1 Mîs ǃKhūb dis ge Sefanjaba Amonni ôab Josiab ge Judab gao-ao i ǁaeb ǃnâ ge hāba. Sefanjab ge a Kusi ôa, Kusi ge a Gedaljab ôa, Gedaljab ge a Amariab ôa tsî Amariab ge a Hiskiab ôa.
ǃKhūb di ǀgoraǃgâtsēs
2 Nētib ge ǃKhūba ra mî: “Tita ge ǃhūbaib ai hâ xūn hoana nî hîkākā. 3 Tita ge khoen tsî ǀgurun tsî xamarin, ǀhomanin tsî ǁaun tsîn hoana nî hîkākā. Tsî ta ge eloxoresan hîa nauna ra ǁnā kaina nî ǀamǀam. Tita ge khoesib hoaba ǃhūbaiba xu nî ūbē,”
tib ge ǃKhūba ra mî.4 “Tita ge Judaba nî ǁkhara tsî ǁkhāti Jerusalems di ǁanǂgāsaben hoana. Tsî ta ge nē ǃās ǃnâ noxopa ǃgau hân, Baali dina nî hîkākā tsî ǀondi ǁgôa-elopristergu didi tsîna. 5 ǁNān hîa omdi ǂamǃnâ ǂoa tsî ǀhomaib ai hâ xūna ra ǀgoreǀîn tsî ǁnān hîa ǃKhūb tawa nū tsî xawe ǁkhāti Moleki tawas tsîna ra nūna; 6 tsî ǁkhāti ǁnān ǃKhūba ge ǁâba mān, ǁîba ôa tama tsî ǁîb ai ǀape-ôa tamana.”
7 ǃKhūb Elob aiǃâ ǃnō re, ǃKhūb di tsēs a ǀgū xuige. ǃKhūb ge ǁguiba-e ǂhomi tsî ǁkhausaben âba go khai. 8 ǃKhūb ǁguibas di tsēs ai ta ge tita ǂamkhoegu, gaoǀgôan tsî ǃhao sarana ra anan tsîn hoana nî ǁkhara. 9 ǁNā tsēs ai ta ge dao-ams ǃnaoba ra uriǃnapu-i hoa-e nî ǁkhara tsî ǁnān ǀhonkhoeb ân di omma ǂkhabadīb tsî gāxaǃnâsib ǀkha ra ǀoaǀoan tsîna.
10 “ǁNā tsēs aib ge āba Jerusalems ǃnâ ǁAun Dao-ams tawa nî ǁnâuhe, āba ǀgamǁî ǃâs ǃās disa xu tsî ǀgaisa ǀōb khôas diba ǃnâude xu,”
tib ge ǃKhūba ra mî.11 “Ā re sadu ǂharuguǃkhaib di ǁanǂgāsabedo, hoaraga ǂharugu-aon nî ūbēhe tsî ǀhaiǀuriba ra ǀnōǁnân hoan nî hîkākāhe xuige.
12 “ǁNā ǁaeb ai ta ge Jerusalemsa ǃamǀaedi ǀkha ôaǃnâǃganu tsî ǁnān, ǁîn ǂûn ǃnâ ǂkhîǂkhîsa tsî ǁîǃgôasen hâna nî ǁkhara; ǁnān, ǁîn ǂûn ǃnâ ‘ǃKhūb ge ǃgâi-i kas, tsū-i kas hoasa dī tama hâ’ ti ra mîna. 13 ǁÎn di xūn ge nî ǃnariǂuihe tsî omdi ân ge nî hîkākāhe. ǁÎn ge omde nî ombasen, xawe ǁîdi ǃnâ ǁan tide; draibeǃhanagan ga ǂgā, xawen ge ǁîga xu ǂauxûi-e ā tide.”
14 ǃKhūb di kaitsēs ge a ǀgū; ǁîs ge kaise a ǀgū tsî ǃhaese ra hā. ǃKhūb di tsēs ge ause nî ǀō, ǀgaisa ǁē-aob tsîn ge ǁnāpa ǃgarise nî ǃau. 15 ǁNās ge nî ǁaib di tsē, ǂōǂōsib tsî ǀhūsasib di tsē, khôaǂkhūs tsî hîkākās di tsē, ǃkhaeb tsî ǃkhaenas di tsē, ǃâudi tsî durutsuxub di tsē, 16 tsēs xâiǁnâs di ǀōb tsî toroǃkhams di ǃauǂgais, omǂnamisa ǃādi tsî ǀgapi ǂgō-omgu ǃoagus disa.
17 “Tita ge ǃaoba khoen ǂama nî hā kai tsîn ge ǂgī khoe-i khami nî tsananama, tita ǃoagun ge ǁore amaga. ǁÎn di ǀaob ge ǁgam-i khami nî ǁhōxūhe tsî sorodi âna xaub khami,”
tib ge ǃKhūba ra mî.18 ǁÎn di ǀhaiǀurib kas, ǁîn di ǃhuniǀurib kas hoas ge ǁîna ǃKhūb ǁaib di tsēs ai huiǂui ǁkhā tide. Hoaraga ǃhūbaib ge ǁîb ǁaib di ǀaes xa nî hapuhe. ǁÎb ge ǃnapetamase hoaraga khoen ǃhūbaib dina nî hîkākā.
© Khoekhoegowab Elobmîs © Bible Society in Namibia, 2020.
