Holoferneb ge Axiori ǀapemās ai ra ǃeream
1 ǁNāpa ge Holoferneb tsî ǀapemā-aogu ge ǂnôa i ǃkhaib ai gere mâma khoen di ǂkhupib ge ǁgoea-ai, ob ge Asiriatoroǂnubis ǃkhōdana-aob, Holoferneba hoaraga khoen tsî ǀkhupi toroǃkhamaogu ǃhao ǃhūgu digu ǁnāpa ge hâ igu aiǃâ Axiori ǃoa ge mî: 2 “Axior, tarits a tits ra ǂâi? Sats tsî sa khoegu tsîn kom kēbo-ao tamao. Israelǁîna sa khoega ra ǁamaǃkhuni? Taritsa satsa, ots Israelǁîn ǃoagu ge torodī tidega, ǁîn nî ǁîn di Elob xa ǁkhaubahe xui-ao sige ra ǃkhâikhom. Nebukadnesari ge a sida elo tsî ǁnās ǀguis ge ra ǃgôa. ǁÎb ge toroǂnubis âba nî sî tsîs ge nē hoaraga Israelǁaesa ǃhūbaiba xu nî ǀnapubēhe. ǁÎn Elob ge ǁîna hui ǁkhā tide. 3 Sige ge Nebukadnesara ra ǃoaba tsî ge ge ǀgui toroǃkhamaob ǃoagu ge ra torodīs khami hoaraga toroǂnubisa nî hîkākā. ǁÎn ge sige hātoro-aoga mâǃoa ǁkhā tide. 4 Sige hātoroǃkhamaogu ge ǁîna hoaragase nî hîkākā. ǁÎn di ǃhomgu ge ǁîn ǀaob ǃnâ nî ǀharihe tsî gu ge ǃgoaǃnāga ǁîn ǁō hâ sorodi xa nî ǀoa. Sige ge ǁîna hoaragase nî hîkākā, ǁîn di dāǃharodi xawedi ǃgau tidese. Nēs ge gao-aob Nebukadnesari, hoaraga ǃhūbaib di ǃkhūb mîmāsa, tsî ǁîb ge ǁau mîna ǃhoa tama hâ. 5 Axior, sats ge Amonǁîn xa ǃgaehe hâ toro-aos ǀguisats i, xawe ǀapexū-ao-i khami ra ǃhoa. Sats ge tita nē ǃhaos Egipteba xu ge khobon ase ǃkhoenisa ta ǀkhao tama hâ hîa, ǁkhawa mû tide. 6 Oahā ta kao, o gu ge ti toroǃkhamaoga sats tsîna nî ǃgam. Sats tsîn ge Israelǁîn di ǀgui-i khami nî ǁō.
7 “Nēsi gu ge ti khoega satsa ǃhomga ǃoa ū tsî Israelǁîn ǃādi ǀguis ǃnâ sī nî ǁnāxū 8 tsîts ge ǁnā khoen ǀkha ǁnāpa nî ǁō. 9 Axior, tare-i xats ǂâiǂhansen ra khami ī? ǁNā ǃās mâǃoa te ǁoa tits ra ǂâi? Mî ta go xūn hoana ta nî dī ǃkhaisa ǂâis ǃnâ ūhâ re.”
Axiori ge Betulias ǃoa ra hā-ūhe
10 Holoferneb ge ǁîb tentoms ǃnâ ge ǃâu hâ i ǃgāga ge mîmā, î gu Axiora ǃkhō, Israeli ǃās Betulias ǃoa ǃgû-ū tsî ǁîba Israelǁîna māǁnâ. 11 O gu ge Axiora ǃkhō tsî Asiriaǁî hâǃkhaiba xu ūǂui tsî ǃgoaǃnāgu ǃnâ-ū, ǃhomxa ǀkharigu ǃoa, Betulias ǃnaka ǁgoe ǁgamǀaudi kōse ge ǂgaeǂgui.
12 Tsî Betulias khoegu ge Asiriaǁîgu Axiori ǀkha ǃgoaxa ǃkhaisa gu ge mû, o ǁîgu ǁâtanina ū tsî ǃnâub ǀgapiseb, ǃās ge ǂnubi-aihe hâ ib ǃoa ge ǃkhoeǂoa. Khoeb hoab slengersa ǃkham-ū xūse gere sîsenūb ge ǀuide Holoferneb toroǃkhamaogu ǁga gere ǂnoa tsî ǁnā ǀgaub ai ǃnâub ǀgūse gu nî hāsa ge ǁkhae. 13 Asiriaǁîgu ge ǁnās ǀkha ǃhomgu ǃgâb ai gu nî gau ǃkhaisa ge ǁgarihe. ǁÎgu ge Axiora ǃgae tsî ǃhommiǂai-am ǁnāxūǁgui bi tsî ǁnās khaoǃgâ Holoferneb ǃoa ge oa.
14 Egan ge Israelǁîna Betuliasa xun ge ǁgôaxa, o Axiora xore, ǃās ǃnâ ǂgâ-ū tsî ǃās ǂammâisagu aiǃâ ge sī-ū bi. 15 ǁNā ǁaeb ǃnâ ge ǁnāpa ǂammâisa igu ge Usiab, Mixab ôab Simeonni ǃhaos dib, Kabrib, Gotoniali ôab tsî Karmib Melxieli ôab tsîga. 16 ǂAmmâisagu ge ǃās kaiga ge ǂgaiǀhao tsîn ge hoaraga tarekhoedi tsî ǂkham khoegu tsîna ǁkhāti ǁnāǀî ge ǃkhoe. Axiori ge khoen ǁaegu hā-ūhe tsî Usiab xa tare-i ge ǁnā Asiriaǁî hâǃkhaib ǃnâ ǁîb ǀkha ī ǃkhaisa ge dîǃnâtsoatsoahe. 17 Axiori ge Holoferneb toroǃnans tawan gere tarena ǃhoahes, ǁîb ǂûb ge tarena Asiriaǁî ǂgaeǂgui-aogu ǃoa mîs tsî Holoferneb gere mâti koasen, Israelǁînab nî ǃgam ǀgausa ǃkhais tsîna ǁîga ge mîba. 18 On ge khoena nēsan ge ǁnâu, o ǁgoadi ai ǁnā tsî Eloba ge ǀgoreǀî. Nētin ge ge ǀgore: 19 “ǃKhūtse, ǀhommi Elotse, mû re mâtin ge sida koasen ra khākhoena sa khoena ǃgamǃgam ǃkhaisa. ǀKhomxa, î hui da re.” 20 On ge ǁîna Axioran nî mâǃgâ ǃkhaisa ǁapoǁapo tsî ǁîba dīb ge xūn ǃaroma ge koa. 21 Axiori ge ǂnûs ge toao, Usiab ǀkha Usiab oms ǃoa ǃgû tsî ǁnāpa kai ǂûǁaresa kaigu ǀkha ge ūhâ. Hoaraga tsuxuban ge Israelǁîna Elob ǃoa huihen nîga gere ǀgore.
© Khoekhoegowab Elobmîs © Bible Society in Namibia, 2020.
