Mari-i ra hā-ū ǃgomsigu
1 ǃKhū hâ khoen ge ǁîn di mari-i xan ra ǂâiǂhansen xui-ao a ǁom ǁoa. ǁÎ-i ge ǁîn di ǂurusiba ra hîkākā. 2 ǀGâsa khoen ge mâtin nî ûi ǃkhais xan ra ǂâiǂhansen xui-ao a ǁom ǁoa. ǁÎ-i ge ǃaorosa ǀae-i khami ī.
3 ǂNûǁnāsen tsîn nî ǃkhūsib ǃnâ ûi ǁkhā gan ge ǃkhū hâ khoena, ǂgui mari-e nî kuruga ǀgaisase ra sîsen. 4 ǀGâsa khoen ge ǀgaisasen ra sîsen, xawe ǁgaun nî xū-e ūhâ tama tsî sân kao, noxopa a ǀgâsa.
5 Mari-e ǀnam tsî hoaǁae ǁî-e hōsa ra dītsâ-i hoa-i ge ǁî-i xa nî ǂgaeǂhapuhe tsî ǁnās ǀkha nî ǁore. 6 Mari-i xa ǃaromahe hâsen ge ǂgui khoena ūn ge hâ i xūna ge ǂoaǃnâ. 7 ǁNā gâ khoen hîa mari-e kaise ǀnamn ge ǁî-i xa ǃnuis ǃnâ dās ǁkhās khami nî ǃkhōhe.
8 ǁOre tamase ǃkhū hâ khoeb mari-i khaos ai ǃkhoe tamab ge a ǃgâiǃō. 9 ǁNāti-ī khoe-ets ga ǀhao-ū, ots ge ǁî-e ǁnāti ī īǁoasa xū-e i sada ǁaegu ra dī ǃkhais ǃaroma nî ǃgôaǃgâ. 10 Khoe-i ga mari-i xa ǃâitsâhe tsî xawe xū-i xare-e tsūse dī tama i, o i ge ǃgâi ǃaromas ǂnīsa i nîs disa ūhâ. Tari-e ǃûǂam ǁkhā i a, xawe ǃûǂam tama tsî ǂkhabadī ǁkhāǃâ ǁnāsa dī tama hâ. 11 ǁNāti i ga ī, ob ge ǁî-i di ǃkhūsiba ǂhâbasa tsî i ge mâ-i hoa-e ǁî-i di māǂgaoxasib ǃaroma ǁî-e nî koa.
ǃUis ǂûǁares tawats nî tanisen ǀgaub
12 ǃUis di ǂûǁares tāb tawats ga ǂnû, o tā ǁharisase ǂû tsî “Nē hoaraga ǂûba kō re” ti mî. 13 Mûts ra xū-i hoa-e ǂhâbas ge a tsū. Xūǃgūnuxasib ge nēsi tamas ka io ega mâ-i hoa-i ǃoab ǃnâ nî āsa nî ǃaroma. 14 Tā ǀnî khoe-i mûsa ū-ai hâ xū-e ū, î tā khoe-e ǂû-i ǃaroma daoba xu ǂhāǂui. 15 Nau khoena ǃgôa, îts sats ra sîsenūhe ǂgao khami naun tsîna sîsenū. 16 Sa ǂû-ets ga hō, o khoen ǁnās xa a ui-uisabahe xuige tā xamari-i khami ǀkhubu ka haraǂgā. 17 ǃGâi ǂūba ǁgaus ǃaroma ǂgurose naun aiǃâ ǂûǀû. ǂÛǂâu tamats ka i, on ge ǁnās xa nî tsūbahe. 18 ǂGui khoen ǁaeguts ga hâ, o tā nau khoen aiǃâ ǂguro huisen. 19 ǂKhari ǂû-i ge ǃgâi ǂūba ūhâ khoe-e ǂâuba hâ. ǁÎ-i ge ǁgoe i ga sīo, kharob â-i ǃnâ ǁgoe ǀomǁkhui tama hâ. 20 ǂÛǃnā tamats ka io, ots ge ǃgâise nî ǁom tsî ǃgâise ra tsâse ǁgoaga nî ǂkhai. Xawe ǂûǃnās ge ǁgaora ǃnāb tsî ǂomoǃnâ tsuxuga ra ǃaroma. 21 Xawets ga ǂûǃnās xa tsûaǃnāo, khâi î sī ǀkhûiǂui, ots ge ǃgâise nî tsâ. 22 Ti ôatse, tita ra mîna ǃgâ tsîts ga ǁîna dī, ots ge ǀguitsē ǁîn ǃaroma nî gangan te. Dīts ra xū-i hoa-e ǁnâuǃāxase dī, ots ge tātsē ǀae tide.
23 Khoen ge māǂgaoxa ǁkhau-ao-e ra gangan tsî i ge ǁîn di koasa anu hâ. 24 Xawe ǃās ǃnâ hâ-i hoa-i ge ǂûǀgîxa-i ǁkhau-ao-i xa nî ǃgaesen tsî ǁîn di ǃgaesendi ge a ama.
Tā ǃnāsa ǂauxûiba ǃuiǂûǁares tawa ā
25 ǂAuxûib ge ǂgui khoena ge hîkākā tsî kaise ās ge sa aorekhoesisa ǁgauǂuis di ǃgâi ǀgau tamasa. 26 ǀGaisase ǀgamsa ǀaes ge ǀuri-i di ǃgâisiba ra ǃâitsâ. ǀGapiǂâixa khoe-i di ǂūb ge ǁî-i ga ǂauxûiba kaise ā tsî ǂnoagutsoatsoa, o ra ǁgausen. 27 ǂAuxûib ge ǂkharirosets ga āo, ǃgâise a tsâ kai tsi ǁkhā. Ûib ge ǂauxûib ose a ǁau. ǂAuxûib ge sadab nî ǃgâiaǂgao kaiga ge kuruhe. 28 Mâǁaets nî ā tsî mâ ǁae ǀû khaisats ga ǂan, ob ge ǂauxûiba ǃgâiaǂgao tsî nî dâ kai tsi, 29 xawe ǁaixa tsîts a ǂkhîoǃnâ hîats ga ā tsî ǃnāsase ā, ob ge kaise nî ǂkhîoǃnâ kai tsi. 30 Gâgu ga ǀhoro, o gu ge ǁaixa tsî ra ǃkham, xaweb ge ǀgaib âga ǂoa hâ tsî gu ge ǁnā ǀgaub ai ra tsûtsûhe. 31 Tā sa ǀhōsaga ǀguipa āǁare tsî go ra ǃgâiaǂgaoǀhao ǁâudī-i tawa mîǁgaiǁgai tsî ǃharaxū. Tā ǁîga tsūse tsâ kai tamas ka io mari-e gu surude tsi hâ ǃkhaisa ǂâiǂâiǃnâ tsî ǁnās ǀkha ǁîga ǂkhîoǃnâ kai.
© Khoekhoegowab Elobmîs © Bible Society in Namibia, 2020.
