ǃHobasens ǃoa hâ ǂgaikhâis
1 ǃKhūb ge ra mî: “ǃHobasen ǂgao du kao Israelǁaese, tita ǃoa ǃhobasen re. Tsî sadu ǁgaiǁgaisa elona du ga ti aisa xu ūbē o du ge ǀnarema tide. 2 O du ge nî nū: ‘ǃKhūb a ûitsama ǃkhais ao’ ti os ge ǁnāsa amab tsî ǂhanu-aisib ǃnâ nî ī, tsî du ge ǂhanu-aisiba nî dī tsî ǁkhāti ǂhanuse. O di ge ǁaede ǁîdi ǀkhaeba ǃKhūba xu nî ǃâubasen, ǁîb ǃnâ nî koasense.”
3 Nētib ge ǃKhūba Judab khoen tsî Jerusalems ǁanǂgāsaben ǃoa ra mî: “Sadu di ganupe ǃkhāǃkhurisa tama ǃhū-e ǃkhāǃkhuribasen, î du tā sadu ǃkhomna ǁkhūn ǃnâ tsoro. 4 ǃGaosen re ǃKhūb ǃaroma; aikhōb sadu ǂgaogu diba ūbē re, Judab khoedu tsî ǁanǂgāsabedu Jerusalems dido; îb tā ti ǁaixasib, sadu di ǂkhaba sîsengu ǃoagu ta ūhâba ǀarihe tamase nî khau ǀaes khami ī.”
ǀApasa xu hâ ǂōǂōsib
5 Xâiǁnâsa hoaraga ǃhūb ǃnâ xâi re!
ǃGari dommi ǀkha ǂgaiǂui re:
ǀHaoǀhaosen du re
î da omǂnamisa ǃādi ǁga ǃgû!
6 Sions ǃoa ǃkhauba ǃkhā re,
ǁhâ re, î tā ǁūse mâ!
Tsūǃgâba ta ra hā-ū xuige;
kai hîkākāsa ǀapasa xu.
7 Xammi gauǃkhais âba xu ra ǂoaxa
khamib ge hîkākā-aoba ǁaede xu ra ǂoaxa.
ǁÎb ge ǃkhais âba xu ra ǂoaxa
sadu ǃhūba nî ǃū-aisa xūse dīse.
8 ǁNā-amaga ǀhaosaraba ǂgaeǂgā, î ǃoa tsî ā,
ǀaexa ǁaixasib ǃKhūb dib
sada xu oa tama xuige.
9 Tsîb ge ǃKhūba ra mî: “ǁNā tsēs aib ge gao-aoba ǁkhoaǂgaosib âba nî ǂoaǃnâ; pristergu ge nî ǃhurigâ tsî kēbo-aogu ge nî burugâ.” 10 O ta ge ge mî: “ǃKhū Elotse, amasets ge nē ǁaes tsî Jerusalemsa ge ǂgaeǂhapu, ‘ǂKhîba du ge nî ūhâ’ tits ge mîo; xaweb gôaba sida ǀomdi kōse ra ǃkhā hîa.” 11 ǁNā ǁaeb ǃnâb ge ǃKhūba sadu Jerusalems dido nî mîba: “ǀGamsa ǂoab ge ǀgapi ǃkhaide xu, ti ǁaes di ôas daoba-u ra hā; ǀnupi tamas ka io ǃanuǃanu rase tama. 12 Nē xūna ǀgaidā hâ ǂoab ge tita xu nî hā. O ta ge nēsi ti ǀgoraǃgâsa ǁîn ǃoagu nî gowaǂui.”
Judab ge khākhoen xa hâǂnamihe hâ
13 Mû, ǃâudi khamib ge ra ǂoaxa tsî ǁgaoǂoas khami di ge torokunidi âba ī, tsî hān âb ge ǃariǃkhān ǃgâ-ai a ǃhae. Tsūba da, hîkākāhe da nî xui-ao.
14 “Jerusalems dido, sadu ǂgaoga ǂkhababa xu ǃanuǃanu, î du sâuhe ǁkhā. Mâ ǁaeb kōse du kha ǂkhababa sadu ǂgaogu ǃnâ nî ūhâ?
