Danieli di ǀgores
1 Ahasverosi ôab Dariusi, Medeǁîb ge Babiloniab ǂama ge gao-ao i. 2 ǂGuro ǂgaeǂguis kurib ǁîb dib ǃnâ ta ge ǂkhanide khomaiǃnâ tsî hûdisi kurigas Jerusalemsa hîkākāsase nî ǁgoe ǃkhaisab ge ǃKhūba kēbo-aob Jeremiaba mîba ǃkhaisa ge ǂanǂui. 3 O ta ge ǂûtama hâ tsî ǃoab sarana ana tsî tsaob ǃnâ ǂnôase, ǃKhūb Eloba ǀgores ǃnâ ge ǀkhoma. 4 Tita ge ǃKhūb ti Elob ǃoa ǀgore tsî ti khoen di ǁorena ge ǁguiǁnâ: “ǃKhū, kai tsî ǃaoǃgâhesa anu Elotse. Sats ge ǁnān satsa ǀnam tsî sa mîmāde ra ǁnâuǀnamn ǀkha sa ǃgaeǀhaosa ra ǃkhōǀgaipe.
5 “Sida ge ge ǁore, sida ge ge ǃûǂam, sida ge ge tsūdī. Sida ge sa mîmādi tsî sa ǂhanuga ge mâǃoa. 6 Sida ge sa ǃgāgu, kēbo-aogu, sa ǀons ǃnâ sida gao-aogu, sida ǂgaeǂgui-aogu, sida aboxagu tsî hoaraga ǁaesa gere gowaǀîga ǃgâ ǂgao tama ge i. 7 ǃKhūtse, sats ge a ǂhanu-ai, xawe sida ge ǁî-aitsama taosiba sida ai ge hā-ū tsî Judab khoen ǂama, Jerusalems din ǂama tsî hoaraga Israelǁîn, ǀgū tsî ǃnū ǃhūgu ǃnâ ge sats xa ǁîn di ǃûǂams ǃaroma ǀgaruǀgaruhen ǂama. 8 ǃKhūtse nē taosib ge sida, sida gao-aogu, sida ǂgaeǂgui-aogu tsî sida aboxagu ǂama ge hā, sats ǃoagu da ge ǁore amaga. 9 ǃKhū sida Elotse, sats ge ǀkhomxaǃnâ tsî a ǀûbaǀnam, sats ǃoagu da ge mâǃoaxa i xawe. 10 Sida ge sats ǃKhūts sida Elotsa ǃgâ ǂgao tama ge i, tsî sa ǃgāgu kēbo-aogu ǃnâ-uts ge mā da ǂhanuga ǃoa ûi tama ge i. 11 Hoaraga Israeli ge sa ǂhanuba ǃûǂam tsî ge ǁnāǁgôa tsî satsa ǃgâ ǂgao tama ge i. Sats ǃoagu da ge ge ǁore, ǁnā-amagats ge nūs ǀkha ge ǁapoǁapohe ǀâxareb, sa ǃgāb Moseb di ǂhanub ǃnâ xoamâihe hâba, sida ǂama ge hā kai. 12 Sats ge sida tsî sida ǂgaeǂgui-aogu ǀkhats nî dī tits ge mîna ge dīǀoaǀoa, kai tsūǀkhābats ge sida ǂama hā-ūs ǀkha. Hoaraga ǃhūbaib ai i ge Jerusalems ǀkha ge ī khami i xū-e ī tama hâ. 13 Moseb ǂhanub ǃnâ xoamâisa tsūǀkhāgu hoagu ge sida ge hāǂam. Xawe da ge ǃKhū sida di Elotse satsa ǂkhîǂkhî tama hâ, sida ǁorena xu ūdabasen tsî sa amab ai ǃgaoǃgâs ǀkha. 14 ǁNā-amagats ge ǃKhū sida Elotse tsūǀkhābats sida ǂama nî hā-ūse ge ǂhomisen hâ i tsî ǁnāsa ge dī. Sats ge dīts ran hoan ǃnâ a ǂhanu-ai, sida ge satsa ge ǃgâ tama i da.
