ǀGores di ǂgans
1 ǃAruǀî ǃgâsado, ǀgoreba ge re, îs ǃKhūb di mîsa ǃhaese khoraǂuihe tsî ǂkhaiǂkhaihe sadu ǀkhas ǁkhās khami, 2 î ǁkhāti ǀgore re, î ge sige tsū tsî ǂkhaba khoena xu sâuhe, hoa khoen ǂgomsabe tama amaga.
3 Xawe ǃKhūb ge a ǂgomǂgomsa, sado ǀgaiǀgai tsî ǂKhababa xu nî ǃûiba. 4 Tsîb ge ǃKhūba sadu ǃnâ hâ ǂgomǃgâba ra mā ge, sige ra mîmā duna du ra dī tsî noxopa nî dī ǃkhaisa.
5 Ab nēsi ǃKhūba sadu di ǂgaoga unu, Elob di ǀnammi tsî Xristuba* xu ra hā mâǃkharus ǃoa.
Sîsens di ǂhâbasasib
6 ǃGâsado, sige ge ra mîmā du sada ǃKhūb Jesub Xristub di ǀons ǃnâ mâ ǃgâsa-i, hîa ǀopesa tsî sige ge ǁîna ǁkhāǁkhā ǁnaetigu ǃoa ûi tama-e xu du nî ūdabasen ǃkhaisa. 7 Sadu kom aitsama sige du nî ǁgaeǁgae ǃkhais di ǂhâbasasiba a ǂano, sige ge sadu ǁaegu ǀopesase hâ tama hâ i amaga. 8 ǁKhāti ge ge ǁause khoe-e xu ǂûxū-e ge ǃkhōǃoa tama hâ i, xawe tsēs tsî tsuxuba ǃgomgu tsî ǀhupuǀhupusens ǀkha gere sîsen, î ge tā khoe-i xare-e ǃgommi ase ība. 9 Sado xū-e ǂgaoǀkhās di ǁkhāsiba ge ūhâ tamao tamas ge, xawe aiǁgausa sado nî māse, î du sige ǁgaeǁgae ǁkhā. 10 Sadu ǀkha ge ge hâ i ǁaeb ǃnâ ge ge ǁkhāti gere mîmā du, khoe-i hîa sîsen ǂgao tama-i ge ǂû tide ti.
11 ǁNâu ge ge ra ǀnîn âdu ǀopesase ra ǃgûma ǃkhaisa, sîsen tamase, xawe xū taman ǀkha ra ǁaeǁaesense. 12 ǁNāti ī khoena ge ge mîmā tsî gere ǁnama, ǃKhūb Jesub Xristub ǃnâ, ǃnōsasib ǃnâ sîsens ǀkhan ǁîn di pereba ǂû ǁkhā ǃkhaisa.
13 Xawe sado, ǃgâsado, tā tsau re ǃgâise dīsa. 14 Tsî khoe-i ga sige di mîs nē sîǂkhanis ǃnâ mâsa ǁnâuǀnam tama io, ǁî-e ǃgaoǃgâ, î du sado ǁî-i ǀkha tā ǁaeǁaesen î-i ǁî-e taotaohe. 15 Î tā ǁî-e khākhoe-i ase mû, xawe ǁî-e Xristesi ǃgâsa-i ase ǁnama.
ǀUni mîdi tsî tawededi
16 Ab nēsi ǃKhūb ǂkhîb diba aitsama hoaǁae mâ ǀgaus hoas ai ǂkhîba mā du. Ab ǃKhūba sadu hoadu ǀkha hâ.
17 Ti ǂhunuma ǃommi ǀkha ta ge nēsa ra xoa: Pauluba xu hâ tawedes. Nēs ge mâ sîǂkhanis, tita ra xoas hoas di saosa.
18 ǀKhommi sada ǃKhūb Jesub Xristub diba ab sadu hoadu ǀkha hâ.
© Khoekhoegowab Elobmîs © Bible Society in Namibia, 2020.