15 “Dom-i ge Dansa xu ra ǂhôa; Efraimmi di ǃnâuxa ǀkhariba xu tsūǃōba ra ǂhôa. 16 ǁAede ǁîsa aoǁnâba! Jerusalemsa mîba re: Xāǂgā-aogu ge ǃnū ǃhūba xu ǃgoaxa. ǁÎgu ge domgu âga Judab ǃādiǀî ǃhâkhâi 17 tsî ǃhanaba ra ǃûi khoegu khami ǃāsa nî hâǂnamipe, tita ǃoagus ge khâikhâisen xui-ao,”
tib ge ǃKhūba ra mî.18 Sa daob tsî sa dīgu ge nēna sas ai ge hā-ū; sa ǂkhabaxasib ge ausiba ra hā-ūba; tsîs ge nēsa ǂgaob âs kōse ra sī.
Jeremiab ge khoen âb ǂama ra ǃoa
19 Ti ǃnātse, ti ǃnātse!
Ti ǂgaotse! Ti ǂgaob ge kaise ra ǃgui!
Tita ge a ǃnō ǁoa;
xâiǁnâs ǀōba ta ge go ǁnâu,
ǃkhams di ǀganaba.
20 Nē hîkākās ais ge nausa ra hā;
hoaraga ǃhūb ge ra hîǀhuruhe.
ǃNapetamase di ge ti tentomde ra hîkākāhe;
ǂgāmâisagu âde ra doaǃāhe.
21 Mâ ǁaeb kōse ta kha ǃkhauba mû
tsî xâiǁnâs ǀganaba nî ǁnâu?
22 Ob ge ǃKhūba ra mî: “Ti ǁaes ge a gâre
titan ge a ǀū.
ǁÎn ge gâ ǀgôan,
ǁnâuǃā-e ūhâ taman khami ī.
ǁÎn ge ǂkhabase dīs di ǂansa ūhâ,
xawen ge ǃgâise dīsa a ǀū.”
Jeremiab ge ǃgoaxa hîkākāsa ra mû
23 ǃHūba ta ge ge kō, tsîb ge ge ǃū-aisa i;
ǀhommi ǃoa ta ge ge kō, tsîb ge ǃnâb âba ge ǀkhai i.
24 ǃHomga ta ge ge kō, ǁîgu ge ge ǀkhū;
tsî hoaraga ǃnâuga, aisǀî tsî khaosǀî gu ra gonse.
25 Kō tsî ta ge ge mû, khoesib a ǀkhaisa;
ǀhomanin on ge ge ǁkhanabē.
26 ǂÛtanixa ǃhūba ta ge ge kō,
ǁîb ge ge ǃgaroǃhū kai;
hoa ǃādi ge ge khôaǁnâhe hâ i,
ǃKhūb ǃaroma tsî ǁîb di ǀaexa ǁaixasib ǃaroma.
27 (ǃKhūb ge nēti ra mî: “Hoaraga ǃhūb ge nî ǃgaroǃhū kai,
xawe ta ge ǁîba hoaragase hîkākā tide.”)
28 Nēs xab ge ǃhūbaiba nî ǃoa;
tsî ǀhomga ǀgapise nî ǃkhae.
Tita ge ǁîsa go ǃhoa,
tita ge ǁîsa go ǂâibasen
tsî ǁîsa ǀkharaǀkhara tide.
29 Hātoro-aogu tsî khāǁkhâu-aogu di ǂkhupib
ge mâ-i hoa-i ǃās di-e nî ǃkhoeni kai.
ǀNîn ge haiǀgomdi ǃnâ nî gau
tsî ǀnîna ǃhaogu ai nî ǃapa.
Tsî di ge hoaraga ǃāde ǁnāxūhe hâ;
khoe-i xare-i ge ǁîdi ǃnâ ǁan tama hâ.
30 Tsî sas hîǀhuruhe hâsa, tare-es ra dī?
Sas ge ǀaoǀapa sarana ana
tsî ǃhuniǀuri tsî ǀhaiǀuri-anixūn ǀkha ra anisen;
mûra âsas ge î-îxū-i ǀkha ra kaikai,
xawes ge ǁnāsa ǁause ra dī.
Sa ǀnamsagu ge ge ǂhara si
tsî gu ge sa ûiba ra ôa.
31 ǁOratsûba ūhâ taras di āb khami ra ǀō domma ta ge ra ǁnâu,
ǂōǂōsib di āba, ǂguro ǀgôa-e ra ǁora khoes dib khami.
ǁNāb ge Sions ôas di domma,
ǁîs ge ra ǃgae,
ǃomkha âsas ge ra ǀhōǂui:
“Tita ge ǂkhabu hâ!
ǁÎgu ge tita nî ǃgamse ǃgoaxa!”
© Khoekhoegowab Elobmîs © Bible Society in Namibia, 2020.
