1 Ob ge Davida ge mî: “Nēpab ge ǃKhūb Elob di Tempela nî hâ. Nēs ge altars, ǁîs ain Israelǁîna khauǁguibade nî ǁguibasa.”
Tempeli ǂnubihes di aiǂhomisendi
2 Gao-aob Davidi ge hoaraga ǃhaokhoen Israeli ǃnâ hân nî ǀhao ǃkhaisa mîmā tsî ǁîna ge sîsen kai. ǀNîgu ǁîn di gu ge Tempeli nî ǂnubi-ūhe ǀuide gere aiǂhomi. 3 Davidi ge ǁkhāti spaikergu tsî ǃkhōǁae-ūxūn dao-amdi din ǃaroma kaise ǂgui ǀurina ge mā, tsî ǁkhāti ǁnātikōse kai tsî ǀnōheǁoasase ge ǃgom i brons-i tsîna. 4 ǁÎb ge ǁkhāti Sidons tsî Tirus tsîra khoen ǀkha ge ǁnâugu, în kaise ǂgui sederhaiga hā-ūba bi. 5 Davidi ge ge ǂâi: “Ti ôab Salomob nî ǂnubi Tempeli ge kaise ǂoaǂamsa tsî hoaraga ǃhūbaib ǃnâ nî ǂansa. Xaweb ge ǁîba a ǂkham tsî ǀoasa ǂan-e ūhâ tama hâ, ǁnā-amaga ta ge tita Tempeli ǃaroma aiǂhomisende nî dī.” ǁNātib ge Davida kaise ǂgui omūxūna, ǁōb nîs aiǃâ ge aiǂhomi.
6 ǁNās khaoǃgâb ge ǁîb ôab Salomoba ǂgai tsî ge mîmā, îb ǃKhūb Israeli di Eloba Tempela ǂnubiba. 7 Davidi ge Salomob ǃoa ge mî: “Ti ôatse, tita ge ǃKhūb, ti Elob di ǃgôasib ǃaroma Tempela gere ǂnubi ǂgao, 8 xaweb ge ǃKhūba ge mîba te, kaise ta ge ǂgui khoena ǃgam tsî ǂgui toroga ǃkham ǃkhaisa. ǁNā-amagab ge kaise ta ge ǀaoǂnâxū xui-ao, Tempela ta nî ǂnubiba bi ǃkhaisa ǂgao tama ge i. 9 Tsîb ge tita ge mîmâiba: ‘Sats ge ǀgôaba nî ūhâ, ǂkhîb ǃnâ nî ǂgaeǂguiba, ǁîb di khākhoen hoana xu ta nî sâ kai bi xui-ao. ǁÎb ge Salomo ti nî ǀonǂgaihe, ǁîb di ǂgaeǂguis ǁaeb ǃnâ ta ǂkhîb tsî sâb tsîkha Israela nî mā xui-ao. 10 ǁÎb ge tita Tempela nî ǂnubiba. ǁÎb ge tita ǀgôase nî ība tsî tita ge ǁîba ǁgûse nî ība. ǁÎb gaosis ge ǀamos kōse Israela nî ǂgaeǂgui.’ ”
11 ǃAruǀîb ge Davida ge mî: “Ab ǃKhūb, sa Eloba hâǀkhā tsi tsî mîmâib ge khami, ǁîba Tempela ǂnubibas ǃnâ ǃgâiǃgâ kai tsi. 12 Ab ǃKhūba ǁnâuǃāb tsî gā-aisib tsîra mā tsi, Israelats ǃKhūb di ǂhanub ǃoa nî ǂgaeǂguise. 13 ǃKhūb ge Moseba Israeli ǃaroma mā ǂhanugu hoagats ga ǁnâuǀnam, ots ge nî ǃgâiǃgâ. ǁKhoaǂgaoxa, îts ǀgai, î tā xū-i xare-e ǃao. 14 Tita ge Tempeli di ǂnubihes ǃaroma dītsâ tsî ǃnonaǀoadisi tsî hakakaidisis xa ǃnāsa tongu ǃhuniǀurib tsî ǃnonadisihakaǀaǀoadisi tongu xa ǃnāsa ǀhaiǀurib tsîna ge ǀhaoǀhao. ǁNās xōǀkhā ta ge ǁnātikōse kai tsî ǀnōheǁoasase ǃgom brons-i tsî ǀurin tsîna ge ǀhaoǀhao. Hain tsî ǀuidi tsîn ge ǁkhāti ǂhomitoahe hâ, xawets ge noxopa nî ǀaroǃgâ. 15 ǂGui sîsenaogats ge ūhâ, ǀuiǁhā-aogu, ǂnubiǂgoakuru-aogu, haikuru-aogu tsî ǃkharagaǃnâgu ǃomsîsenain ǃnâ ǂansa ūhâ khoegu, 16 ǃhuniǀurib, ǀhaiǀurib, brons-i tsî ǀurin tsîn ǀkha sîsen ǁkhāga. Sîsenni ǀkha nēsi tsoatsoa re, tsî ab ǃKhūba hâǀkhā tsi re.”
17 Davidi ge Israeli di ǂgaeǂgui-aogu hoaga ge mîmā, î gu Salomoba hui. 18 ǁÎb ge ge mî: “ǃKhūb sadu Elob ge sadu ǀkha hâ tsî sadu ǂnamipe sâba ge mā du. ǁÎb ge tita, nē ǃhūb ǃnâ ge ǁan hâ i khoen hoana ge ǃhaeǂui kai, tsîn ge nēsi sada tsî ǃKhūb tsîn aiǃâ ǃgamǃgamhe hâ. 19 Nēsi ǃKhūb sadu Eloba hoaraga ǂgaob tsî ǀoms tsîra ǀkha ǃoaba re. Tempela ǂnubitsoatsoa, î du ǃGaeǀhaos ǂGaes ǃKhūb dis tsî nau ǃanu xūn, Eloba ǀgoreǀîs tawa ra sîsenūhen tsîna ǁîb ǃnâ mâi.”
© Khoekhoegowab Elobmîs © Bible Society in Namibia, 2020.
