gā-aisiba sâu. 24 Sa gā-aisib tsî ǁgauǃnâs ge sats ra ǃhoa xūn ai ǀgui a ǂanhe ǁkhā. 25 Tā amaba mâǃoa, î hoa xūnats ǂan tama ǃkhaisa, ǂâis ǃnâ ūhâ. 26 Tā sa ǁoren âtsa ǁguiǁnâsa tao; ǁnāsa dīs ge dâu ra ǃāba ǁkhaetsâs ǁkhās khami i. 27 Tā gâre khoe-e ǃhoadan kaisen tamas ka io tā ǂgaeǂguis ǃnâ mā khoena, nau khoen ǃgâ-ai ǀkhāǁhûiba. 28 Amaba khâiba, ǁnās ga sa ǁōba ǃaroma xawe, ǃKhūb Elob nî ǃkhamba tsi xuige.
29 Tā ǃhoasa ǃnoeba tamas ka io ǀopesa tsî sa sîsenna ǁnākhao. 30 Tā xam-i khami oms tawa tanisen tamas ka io sa ǃgāna ǀhapiǂnûi-ai. 31 Tā sa ǃomma ǃkhōǃoats nîga ǁkhowa-am tsî xawe mā-oas ǁaeb ga hāo ami.
© Khoekhoegowab Elobmîs © Bible Society in Namibia, 2020.