15 “ǃKhū sida Elotse, sats ge sa kai ǀgaib ǀkha sa ǁaesa Egipteba xu ǂgaeǂguiǂui tsî kai ǀonsa ge dībasen, nētsēs kōses ǂansa khami. Sida ge ǁore ge da, sida ge tsūse ge dī da. 16 ǃKhūtse, sats ge sida gere huiǂui, nēsi ǁnâi sa kai ǁaiba sa ǃās Jerusalems, sa ǃanu ǃhomma xu ūbē re. Sida ǁoren tsî sida aboxagu di ǃûǂamdi ǃaroman ge sida ǂnamipe hâ khoena Jerusalems tsî sa ǁaes tsîra ra ǃhō. 17 Sida Elotse, sa ǃgāta di ǀgores tsî ǀkhomasa ǁnâu re. Sa ǀons ǃaroma sa Tempeli, hîa hîkākāhe hâba ǀkhomxase kōǀî re. 18 Ti Elotse ǃgâ, î kōǀî da, î sa ǀons ǃoa ǂgaihe hâ ǃās di ǃū-aisasiba mû re. Sida ge sats tawa, ǂhanu-ai da a ǃkhais ǃaroma ǀkhomabasen tama hâ, xawe sa ǀkhomxaǂgaosib a kai ǃkhais ǃaroma ǁnāsa ra dī. 19 ǃKhūtse ǁnâu, î ǀûba da re. ǃGaoǃgâ, î khâiba da re. Ti Elotse, sa ǀons ǃaroma tā ǀhabe re. Sa ǃās tsî sa ǁaes tsîra ge sa ǀons ǃoa ǀonǂgaihe hâ.”
Gabrieli ge kēbosa ra ǁguiǃā
20 Noxopa ta ǃhoa tsî ǀgore tsî ti ǁoren tsî ti ǁaes Israels di ǁoren tsîna ra ǁguiǁnâ, tsî ǃKhūb ti Eloba ǁîb di ǃanu ǃhommi ǃaroma ra ǀkhoma, 21 ǁnāti ta noxopa ra ǀgore, hîab ge Gabrieli, ǂguro ais ǃnâ ta ge mû hâ iba tita ǃoa ge ǁkhanaǀkhī. ǁNās ge ǃuiǁguibas ǁaeb ai ge isa. 22 ǁÎb ge tita ǃoa ge mî: “Danieltse, tita ge satsa ta kēbosa nî ǁnâuǃā kaise go hā. 23 Sa ǀkhomadi ǀkhats go tsoatsoa ǁaeb ǂûb aits ge go ǃereamhe, tsî ta ge satsa ta ǁîsa nî mîbase go hā, Elob a ǀnam tsi xui-ao. Mîba tsi ta rana ǃgaoǃgâ re, ots ge aisa nî ǁnâuǃā ǁkhā.
24 “Hû ǃnādi di hûdisi kurigu ge sa ǁaes tsî sa ǃanu ǃās tsîra ǁoreb tsî ǃûǂams tsîna xu ǃnoraǃnoras ǃaroma mîǁguihe hâ. ǁOreba ǀûbahe tsîb ge ǀamo ǂhanu-aisiba nî ǂnûiǂgāhe, î ra ais tsî kēbos tsîra dīǀoaǀoahe tsî Tempela ǁkhawa khaihe. 25 ǃGâisets ge nî ǁnâuǃā, Jerusalemsa ǁkhawa ǂnubikhâis di mîmās ge māǂuihesa xu, Elob xa ǁhûiǂuihe hâ ǂgaeǂgui-aob nî hās kōse gu ge hû ǃnādi di hû kuriga nî ǃkharu. Jerusalems ge ǁkhawa ǃgangu tsî ǀgaisa omgu ǀkha ǂnubikhâihe tsî hû ǃnādi di disiǀgamǀa kuriga nî mâ, xaweb ge nēba nî ǃgom ǁae. 26 ǁNā ǁaeb di ǀams aib ge Elob di ǁhûiǂuisa ǂgaeǂgui-aoba ǀhapiose nî ǃgamhe. ǃĀs tsî Tempeli tsîn ge ǁnāǂam nî toroǂnubis, ǀgaisa ǂgaeǂgui-aob dis xa nî hîkākāhe. ǀAms ge dâuǃkhūdi khami nî hā tsî torob tsî Elob ǂhomi hâ tsūǀkhāga nî hā-ū. 27 Nē ǂgaeǂgui-aob ge ǂgui khoen ǀkha ǁaposa ǃgaeǀhao-i hû kurigu di-e nî ūhâ, tsîb ge ǃkhareb nē ǁaeb dib khaoǃgâ ǂāǁguibadi tsî ǂûǁguibadi tsîna nî ǀû kai. Tsîb ge Tempeli di ǀgapi ǁhôas tawa ui-uisa xū-e nî mâi tsî i ge ǁnāb, ǁî-e ge mâib di ǀams, Elob ge ǁî-e ǂhomibas nî hās kōse ǁnāpa nî hâ.”
© Khoekhoegowab Elobmîs © Bible Society in Namibia, 2020.
