Saxaria 12 - Khoekhoegowab New Translation 2020 (KKG20)

Jerusalems di ores

1 Nēs ge mîs ǃKhūb dis, Israeli ǂama hâsa. ǃKhūb hîa ǀhomma khoraǂui, ǃhūbaiba ǃgaoǃgao tsî gagas khoeb disa ǁîb ǃnâ ge kurub ge nēti ra mî: 2 “Mû tita ge Jerusalemsa ǁhoes, somke-ai kai ras ase nî ība, hoaraga ǁaes tsî ǂnamipe hâ khoen hoan ǃaroma. Tsî Jerusalems ga ǃnamiǂgāhe, o di ge ǃgau ra ǃādi Judab didi ona nî ǃnamiǂgāhe. 3 Tsî ǁnā tsēs ais ge Jerusalemsa ta nî ǃgom ǀuise ǁaede ǂnûibasa, tsî ǁîsa ga ūkhâi-i hoa-i ge kaise nî tsûtsûsen, tsî di ge hoaraga ǁaedi ǃhūbaib dide ǁîs ǃoagu nî ǀhaoǀhaosen. 4 ǁNā tsēs ai ta ge mâ hāb hoaba ǃao kai tsî mâ ǃgapi-aob hoaba nî ǃkhau kai. Judab khoen ai ti mûsa ūhâ tsî ta ge mâ hāb ǁaedi dib hoaba nî ǂgī kai. 5 O gu ge Judab gao-aoga ǁîgu ǃnâ ‘Jerusalems ǁanǂgāsaben di ǀgaib ge ǁîn Elob, Hoaǀgaixa ǃKhūb ǃomkha ǃnâ hâ’ ti nî mî.

6 “ǁNā ǁaeb ai ta ge Judab gao-aoga ǀaexa ǀaen, ǀaekhoros din ase nî dī, tsî ǃamǀaese ǃhoroǃgaeǀkhādadi ǁaegu tsîn ge ǁîna ǁareǀkhāb tsî amǀkhāb tsî ǂnamipe hâ hoaraga ǁaedi diba nî hapu, tsîs ge Jerusalemsa ǁkhawa ǁîs ǃkhais Jerusalems ǃnâ nî ǃgau.

7 “ǃKhūb ge ǂgurose Judab tentomde nî sâu, Davidi ommi tsî Jerusalems ǁanǂgāsaben ǂkhaisib Judab dib ǂamai kai tidese. 8 ǁNā tsēs aib ge ǃKhūba Jerusalems ǁanǂgāsabena nî sâu, tsî ǁnā-i ǁîn ǁaegu ga ǃnôa-i ge Davidi khami nî ī tsîb ge Davidi suriba ǁîna ǃKhūb di ǀhomǃgā-i, khami, Elob ǂûb khami nî ǂgaeǂgui. 9 ǁNā ǁaeb ǃnâ ta ge hoaraga ǁaedi, Jerusalems ǃoagu ra khâide nî hîkākā.

10 “Tsî ta ge Davidi ommi ǂama tsî Jerusalems ǁanǂgāsaben ǂama ǀkhommi tsî ǀgores di gagasa nî ǁhōǂui tsîn ge ǁîna tita hîan ge ǃkhāǃganu ta nî kō, tsî tita ǂama ǀguise ǃnae hâ ǀgôab ǃaromas khami nî ǃoa. Tsîn ge ǂguroǃnaesab ǃaromas khami nî ā. 11 Tsîb ge Jerusalems ǃoaba Hadad-Rimons dib khami nî kai, Megidos di ǂgāb ǃnâs khami. 12 Tsîb ge ǃhūba nî ǃoa, mâ ǃhaos hoasa ǀguri hâse; Davidi ǃhaos dina ǀguri hâse, tsî taradi âsa ǀguri hâse; Natanni ǃhaos dina ǀguri hâse tsî taradi âsa ǀguri hâse. 13 Levib ǃhaosa ǀguri hâse tsî ǁîs tarade ǀguri hâse; Simeib ǃhaosa ǀguri hâse tsî ǁîs tarade ǀguri hâse; 14 ǁkhā ǀgaub ai hoaraga ǃhaodi ǃgau gede ǀguri hâse, tsî ǁîdi tarade ǀguri hâse.